སྤྲུལ་སྐུ་ཧཱུྃ་ཀར་རྡོ་རྗེ་འདས་གྲོངས་ཕྱིན་པའི་གནས་ཚུལ་ངོ་མ་ཕྱིར་བསྒྲགས་དགོས་པའི་འབོད་སྐུལ་ཞུས་འདུག
མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཆེད་ལས་མཁས་པ་བཞིས་ཝེ་ཏི་ནམ་གཞུང་ལ་སྤྲུལ་སྐུ་ཧཱུྃ་ཀར་རྡོ་རྗེ་མཆོག་འདས་གྲོངས་སུ་ཕྱིན་པའི་གནས་ཚུལ་ངོ་མ་གང་ཡིན་ཕྱིར་བསྒྲགས་དགོས་པའི་འབོད་སྐུལ་ཞུས་ཡོད་འདུག
ཕྱི་ལོ་༢༠༢༥ ཟླ་༡༠ ཚེས་༩ ཉིན། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གནས་ཚུལ་སྤེལ་གསལ་ལྟར་ན། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཆེད་ལས་མཁས་པ་བཞི་ཡིས་ཕྱི་ལོ་༢༠༢༥ ཟླ་༨ པའི་ནང་། མཉམ་འབྲེལ་གསལ་བསྒྲགས་ཤིག་སྤེལ་ནས་ཝེ་ཏི་ནམ་གཞུང་ལ་སྤྲུལ་སྐུ་ཧཱུྃ་ཀར་རྡོ་རྗེ་འཛིན་བཟུང་དང་གར་སོང་ཆ་མེད་དུ་གྱུར་པ། དེའི་རྗེས་བཀག་ཉར་འོག་ནས་འདས་གྲོངས་སུ་ཕྱིན་པར་གསལ་བཤད་དང་འགན་འཁུར་དགོས་པའི་དགོས་འདུན་བཏོན་ཡོད་འདུག
གསལ་བསྒྲགས་ཀྱི་ནང་དུ། “སྤྲུལ་སྐུ་ཧཱུྃ་ཀར་རྡོ་རྗེ་མཆོག་ཕྱི་ལོ་༢༠༢༥ ཟླ་༣ ཚེས་༢༥ ཉིན། ཧུའུ་ཆི་མིང་གྲོང་ཁྱེར་ནས་འཇུ་བཟུང་བྱས། ཉིན་བཞིའི་རིང་ཁེར་རྐྱང་བཀག་ཉར་བྱས་རྗེས་འདས་གྲོངས་སོང་བ་དང་། ཁོང་ལ་སྙིང་ནད་མེད་ཀྱང་ཝེ་ཏི་ནམ་གཞུང་གིས་སྙིང་ནད་ཀྱིས་གྲོངས་སོང་འདུག་ཅེས་འགྲེལ་བརྗོད་བྱས་པ་མ་ཟད། སྐུ་ཕུང་ཡང་ནང་མིའི་མོས་མཐུན་མེད་པ་དང་རང་དབང་ཅན་གྱི་ཞིབ་བཤེར་སོགས་གང་ཡང་མ་བྱས་པར་མེར་སྲེག་བཏང་ཡོད།
ཆེད་ལས་མཁས་པས་ནན་བརྗོད་བྱས་དོན། རྒྱལ་ཁབ་སུ་ཞིག་ཡིན་རུང་ཁྲིམས་མཐུན་གྱིས་མི་སྣ་བཀག་ཉར་བྱེད་ཀྱི་ཡོད་ཀྱང་། ཁོ་ཚོའི་བདེ་འཇགས་ལ་འགན་འཁུར་རྒྱུ་ནི་དེ་ལས་ཀྱང་གལ་ཆེ་བ་ཡོད། བཀག་ཉར་འོག་འདས་གྲོངས་སོང་བའི་མི་སྣར་གང་མགྱོགས་ཕན་ནུས་ལྡན་པ་དང་ཕྱོགས་ལྷུང་མེད་པའི་སྒོ་ནས་ཞིབ་བཤེར་མ་ཐུབ་པ་དེས། <<སྤྱི་དམངས་དང་ཆབ་སྲིད་ཁེ་དབང་གི་རྒྱལ་སྤྱིའི་སྤྱི་ཆིངས་>>ཀྱི་དོན་ཚན་༦ པའི་ནང་མིའི་ཚེ་སྲོག་ཁེ་དབང་ལ་སྲུང་སྐྱོབ་དགོས་པའི་གཏན་འབེབས་དང་འགལ་ཡོད་པ་མ་ཟད། གར་སོང་ཆ་མེད་དུ་འགྲོ་བ་འགོག་ཐབས་དང་ཁྲིམས་མཐུན་གྱི་གོ་རིམ་རྒྱུན་འཁྱོངས་དགོས་པའི་རྩ་དོན་བཅས་དང་འགལ་ཡོད་ཅེས་དང་། ཁོ་ཚོས་ཝེ་ཏི་ནམ་གཞུང་ལ་གང་མགྱོགས་ཕྱི་གསལ་ནང་གསལ་གྱི་ལན་འདེབས་དགོས་པའི་གཤམ་གསལ་འབོད་སྐུལ་ཞུས་ཡོད་པ་སྟེ།
༡། སྤྲུལ་སྐུ་ཧཱུྃ་ཀར་དཀར་རྡོ་རྗེ་འཛིན་བཟུང་བྱེད་པའི་ཁྲིམས་ཐོག་གི་རྒྱུ་རྐྱེན་དང་། རྒྱ་ནག་གཞུང་དང་མཉམ་འབྲེལ་གྱིས་ཉེས་འཛུགས་བྱས་པའི་གནས་ཚུལ་གསལ་བསྒྲགས་བྱེད་དགོས།
༢། བཀག་ཉར་གྱི་གནས་སྟངས་དང་གནས་སྤོ། སྨན་བཅོས་བལྟ་སྐྱོང་དང་དེ་བཞིན་ཁོང་འདས་གྲོངས་སོང་བའི་ཞིབ་ཕྲའི་བརྒྱུད་རིམ་ཀྱི་གནས་ཚུལ་མཁོ་སྤྲོད་བྱེད་དགོས།
༣། སྐུ་ཕུང་ལ་བརྟག་དཔྱད་བྱས་པ་དེ་རྒྱལ་སྤྱིའི་ཚད་གཞི་དང་མཐུན་ཡོད་མེད་དང་། བརྟག་དཔྱད་ཀྱི་གྲུབ་འབྲས་ནང་མིར་གསལ་བཤད་བྱས་ཡོད་མེད་གསལ་པོ་བཟོ་དགོས།
༤། བརྟག་དཔྱད་དང་ཁྲིམས་བཤེར་གྱི་བྱ་ཐབས་གང་དག་སྤྱད་པའི་ཚིག་ཐོ་མཁོ་སྤྲོད་བྱེད་དགོས།
༥། ཕྱི་ལོ་༢༠༡༤ ལོ་ནས་བཟུང་ཝེ་ཏི་ནམ་གཞུང་གིས་བཀག་ཉར་གྱིས་འདས་གྲོངས་སོང་བའི་གྲངས་ཐོ་དང་གྱོད་དོན་གྱི་གནས་སྟངས་བཅས་རྒྱལ་ཚོགས་སུ་མཁོ་སྤྲོད་བྱེད་དགོས།
གཞུང་ཕྱོགས་ནས་ཡིད་ཆེས་འཕེར་བ་དང་ཁ་གསལ་གྱི་ལན་འདེམས་མ་བྱས་གོང་། ཆེད་མཁས་པ་ཚོས་བྱ་ཐབས་སྤྱད་དེ་བསྐྱར་དུ་གནས་ཚུལ་དེ་འདྲ་མི་ཐོན་པའི་འབོད་སྐུལ་ཞུས་ཡོད་པ་དང་། དེའི་ཁོངས་སུ་དཔང་རྟགས་ཡོད་ཚད་ཉར་ཚགས་དང་། ཁྱིམ་མིར་དགོས་ངེས་ཀྱི་ཐུགས་གསོ་དང་རང་དབང་གི་སྒོ་ནས་བལྟ་སྐུལ་འགན་སྲུང་དགོས་པའི་འབོད་སྐུལ་ཞུས་ཡོད་ཅེས་བཀོད་འདུག
དེ་བཞིན་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་མཉམ་འབྲེལ་རྒྱལ་ཚོགས་ཀྱི་ཆེད་མཁས་པ་དང་མཉམ་དུ་སྤྲུལ་སྐུ་ཧཱུྃ་ཀར་རྡོ་རྗེ་དང་བཀག་ཉར་འོག་ནས་ཚེ་སྲོག་ཤོར་བ་དང་གནོད་འཚེ་ཕོག་མཁན་ཚང་མར་ཕྱི་གསལ་ནང་གསལ་དང་རང་དབང་གི་སྒོ་ནས་བརྟག་དཔྱད་ཞིབ་འཇུག་དགོས་པའི་འབོད་སྐུལ་ཞུ་བཞིན་ཡོད་ཅེས་བཀོད་འདུག།།
གསར་འགོད་པ། བློ་བཟང་རྒྱ་མཚོ།
