སྲིད་སྐྱོང་སྤེན་པ་ཚེ་རིང་གིས་མ་སུ་རི་བོད་ཁྱིམ་དང་མ་སུ་རི་གཏན་སློབ་ཏུ་འཚམས་གཟིགས་གནང་།
ཟླ་འདིའི་ཚེས་༨ ཉིན་རྒྱབ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་མ་སུ་རི་བོད་ཁྱིམ་དུ་འཚམས་གཟིགས་གྲུབ་རྗེས། ཕྱི་ཚེས་༩ ཉིན་གྱི་སྔ་དྲོར་མ་སུ་རི་གཏན་སློབ་ཏུ་འཚམས་གཟིགས་གནང་བ་དང་། བོད་ཁྱིམ་བཞུགས་མོལ་ཚོགས་ཁང་ནང་བོད་ཁྱིམ་འཛིན་སྐྱོང་ཚོགས་མི་རྣམས་དང་ལྷན་དུ་སྲིད་སྐྱོང་གིས་སྤྱི་ཡོངས་ཀྱི་སློབ་གྲྭའི་གནས་བབ་སྐོར་དང་། ལྷག་པར་མ་སུ་རི་བོད་ཁྱིམ་གྱི་སློབ་ཕྲུག་ཚོས་རྒྱ་གར་རྒྱལ་ཡོངས་ཡིག་རྒྱུགས་ཁྲོད་གྲུབ་འབྲས་ལེགས་སོན་བླངས་པར་རྗེས་སུ་ཡི་རང་དང་། དེ་བཞིན་སློབ་གྲྭའི་དགེ་ལས་ཡོངས་ལ་བསྔགས་གནང་ཡོད་པ་རེད།
ཕྱི་ཚེས་༩ ཉིན་གྱི་སྔ་དྲོ་སྐྱོང་གིས་དབུས་བོད་སློབ་འཛིན་ཚོགས་ཁྱབ་ཁོངས་མ་སུ་རི་གཏན་སློབ་ཏུ་འཚམས་གཟིགས་བསྐྱངས་ནས་སློབ་སྤྱི་དང་རེག་ཊར་གྱིས་གཙོས་དགེ་ལས་ཡོངས་ལ་གསུང་བཤད་གནང་ཡོད་པ་དང་། མཛད་སྒོའི་མཐའ་མར་སློབ་སྤྱི་ཐག་གཅོད་ཚེ་རིང་ལགས་ཀྱིས་སློབ་གྲྭའི་ལོ་གཅིག་གི་ལས་བསྡོམས་སྙིང་བསྡུས་སྙན་སེང་ཞུས་རྗེས། སྲིད་སྐྱོང་གིས་གསུང་བཤད་གནང་སྐབས། བཀའ་ཤག་གི་ལས་འགན་གཙོ་བོ་ནི། དཀའ་ངལ་འོག་ཚུད་པའི་གཞིས་ལུས་བོད་མི་རྣམས་མྱུར་སྐྱོབ་དང་། ད་ལྟའི་བོད་ནང་གི་ཛ་དྲག་གནས་སྟངས་རྣམས་སེལ་ཐབས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་བཞེད་འོག་གཞིས་བྱེས་བོད་མི་ཚོའི་བཀའ་སྲུང་ཅི་སྒྲུབ་དང་། མགོན་པོ་གང་ཉིད་ཀྱིས་འདོན་གནང་མཛད་པའི་དབུ་མའི་ལམ་གྱི་སྲིད་བྱུས་ལ་བོད་མི་མང་ཚོགས་ཀྱིས་ཚད་མཐོའི་རྒྱབ་སྐྱོར་ཞུས་དང་ཞུ་མུས་ཡིན་པ་མ་ཟད། བོད་མི་མང་སྤྱི་འཐུས་ལྷན་ཚོགས་ཀྱིས་སྤྱི་མོས་ཐོག་གཏན་ལ་ཕབ་པའི་དབུ་མའི་ལམ་ལ་བརྟེན་ནས་རྒྱ་ནག་གཞུང་དང་ལྷན་དུ་འཚེ་མེད་ཞི་བའི་གྲོས་མོལ་བརྒྱུད་བོད་རྒྱ་གཉིས་སྨན་གྱི་ཐབས་ལམ་གཞི་རྩར་བཟུང་ནས་བོད་རྒྱའི་དཀའ་རྙོག་སེལ་རྒྱུ་དང་། དེར་དམིགས་ནས་ཕྱི་ལོ་༢༠༢༡ ཟླ་༨ ཚེས་༡༣ ཉིན་ནས་བཟུང་དེ་སྔ་ཡོད་བཞིན་པའི་བོད་རྒྱ་འབྲེལ་མོལ་ལས་དོན་ཚོགས་ཆུང་ལ་ཕྲན་བུ་བསྒྱུར་བཅོས་ཀྱིས་འབྲེལ་ཡོད་མཐོ་རིམ་ལས་བྱེད་ཁག་གཅིག་ལ་འགན་བསྐུར་བགྱིས་པའི་ཐབས་ཇུས་འཆར་འགོད་ཚོགས་ཆུང་ཞིག་གཏན་འཇགས་སུ་བཙུགས་ཡོད་སྐོར་གསུངས་འདུག
དེ་བཞིན་འཛིན་སྐྱོང་གི་ལས་འགན་གཙོ་བོ་གཞན་ཞིག་ནི། བཙན་བྱོལ་བོད་མི་རྣམས་ཀྱི་དཀའ་ངལ་སེལ་ཐབས་བྱེད་རྒྱུ་དང་། དམིགས་ཡུལ་དེ་ལག་བསྟར་དོན་འཁྱོལ་ཡོང་སླད་བོད་མིའི་སྒྲིག་འཛུགས་ཀྱི་ལས་དོན་ཁག་འཆར་གཞི་ཚད་ལྡན་བཟོ་རྒྱུ་དང་། ལག་བསྟར་ནུས་ཐོན་ཡོང་བར་གཞི་འཛིན་ས་དེ་བཙན་བྱོལ་བོད་མིའི་སྤྱི་ཡོངས་གནས་སྟངས་གསལ་པོར་རྟོགས་ཐུབ་དགོས་ཤིང་། དེ་ལྟར་ཡོང་བར་ཐོག་མར་བོད་མི་བཙན་བྱོལ་བའི་གྲངས་ཇི་ཡོད་ཤེས་དགོས་སྟབས། མི་འབོར་གྲངས་བཤེར་གྱི་ལས་གཞི་ཚད་ལྡན་ཞིག་འགོ་འཛུགས་གནང་ཟིན་ཡོད་སྐོར་གསུངས་འདུག
སྲིད་སྐྱོང་གིས་དབུས་བོད་སློབ་འཛིན་ཚོགས་ཀྱི་ཁྱབ་ཁོངས་སློབ་གྲྭ་ཁག་དྲུག་བོད་མིའི་སྒྲིག་འཛུགས་ཀྱིས་རྩིས་ལེན་གནང་རྒྱུའི་གནད་དོན་དང་། ལྷག་པར་གཏན་སློབ་ཁག་གི་དགེ་ལས་ཡོངས་ལ་ཐུགས་རྗེ་ལེགས་ཕུལ་ཞུས་པ་ཡོད་པ་རེད།
རྒྱ་གར་གྱི་བོད་སློབ་འཛིན་ཚོགས་ཀྱི་ཁྱབ་ཁོངས་འོག་གི་སློབ་གྲྭ་ཁག ཤེས་རིག་ལས་ཁུངས་ལ་རྩིས་སྤྲོད་གནང་བཞིན་པའི་སློབ་གྲྭ་ཁག་གི་རྒྱབ་ལྗོངས་ལ་གཟིགས་ཞིབ་གནང་སྐབས། སྲིད་སྐྱོང་གིས། བོད་སློབ་འཛིན་ཚོགས་ཀྱི་ཁྱབ་ཁོངས་སློབ་གྲྭ་ཁག་ཏུ་བོད་པའི་སློབ་ཕྲུག་གི་གྲངས་འབོར་ཉུང་དུ་ཕྱིན་པ་དེ་ནི་བློ་འཚབ་ཀྱི་གནས་སྟངས་ཤིག་ཏུ་གཟིགས་ཏེ། ད་རེས་རྩིས་སྤྲོད་ལྷག་འདས་ཡོད་པའི་སློབ་གྲྭ་དེ་དག་གི་གནས་སྟངས་དངོས་སུ་རྒྱུས་ལོན་གནང་སྟེ་བོད་པའི་སློབ་གྲྭ་ཁག་གི་སྤྱི་ཡོངས་གནས་བབ་ལ་འགྱུར་བ་དང་། ལྷག་པར་དུ་རྩིད་སྤྲོད་ལྷག་བསྡད་ཡོད་པའི་སློབ་གྲྭ་དེ་དག་རྩིས་སྤྲོད་རྩིས་ལེན་གནང་རྒྱུ་དེ་ནི་གཡོལ་ཐབས་མེད་པའི་ལས་དོན་གལ་ཆེ་ཞིག་ཡིན་སྐོར་གསུངས་ཡོད་པ་རེད།
རྒྱ་གར་དབུས་གཞུང་གིས་བོད་སློབ་འཛིན་ཚོགས་ཀྱི་ཁྱབ་ཁོངས་སློབ་གྲྭ་ཁག་རིམ་བཞིན་བོད་མིའི་སྒྲིག་འཛུགས་ལ་རྩིས་སྤྲོད་གནང་གཏན་ཁེལ་བ་ནས་བཟུང་ཕྱི་ལོ་༢༠༡༣ ལོ་ནས་ད་བར་སློབ་གྲྭ་ཁག་༥༥ རྩིས་སྤྲོད་གནང་ཟིན་པ་དང་ད་ལྟའི་ཆར་སིམ་ལ་དང་ཧར་པར་སྤུར། མ་སུ་རི། རྡོ་རྗེ་གླིང་། ཀ་སྦུག དེ་བཞིན་ཌལ་ཧོར་བཅས་གཏན་སློབ་ཁག་དྲུག་གི་རྩིས་སྤྲོད་རྩིས་ལེན་གྱི་ལས་རིམ་འགྲོ་བཞིན་ཡོད་པ་རེད།།
གསར་འགོད་པ་ཆོས་ཉིད་འོད་ཟེར།
