རྒྱལ་བའི་བཀའ་དྲིན་རྗེས་དྲན་གྱི་དམིགས་བསལ་ཆེད་དེབ་དབུ་འབྱེད།
ཟླ་འདིའི་ཚེས་༢༢ ཉིན་དྷ་ས་བོད་ཀྱི་དཔེ་མཛོད་ཁང་དུ་ཁམས་པའི་སྨྱུག་ཚོགས་ཀྱིས་པར་སྐྲུན་འགྲེམས་སྤེལ་བྱས་པའི་༧རྒྱལ་བའི་བཀའ་དྲིན་རྗེས་དྲན་གྱི་དམིགས་བསལ་ཆེད་དེབ་དབུ་འབྱེད་ཀྱི་མཛད་སྒོ་ཞིག་འཚོགས་སོང་།
ཆེད་དེབ་དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་དང་། དམིགས་བསལ་སྐུ་མགྲོན་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས། མདོ་ཁམས་ཆུ་བཞི་སྒང་དྲུག་གི་ཚོགས་གཙོ་ཨ་པོ་དགའ་སྐྱིད་བཅས་ཕེབས་ཡོད་པ་རེད། སྨྱུག་ཚོགས་ཀྱི་ཚོགས་མི་འོད་ཀྱི་ལག་པས་མཛད་སྒོ་གཙོ་སྐྱོང་འོག སྨྱུག་ཚོགས་ཀྱི་ཚོགས་གཙོ་མཁན་པོ་ཀ་བྲག་དངོས་གྲུབ་ཀྱིས་སྨྱུག་ཚོགས་ཀྱི་བྱུང་རིམ་དང་བཀའ་དྲིན་རྗེས་དྲན་གྱི་ཆེད་དེབ་ངོ་སྤྲོད་ཀྱི་གསུང་བཤད་གནང་སོང་། ཆོས་རིག་བཀའ་བློན་གྱིས་བཀའ་དྲིན་རྗེས་དྲན་གྱི་ཆེད་དེབ་དེའི་ནང་༧གོང་ས་མཆོག་དང་བོད་མིའི་བར་གྱི་སྔ་ཕྱི་བར་གསུམ་གྱི་དམིགས་བསལ་འབྲེལ་བའི་སྐོར་ཞིབ་ཕྲ་འཁོད་ཡོད་པ་ཡག་པོ་བྱུང་ཡོད་སྐོར་དང་། བཀའ་དྲིན་དྲན་པ་ཙམ་མ་ཡིན་པར་བཀའ་དྲིན་གསབ་ཐབས་དགོས་པ་གལ་ཆེན་ཡིན་སྐོར་གསུངས་སོང་། སྤྱི་འཐུས་ཚོགས་གཙོས་དཔེ་དེབ་པར་སྐུན་སྐབས་ཞུ་དག་འཐུས་ཚང་བྱེད་རྒྱུ་གལ་ཆེན་ཡིན་སྐོར་དང་། ༧གོང་ས་མཆོག་གི་བཀའ་སློབ་གནང་བ་ཁག་ལ་སློབ་གཉེར་དང་ལག་བསྟར་བྱེད་དགོས་སྐོར་དང་། ༧གོང་ས་མཆོག་ཐུགས་ཕམ་མ་ཡོང་བྱེད་རྒྱུ་གལ་ཆེན་ཡིན་སྐོར་གསུངས་སོང་།
ཆེད་དེབ་དེའི་ནང་རྒྱལ་བའི་མཛད་ཆེན་བཞིས་མཚོན་སྐུ་གསུང་ཐུགས་བསྐྱེད་སྐོར་ལ་དཔྱད་རྩོམ་དང་སྙན་ངག བསྒྱུར་རྩོམ་བཅས་རྩོམ་པ་པོ་༤༠ ལྷག་གི་རྩོམ་ཡིག་བྲིས་ཡོད་པ་དང་། སྨྱུག་ཚོགས་དེ་དྲ་ཚོམས་ཀྱི་ཚོགས་པ་ཞིག་ཡིན་པ་དང་ཆེད་དེབ་འདོན་ཐེངས་བཞི་པ་དེ་ཡིན་པ་རེད།།
གསར་འགོད་པ་ཆོས་ཉིད་འོད་ཟེར།
