རྒྱ་གཞུང་དང་ཉི་ཧོང་གཞུང་ལ་ཞུ་འབོད་དོན་ཚན་གསུམ་རེ་བཏོན་འདུག

ཉི་ཧོང་བོད་དོན་རྒྱབ་སྐྱོར་ཚོགས་པའི་ལོ་འཁོར་ཚོགས་འདུ་དེ་ཉེ་ཆར་འཚོགས་ཡོད་འདུག་པ་དང་། སྐབས་དེ་དུས་རྒྱ་ནག་གཞུང་དང་ཉི་ཧོང་གཞུང་གཉིས་ལ་ཞུ་འབོད་དོན་ཚན་གསུམ་རེ་བཏོན་ཡོད་འདུག

ཕྱི་ལོ་༢༠༢༦ ཟླ་༣ ཚེས་༢ ཉིན་བོད་མིའི་སྒྲིག་འཛུགས་ཀྱི་དྲྭ་རྒྱར་གནས་ཚུལ་སྤེལ་བ་ལྟར་ན། ཕྱི་ཚེས་༢༨ ཉིན་ཉི་ཧོང་བོད་སྐྱོབ་ཚོགས་པའི་(Save Tibet Network)གོ་སྒྲིག་འོག་ཉི་ཧོང་བོད་དོན་རྒྱབ་སྐྱོར་ཚོགས་པའི་ཚོགས་པ་ཁག་གི་ལོ་འཁོར་ཚོགས་འདུ་བསྐོང་ཚོགས་གནང་ཡོད་འདུག་པ་དང་། སྐབས་དེར་ཚོགས་མི་འགའ་ཞིག་ཉི་ཧོང་སྐུ་ཚབ་དོན་ཁང་དུ་དངོས་སུ་ཕེབས་ནས་ཚོགས་འདུའི་ཐོག་མཉམ་ཞུགས་གནང་ཡོད་འདུག 
དེ་ཡང་ཚོགས་འདུའི་ཐོག་ཉི་ཧོང་བོད་སྐྱོབ་ཚོགས་པའི་ཚོགས་གཙོ་དང་གྲོས་ཚོགས་འཐུས་མི་ཟུར་པ་མ་ཀི་ནོ་སི་ཤུ་(Makino Seishu)ཡིས་ཚོགས་བཅར་བ་རྣམས་ལ་ཕེབས་བསུ་དང་སྦྲགས། ཚོགས་འདུའི་དགོས་དམིགས་དང་༸གོང་ས་མཆོག་གི་དགོངས་གཞི་ལྟར་ཞི་བདེ་དང་བྱམས་བརྩེ་ལྡན་པའི་འཛམ་གླིང་ཞིག་བསྐྲུན་ཐབས་སླད་མཉམ་ལས་དེ་ལྟ་བུ་ནི་གལ་གནད་ཆེན་པོ་ཡིན་སྐོར་བརྗོད་འདུག་ཅིང།
དེ་བཞིན་ཁོང་གིས་༸གོང་ས་མཆོག་གི་དགོངས་གཞི་ནི་བོད་སྲུང་སྐྱོབ་ཙམ་མ་ཡིན་པར་འགྲོ་བ་མིའི་རིགས་དང་འཛམ་གླིང་སྲུང་སྐྱོབ་ལ་དམིགས་པ་ཞིག་ཡིན་པ་གསལ་སྟོན་གནང་ཡོད་པ་མ་ཟད། རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་འདུ་དེ་བཞིན་དྷ་རམ་ས་ལར་འཚོག་རྒྱུ་ཡིན་པས་ཡི་རངས་བསྔགས་བརྗོད་ཞུས་པ་དང་། ཚོགས་འདུའི་ཐོག་ཉི་ཧོང་ནས་ཚོགས་མི་དྲུག་དང་ལྷོ་ཀོ་རི་ཡ་ནས་ཚོགས་མི་གཉིས་བཅས་མཉམ་ཞུགས་གནང་རྒྱུ་ཡིན་པ་བརྗོད་ཡོད་འདུག
 དེ་རྗེས་ཉི་ཧོང་བོད་དོན་རྒྱབ་སྐྱོར་ཚོགས་པའི་སྤྱི་ཁྱབ་དྲུང་ཆེ་(Yamada Hiroshi)ཡིས་ཚོགས་མི་རྣམས་ལ་འཚམས་འདྲི་ཞུས་པ་དང་སྦྲགས་ཉེ་ལམ་༸གོང་ས་མཆོག་ལ་གྷེ་རེ་མི་གཟེངས་རྟགས་ཐོབ་པར་འཚམས་འདྲི་ཞུས་པ་དང་ཆབས་ཅིག གཟེངས་རྟགས་འདིའི་བརྒྱུད་ནས་འཛམ་གླིང་སྤྱི་ཡོངས་སུ་མགོན་པོ་གང་ཉིད་ཞི་བདེ་དང་བྱམས་བརྩེའི་བཀའ་སློབ་ལམ་སྟོན་ཁག་རྒྱ་ཁྱབ་ཏུ་འགྲོ་བར་དགེ་མཚན་ཡོད་སྐོར་བརྗོད་ཡོད་འདུག
ཕྱི་དྲིལ་དྲུང་ཆེ་ཀརྨ་ཆོས་དབྱིངས་ཀྱིས་ཚོགས་མི་རྣམས་ནས་བོད་དོན་ཐོག་རྒྱབ་སྐྱོར་གཡོ་མེད་གནང་བར་ཐུགས་རྗེ་ཆེ་ཞུས་པ་དང་ཆབས་ཅིག དེ་སྔར་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་༩ དེ་བཞིན་ལེགས་གྲུབ་བྱུང་བར་ཚང་མས་མཐུན་འགྱུར་རོགས་རམ་གནང་བར་ཐུགས་རྗེ་ཆེ་ཞུས་པ་དང་། དེ་བཞིན་ཁོང་གིས་དྷ་རམ་ས་ལར་ཚོགས་ལ་ཉེ་བའི་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་འདུའི་ཐོག་བཅར་རྒྱུ་ཡིན་པའི་ཉི་ཧོང་དང་ལྷོ་ཀོ་རི་ཡའི་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་དང་མཇལ་འཕྲད་གནང་རྒྱུར་རེ་སྒུག་གནང་བཞིན་ཡོད་སྐོར་བརྗོད་ཡོད་འདུག
ཉི་ཧོང་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པའི་དྲུང་ཆེ་ཟུར་པ་ན་ག་ཧོ་ཏ་ཀ་ཤི་ཡིས་ཉི་ཧོང་གྲོས་ཚོགས་འཐུས་མི་རྣམས་ནས་རྒྱ་ནག་གཞུང་གིས་བོད་དང་རྒྱལ་ཁབ་གཞན་ཁག་ཏུ་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར། དོན་སྙིང་ལྡན་པ་དང་ཤུགས་ཆེ་བའི་བསྒྲགས་གཏམ་ཞིག་སྤེལ་གནང་ཡོང་བའི་འབོད་སྐུལ་ཞུས་པ་དང་། དངོས་དོན་འཚོལ་ཞིབ་ཚོགས་ཆུང་ནས་འཛམ་གླིང་ཁྱོན་ཡོངས་སུ་ཆོས་དད་རང་དབང་དང་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པའི་ཐོག་ལྟ་ཞིབ་གནང་དགོས་པའི་རེ་སྐུལ་ཡང་ཞུས་ཡོད་འདུག
ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ཡིས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ནས་བོད་དོན་ཐོག་ཐུགས་སྣང་གིས་རྒྱབ་སྐྱོར་གནང་སྟེ་སོ་སོའི་ས་གནས་སུ་ལས་འགུལ་སྤེལ་དང་སྤེལ་མུས་ཡིན་པར་བཀའ་དྲིན་ཆེ་ཞུས་པ་དང་། དེ་བཞིན་དྷ་རམ་ས་ལར་ཚོགས་ལ་ཉེ་བའི་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་འདུའི་ཐོག་ཉི་ཧོང་དང་ལྷོ་ཀོ་རི་ཡ་ནས་ཚོགས་མི་བརྒྱད་མཉམ་ཞུགས་གནང་རྒྱུ་ཡིན་པར་ཡི་རངས་བསྔགས་བརྗོད་དང་ཐུགས་རྗེ་ཆེ་ཞུས་གནང་ཡོད་འདུག
དེ་བཞིན་ཚོགས་འདུའི་ཐོག་མ་འོངས་པའི་ལས་འཆར་སྐོར་གྲོས་བསྡུར་གནང་རྗེས། མང་མོས་ཐོག་རྒྱ་ནག་དམར་གཞུང་ལ་ཞུ་འབོད་དོན་ཚན་གསུམ་དང་། ཉི་ཧོང་གྲོས་ཚོགས་དང་གཞུང་ལ་ཞུ་འབོད་དོན་ཚན་གསུམ་བཏོན་ཡོད་པ་གཤམ་གསལ། 
རྒྱ་ནག་དམར་གཞུང་ལ། དང་པོ། བོད་ཕྲུག་རྣམས་མི་སེར་སྤེལ་ཡུལ་གྱི་གཏན་འཇགས་སློབ་གྲྭར་བཙན་འཇུག་བྱ་རྒྱུ་འཚམས་འཇོགས་དང་བོད་མི་རྣམས་ལ་བོད་ཀྱི་ཤེས་ཡོན་སློབ་གསོ་སྦྱོང་བའི་ཐོབ་ཐང་སྤྲོད་དགོས་པ། གཉིས་པ། བོད་ནང་ཆོས་དད་རང་དབང་དང་འགྲོ་བ་མིའི་ཐོབ་ཐང་རྡོག་རོལ་གཏོང་བ་འཚམས་འཇོགས་བྱེད་དགོས་པ་དང་བོད་མི་རྣམས་ལ་གཞི་རྩའི་ཐོབ་ཐང་སྤྲོད་དགོས་པ། གསུམ་པ། བོད་བརྒྱུད་ནང་བསྟན་གྱི་སྲོལ་རྒྱུན་རིག་གཞུང་ལ་ཐེ་བྱུས་བྱེད་པ་དང་། ༸གོང་ས་མཆོག་གི་ཡང་སྲིད་ངོས་འཛིན་ཐོག་བདག་དབང་ཡོད་སྐོར་བརྗོད་པ་རྣམས་འཚམས་འཇོགས་བྱེད་དགོས་པ། དེ་བཞིན་ཉི་ཧོང་བོད་དོན་རྒྱབ་སྐྱོར་ཚོགས་པའི་ཚོགས་མི་དང་སྐུ་ཚབ་རྣམས་ནས་རྒྱ་ནག་དམར་གཞུང་གི་ངོས་འཛིན་བྱེད་པའི་བླ་མ་དང་༸གོང་ས་མཆོག་གི་ཡང་སྲིད་ལ་མཐའ་གཅིག་ཏུ་ངོས་ལེན་མེད་པ། 

ཉི་ཧོང་གི་གྲོས་ཚོགས་དང་གཞུང་ལ་འབོད་སྐུལ། དང་པོ། རྒྱ་ནག་གཞུང་ནས་གོང་གི་དོན་ཚན་གསུམ་པོར་ལག་བསྟར་དགོས་པའི་འབོད་སྐུལ་གྱི་བསྒྲགས་གཏམ་སྤེལ་དགོས་པ། གཉིས་པ། རྒྱ་ནག་དམར་ཤོག་གཞུང་གིས་བོད་དང་ས་ཁུལ་གཞན་དུ་འགྲོ་བ་མིའི་ཐོབ་ཐང་དང་ཆོས་དད་རང་དབང་ལ་རྡོག་རོལ་གཏོང་བཞིན་པར་ལྟ་ཞིབ་ཆེད་འགྲོ་བ་མིའི་ཐོབ་ཐང་གི་འབྲེལ་མཐུད་པའི་ཚན་པ་བསྐོ་བཞག་གནང་དགོས་པ། གསུམ་པ། རྒྱ་གཞུང་ནས་༸གོང་ས་མཆོག་གི་ཡང་སྲིད་ངོས་འཛིན་ཐོག་ཐེ་བྱུས་བྱེད་པར་སྐྱོན་བརྗོད་ཀྱིས་བསྒྲགས་གཏམ་ཤུགས་ཆེ་སྤེལ་དགོས་པའི་འབོད་སྐུལ་ཞུས་ཡོད་འདུག

དེ་བཞིན་ཚོགས་མི་རྣམས་ལ་གོང་གསལ་དོན་ཚན་དེ་དག་ཉི་ཧོང་གི་གཞུང་དང་། དབུས་དང་ས་གནས་གྲོས་ཚོགས། ཁྲིམས་རྩོད་པ། འགྲོ་བ་མིའི་ཐོབ་ཐང་རྒྱབ་སྐྱོར་བ་བཅས་ལ་སྙན་སེང་ཞུས་དགོས་པའི་རེ་སྐུལ་ཞུས་ཡོད་འདུག

གསར་འགོད་པ། བསོད་ནམས་ཕུན་ཚོགས།