རྒྱ་གཞུང་གིས་དགེ་འདུན་པ་དཀོན་མཆོག་གྲགས་པ་འཛིན་བཟུང་བྱས་འདུག
ཉེ་ཆར་བོད་ནང་གི་ཀན་སུའུ་ཐེ་བོ་རྫོང་གཡིས་པ་ཡུལ་ཚོའི་བཀྲ་ཤིས་དགོན་པའི་དགེ་འདུན་པ་དཀོན་མཆོག་གྲགས་པ་རྒྱུ་རྐྱེན་གང་ཡིན་མི་གསལ་བའི་ཐོག་ནས། རྒྱ་གཞུང་གི་ཉེན་རྟོག་པས་འཛིན་བཟུང་བཙན་ཁྲིད་བྱས་ཏེ་ཉིན་གྲངས་བཅུ་ལྷག་ཕྱིན་ཡོད་འདུག
ཁོང་ནི་དུས་རྒྱུན་སྒྲུབ་པ་ལ་བཞུགས་པ་སོགས་ཆོས་ཕྱོགས་ཀྱི་བྱ་བ་ཁོ་ནར་བརྩོན་མཁན་ཞིག་ཡིན་འདུག་པས། རྒྱ་གཞུང་གིས་ཁོང་འཛིན་བཟུང་བྱེད་དོན་གང་ཡིན་མིན་དང་གང་དུ་ཡོད་མེད། ད་ལྟའི་སྐུ་གཟུགས་ཀྱི་གནས་སྟངས་སོགས་ཀྱི་སྐོར་ནང་མི་འབྲེལ་ཡོད་ཚོས་ད་དུང་ཤེས་རྟོགས་ཐུབ་ཀྱི་མེད་པ་དང་། ཉེན་རྟོག་པར་ཁོང་དང་ཐུག་འཇུག་རྒྱུའི་རེ་སྐུལ་ཞུས་ཡོད་འདུག་ཀྱང་ཆོག་མཆན་སྤྲད་མེད་པས། རྒྱ་གཞུང་གིས་ནག་ཉེས་བཙན་འགེལ་བྱེད་སྲིད་པའི་སེམས་ཁྲལ་བྱེད་བཞིན་ཡོད་འདུག སྤྱིར་བོད་ནང་གི་ས་ཆ་གང་སར་ཏང་གི་ཚོགས་ཆེན་ཉི་ཤུ་པའི་དགོངས་དོན་དང་ཞི་ཅིན་ཕིང་གི་ལེགས་བཤད་ཟེར་བ་སོགས་རྒྱ་གཞུང་གིས་ཆབ་སྲིད་ཀྱི་སློབ་གསོ་སྤེལ་བ་དང་དྲིལ་བསྒྲགས་སྣ་ཚོགས་སྤེལ་བཞིན་པ་ལྟར། བོད་ཐེ་བོ་རྫོང་གི་ས་གནས་མང་པོ་ཞིག་ཏུ་ཡང་དགོན་པ་གྲོང་སྡེ་མཉམ་དུ་བསྡུས་ཏེ་རྒྱ་ནག་གཞུང་གི་ལྟ་བ་དང་སྲིད་ཇུས་ཟེར་བ་བཙན་གྱིས་སློབ་སྦྱོང་བྱེད་དུ་འཇུག་གི་ཡོད་འདུག འཛིན་བཟུང་བཙན་ཁྲིད་བྱས་པའི་དགེ་འདུན་པ་ཁོང་ནི་བོད་ཐེ་བོ་རྫོང་གཡིས་པ་ཡུལ་ཚོའི་བཀྲ་ཤིས་དགོན་པའི་དགེ་འདུན་པ་ཞིག་ཡིན་པ་དང་། དུས་རྒྱུན་ཁོང་ཆོས་ཕྱོགས་ཀྱི་ལས་དོན་གཉེར་གནང་མཁན་ཞིག་ཡིན་པ་ལས། རྒྱལ་ཁབ་ཀྱི་ཁྲིམས་སྒྲིག་ལས་འགལ་བའི་ཕྱག་ལས་གནང་མཁན་ཞིག་རྩ་བ་ནས་མིན་པ་དང་། འདས་པའི་ལོ་ཤས་སྔོན་བལ་ཡུལ་བརྒྱུད་ནས་མཆོད་རྫས་སོགས་ཉེར་མཁོའི་ཅ་དངོས་འགའ་བླུ་ཡོན་ཞུས་ཡོད་ཀྱང་། དེ་ནི་རྒྱལ་ཁབ་ཀྱི་ཁྲིམས་སྒྲིག་དང་འགལ་བའི་བྱ་བ་ཞིག་གཏན་ནས་མ་རེད་ཅེས་ནང་མི་ཉེ་འབྲེལ་ཚོས་འགྲེལ་བརྗོད་གནང་གི་ཡོད་འདུག
གསར་འགོད་པ། བསྟན་འཛིན་ལམ་བཟང་།