ཤེས་རིག་བཀའ་བློན་གྱིས་ཕ་མའི་དུས་དྲན་ཉིན་མོར་གསུང་འཕྲིན་གནང་།
ལོ་ལྟར་ཕྱི་ཟླ་༣ ཚེས་༥ ཉིན་༧གོང་ས་མཆོག་གི་རྒྱལ་ཡུམ་ཆེན་མོ་བདེ་སྐྱིད་ཚེ་རིང་མཆོག་གི་འཁྲུངས་ཚེས་དང་བསྟུན། ཉིན་དེ་ཕ་མའི་དུས་དྲན་གྱི་ཉིན་མོ་ཞེས་སྲུང་བརྩི་ཞུ་བཞིན་ཡོད་པ་ལྟར། དེ་རིང་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མས་ཕ་མ་ཡོངས་ལ་འཚམས་འདྲི་དང་སྦྲགས། བུ་ཕྲུག་གསོ་སྐྱོང་དང་བོད་ཀྱི་སྐད་ཡིག་གལ་གནད་སྐོར་ལ་ལམ་སྟོན་གནང་འདུག
བོད་མིའི་སྒྲིག་འཛུགས་ཀྱི་དྲྭ་ཐོག་ཏུ་གནས་ཚུལ་སྤེལ་གསལ་ལྟར་ན། ཤེས་རིག་བཀའ་བློན་གྱི་གསུང་འཕྲིན་ནང་༧གོང་ས་མཆོག་གི་བཀའ་དྲིན་རྗེས་དྲན་དང་འབྲེལ། ཁོང་གིས་བོད་མི་སྤྱི་དང་། ལྷག་པར་བུ་ཕྲུག་གི་མི་ཚེའི་མདུན་ལམ་དང་ཤེས་ཡོན་སློབ་གསོའི་མཐུན་རྐྱེན་སྦྱོར་སྤྲོད་ཐུབ་པ་སོགས་ཀྱི་འབྱུང་རྩ་གཙོ་བོ་ནི་༧གོང་ས་མཆོག་ནས་སྐུ་ན་ཕྲ་སྒང་ནས་བོད་དང་བོད་མིའི་རྩ་དོན་ཆེད་དུ་སྐུ་ངལ་ལ་གདོང་ལེན་མི་ཉུང་བ་ཞིག་བསྐྱོན་པའི་འབྲས་བུ་ལ་བརྟེན་ནས་བྱུང་བ་ཞིག་ཡིན་པས། བཀའ་དྲིན་རྗེས་དྲན་ཞུ་དགོས་པ་མ་ཟད། རང་གི་བུ་ཕྲུག་ལའང་༸གོང་ས་མཆོག་གི་བཀའ་དྲིན་ཡིན་པ་ངེས་པར་གསུངས་དགོས་ཞེས་ནན་བཤད་གནང་འདུག
བུ་ཕྲུག་གསོ་སྐྱོང་དང་འབྲེལ་ཤེས་རིག་བཀའ་བློན་གྱིས། ཕྲུ་གུའི་དགོས་མཁོར་དཔག་པའི་མཐུན་རྐྱེན་མཁོ་སྤྲོད་གནང་དགོས་པ་ལས་བག་མེད་ལོངས་སྤྱོད་ལྟ་བུའི་གོམས་གཤིས་ངན་པ་མི་འཇགས་པ་གཙོ་འདོན་གནང་དགོས། ཕྲུ་གུ་ནང་ཁུལ་དུ་བརྩེ་སེམས་དང་། འཆམ་མཐུན། བརྩི་བཀུར། བྱམས་སྐྱོང་གི་སྒོ་ནས་མཉམ་གནས་བྱ་རྒྱུ་ལས། གཞན་ལ་བརྙས་བཅོས་སམ་ཐུབ་ཚོད་གཏོང་རྒྱུའི་རིགས་ནམ་ཡང་མི་འབྱུང་སླད་ཕྲུ་གུ་སོ་སོར་གོ་བསྐོན་སློབ་གསོ་གནང་གལ། དགེ་ལས་ཕ་མ་ཡོངས་ནས་གཤིས་སྤྱོད་རྩུབ་པོ་དང་། གཤིས་སྤྱོད་ངན་པའི་ཕྲུ་གུ་གཉིས་དབར་ལེགས་པར་དབྱེ་འབྱེད་དང་།རྒྱུས་མངའ་གཏིང་ཟབ་ལྡན་པའི་ཐོག་ནས་སློབ་སྟོན་རམ་འདེགས་གནང་རྒྱུ། ཕྲུ་གུར་བསླབ་བྱ་ཁོ་ན་བརྒྱབ་པ་ལས་ཕ་མ་རང་ཉིད་ནས་སྒོ་གསུམ་གྱི་བྱ་སྤྱོད་བཟང་པོ་ཞིག་ལག་བསྟར་གྱིས་མིག་དཔེ་སྟོན་ཐུབ་ཚེ་འབྲས་བུ་གནད་དུ་སྨིན་པ་ཞིག་ཡོང་ངེས། ཕྲུ་གུའི་རྒྱུད་ལ་ཆུང་བྱིས་པའི་དུས་ནས་དཔེ་ཀློག་གི་གོམས་གཤིས་བཟང་པོ་འཇགས་ཐབས་བཟོ་གལ། ཕྲུ་གུ་ཚོའི་ཕྱོགས་ཡོངས་ཀྱི་འཚར་ལོངས་དང༌། འཕྲལ་ཕུགས་ཀྱི་བསམ་བློ་གོང་འཕེལ་གཏོང་ཆེད་ཕ་མ་དང་། དགེ་རྒན། སློབ་གྲྭའི་འཛིན་སྐྱོང་བཅས་མཉམ་རུབ་ཀྱི་ཐོག་ནས་ལས་དོན་ལ་འཇུག་རྒྱུར་གལ་འགངས་ཆེ་ཞེས་ལམ་སྟོན་གནང་འདུག
བོད་ཀྱི་སྐད་ཡིག་སྲུང་སྐྱོབ་དང་འབྲེལ། ཤེས་རིག་བཀའ་བློན་མཆོག་གིས། བོད་ཀྱི་སྲོལ་རྒྱུན་རིག་གནས་སྤྱི་དང་། བྱེ་བྲག་ཏུ་ནང་པ་སངས་རྒྱས་པའི་བཀའ་བསྟན་ཡོངས་སུ་རྫོགས་པ་འགྲེལ་བརྗོད་ཐུབ་མཁན་ནི་བོད་ཀྱི་ཐུན་མོང་མ་ཡིན་པའི་སྐད་ཡིག་ཁོ་ན་ཡིན་པས། རང་རེའི་ན་གཞོན་གཙོ་བོར་གྱུར་པའི་བོད་མི་སེར་སྐྱ་བགྲེས་གཞོན་མཆོག་དམན་ཀུན་གྱིས་སྦྱངས་བརྩོན་ལྷོད་མེད་གནང་སྐྱོང་ཡོང་བ་མ་ཟད། ཉིན་རེའི་འཚོ་བའི་ནང་ཕན་ཚུན་བཀའ་མོལ་གནང་སྐབས་སྐད་ཡིག་གཞན་གྱིས་བསྲེ་ལྷད་མི་ཞུགས་པར་བོད་སྐད་གཙང་མ་རྒྱག་རྒྱུར་འབད་བརྩོན་གནང་རོགས་ཞུ་རྒྱུ་ཡིན་ཞེས་རེ་སྐུལ་ནན་པོ་ཞུས་འདུག །
གསར་འགོད་པ། བློ་བཟང་རྒྱ་མཚོ།
