རྒྱ་གར་གྱི་བུད་མེད་རྩོམ་པ་པོ་ཞིག་ལ་རྒྱལ་སྤྱིའི་བྱ་དགའ་ཆེན་པོ་ཞིག་ཐོབ་འདུག
ཧིན་རྡི་སྐད་ཡིག་ཐོག་ནས་འབྲི་མཁན་བུད་མེད་ཀྱི་རྩོམ་པ་པོ་ཞིག་ལ། དབྱིན་ཡུལ་གྱི་སྐད་གྲགས་ཆེ་བའི་རྒྱལ་སྤྱིའི་རྩོམ་ཡིག་བྱ་དགའ་ཞིག་ཐོབ་འདུག་པ་དང་། ད་བར་ཧིན་རྡི་སྐད་ཡིག་གི་རྩོམ་པ་པོ་ཞིག་ལ་བྱ་དགའ་དེ་ཐོབ་པ་ཐེངས་དང་པོ་ཆགས་འདུག
ཟླ་༥ པའི་ཚེས་༢༧ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། འདི་ལོའི་དབྱིན་ཡུལ་གྱི་རྒྱལ་སྤྱིའི་སྒྲུང་དེབ་བྱ་དགའ་(the International Booker Prize) དེ། རང་ལོ་༦༤ ཡིན་པའི་རྒྱ་གར་གྱི་བུད་མེད་རྩོམ་པ་པོ་གྷི་ཏ་ཨན་ཇེ་ལི་ཤི་རཱི་(Geetanjali Shree) ཡིས་ཧིན་རྡི་སྐད་ཡིག་ཐོག་ནས་བྲིས་པའི་སྒྲུང་དེབ་བྱེ་མའི་བང་སོ་(Tomb of Sand ) ལ་ཐོབ་འདུག
དེ་ཡང་རྒྱལ་སྤྱིའི་སྒྲུང་དེབ་བྱ་དགའ་དེ་ནི་སྐད་ཡིག་གཞན་ཞིག་ཐོག་ནས་བྲིས་པའི་སྒྲུང་དེབ་གཅིག་དབྱིན་སྐད་ཐོག་བསྒྱུར་ནས། དབྱིན་ཡུལ་ལམ་ཨར་ལེན་ཌ་ནང་དུ་པར་སྐྲུན་ཞུས་པ་ཞིག་དགོས་ཀྱི་ཡོད་འདུག་པ་དང་། ཐེངས་འདིར་སྒྲུང་དེབ་འདི་རིགས་ཁྲོད་རྩེ་ཕུད་༦ འདེམས་སྒྲུག་བྱས་འདུག་པ་དང་། མཐའ་མའི་འདེམས་སྒྲུག་སྐབས་སུ་ལྕམ་གྷི་ཏ་ཨན་ཇེ་ལི་ལ་རྒྱལ་ཁ་ཐོབ་ཡོད་པ་རེད།
བྱ་དགའ་དེར་དངུལ་གྱི་རྔན་པ་དབྱིན་སྒོར་ཁྲི་ལྔ་ཡོད་འདུག་པ་དང་། རྔན་པ་དེ་རྩོམ་པ་པོ་དང་ཡིག་སྒྱུར་བ་གཉིས་བར་བགོ་བཤའ་རྒྱག་དགོས་ཀྱི་ཡོད་འདུག
ལྕམ་ཁོང་གི་སྒྲུང་དེབ་དེ་ཧིན་རྡི་སྐད་ཡིག་ཐོག་ནས་ཕྱི་ལོ་༢༠༡༨ ལོར་པར་སྐྲུན་བྱས་ཡོད་འདུག་པ་དང་། སྒྲུང་ནང་གི་བརྗོད་བྱ་གཙོ་བོ་རྒྱ་གར་དང་པ་ཀི་སེ་ཐན་གཉིས་ཁ་བྲལ་སོང་བའི་ལོ་རྒྱུས་དང་སྦྲགས་ནས། ཁྱིམ་ཚང་ཞིག་གི་ལོ་རྒྱུས་ཡིན་འདུག་པ་དང་། སྤྱིར་བཏང་སྒྲུང་ནང་དུ་མི་སྣ་མང་པོ་ཞིག་གི་ལོ་རྒྱུས་ཡོད་འདུག་ཀྱང་། མི་སྣ་གཙོ་བོ་ནི་ཁྱོ་ག་གྲོངས་སོང་བའི་རྨོ་རྨོ་ཞིག་ཡིན་པ་རེད་འདུག
རྩོམ་པ་པོ་ཁོང་གིས་ད་བར་རྒྱལ་སྤྱིའི་བྱ་དགའ་ཆེན་པོ་དེ་འདྲ་ཞིག་ཐོབ་པའི་རེ་བ་བྱས་མྱོང་མེད་པ་དང་། ཆེ་མཐོང་དེ་འདྲ་ཆེན་པོ་ཐོབ་པར་དགའ་སྤོབས་ཆེན་པོ་སྐྱེས་ཡོད་ཁར། ཧིན་རྡི་སྐད་ཡིག་གི་རྩོམ་པ་པོ་ཞིག་ལ་བྱ་དགའ་དེ་ཐོབ་མཁན་ཐོག་མར་ཆགས་པར་དགའ་པོ་བྱུང་བ། དེ་བཞིན་ཁོང་ལས་གཞན་པའི་ལྷོ་ཨེ་ཤི་ཡའི་སྐད་ཡིག་ཁག་གི་ཐོག་ནས་བྲིས་པའི་རྩོམ་རིགས་ཕྱུག་པོ་མང་པོ་ཡོད་པས། གལ་ཏེ་རྩོམ་རིགས་དེ་དག་འབྲི་མཁན་གྱི་རྩོམ་པ་པོ་རྣམས་རྒྱལ་སྤྱིའི་ནང་ངོས་འཛིན་ཐོབ་ཚེ། རྒྱལ་སྤྱིའི་རྩོམ་རིག་ཕྱུག་ཏུ་འགྲོ་རྒྱུ་ཡིན་སྐོར་བརྗོད་འདུག
ཁོང་གི་སྒྲུང་དེབ་དེར་བྱ་དགའ་དེའི་ཟུར་དཔང་ཚོས་བསྟོད་བསྔགས་ཆེན་པོ་ཐོབ་ཡོད་ཁར། ཟུར་དཔང་གཙོ་བོ་དེས་ད་བར་སེམས་ཚོར་དང་སྤྲོ་བ་ཆེན་པོ་ལྡན་པའི་སྒྲུང་དེབ་འདི་འདྲ་བཀླགས་མྱོང་མེད་སྐོར་བརྗོད་འདུག
རྩོམ་པ་པོ་ཁོང་གིས་ད་བར་སྒྲུང་ཐུང་ཕྱོགས་སྒྲིག་གི་དེབ་ཁག་ཅིག་དང་། སྒྲུང་རིང་ཅན་གྱི་སྒྲུང་དེབ་གསུམ་པར་སྐྲུན་ཞུས་ཡོད་པ་དང་། ཐེངས་འདིར་བྱ་དགའ་ཐོབ་པའི་སྒྲུང་དེ་ནི་དབྱིན་ཡུལ་དུ་པར་སྐྲུན་ཞུས་པའི་དེབ་ཐོག་མ་དེ་ཡིན་འདུག །
གསར་འགོད་པ་སྐལ་བཟང་དོན་གྲུབ།
