ཨ་མ་རྗེ་བཙུན་པདྨ་ལ་བཀའ་དྲིན་རྗེས་དྲན་གྱི་གཟེངས་རྟགས་ཕུལ།
ཟླ་འདིའི་ཚེས་༢༦ ཉིན་སུད་སི་ས་གནས་བོད་རིགས་ཚོགས་ཆུང་ས་གནས་ཤྭ་ཧྥའོ་སེན་མི་མང་ནས་ཨ་མ་རྗེ་བཙུན་པདྨ་ལ་སྐུ་ཚེ་ཧྲིལ་པོ་བོད་རིགས་མི་རིགས་ཀྱི་ཆེད་དུ་སྐུ་ངལ་འཛེམས་མེད་གནང་བར་ཐུགས་རྗེ་ཞེས་བཀའ་དྲིན་རྗེས་དྲན་གྱི་གཟེངས་རྟགས་ཤིག་ཕུལ་ཡོད་པ་རེད།
ས་གནས་ནས་འབྲེལ་ཡོད་ཀྱིས་གནས་ཚུལ་ངོ་སྤྲོད་གནང་བ་ལྟར་ན། གཟེངས་རྟགས་མཛད་སྒོ་དེའི་ཐོག་ཡུ་རོབ་སྤྱི་འཐུས་ཟམ་གདོང་བྱམས་པ་དང་། དོན་གཅོད་འཆི་མེད་རིག་འཛིན། ཨ་མ་རྗེ་བཙུན་པདྨ། བོད་རིགས་མི་མང་ཚོགས་གཙོ་མཚམས་མདའ་ནོར་བུ་སོགས་གནད་ཡོད་མི་སྣ་དང་། ས་གནས་རྒྱུན་ལས་དང་ཚོགས་མི་རྣམས་མཉམ་འཛོམས་གནང་ཡོད་པ་རེད།
མཛད་སྒོའི་སྟེང་ཐོག་མ་ས་གནས་ཤྭ་ཧྥའོ་སེན་ཚོགས་གཙོ་དང་བོད་རིགས་མི་མང་འཐུས་མི་གཅིག་ལྕོག་རྒྱལ་རྡོ་ཚང་ཡོན་ཏན་རིན་ཆེན་གྱིས་གཟེངས་རྟགས་འབུལ་དགོས་པའི་དོན་གནད་དང་འབྲེལ་བའི་ལོ་རྒྱུས་བརྒྱུད་རིམ་བཅས་ངོ་སྤྲོད་གནང་བའི་རྗེས་སུ། སུད་སི་སྐུ་ཚབ་དོན་གཅོད་འཆི་མེད་རིག་འཛིན་གྱིས་༧གོང་ས་མཆོག་གི་རྣམ་ཐར་མཛད་འཕྲིན་སྐོར་དང་། སྐུའི་གཅུང་མོ་ཨ་མ་རྗེ་བཙུན་པདྨ་མཆོག་ནས་བཙན་བྱོལ་ནང་ལོ་མང་རིང་བོད་ཕྲུག་སྟོང་ཕྲག་མང་པོ་བཀའ་དྲིན་གྱིས་བསྐྱངས་སྐོར་གྱི་གསུང་བཤད་གནང་ཡོད་པ་རེད།
དེ་ནས་སུད་སི་གནས་བཞུགས་ཡུ་རོབ་སྤྱི་འཐུས་ཟམ་གདོམ་བྱམས་པས་བཙན་བྱོལ་དབུས་བོད་མིའི་སྒྲིག་འཛུགས་སྲིད་ལུགས་ལམ་ཕྱོགས་དང་བོད་མིའི་བཟང་སྤྱོད་ཡར་རྒྱས་དགོས་ཚུལ་བཅས་ཀྱི་སྐོར་གསུང་བཤད་གནང་།
དེ་མཚམས་སུ་མཛད་སྒོ་དངོས་གཞིའི་དམིགས་ཡུལ་བཞིན་ས་གནས་ཤྭ་ཧའོ་སེན་ཚོགས་གཙོ་དང་རྒྱུན་ལས་བཅས་ནས་ཨ་མ་རྗེ་བཙུན་པདྨ་ལ་ཐུགས་རྗེ་ཆེ་ཞེས་པའི་བཀའ་དྲིན་རྗེས་དྲན་གྱི་གཟེངས་རྟགས་ཕུལ་རྗེས། གདན་ཞུས་སྐུ་མགྲོན་གཙོ་བོ་ཨ་མ་རྗེ་བཙུན་པདྨས། བོད་མི་རྣམས་ནས་༧གོང་ས་མཆོག་གི་བཀའ་དྲིན་རྗེས་སུ་དྲན་པའི་སྒོ་ནས་ཡ་རབས་བཟང་སྤྱོད་གོང་འཕེལ་གཏོང་བ་དང་། ཡུལ་ཁྲིམས་སྲུང་དགོས་པ་སོགས་མི་རབས་གསར་པ་རྣམས་ལ་བླང་དོར་ལམ་སྟོན་གནང་།
མཇུག་ཏུ་སུད་སི་བོད་རིགས་མི་མང་ཚོགས་གཙོ་མཚམས་མདའ་ནོར་བུ་མཆོག་ནས་སུད་སི་རྒྱལ་ཁོངས་སུ་ཡོད་པའི་བོད་རིགས་མི་མང་སྒྲིག་འཛུགས་ཀྱི་བྱུང་རབས་ལོ་རྒྱུས་ངོ་སྤྲོད་དང་། སྐུའི་གཅུང་མོ་མཆོག་གི་སྐུ་ངལ་སྐྱོན་བཞིན་པ་བཅས་ཀྱི་ཐད་ལ་འགྲེལ་བཤད་གནང་བ་དང་འབྲེལ། ས་གནས་ཤྭ་ཧྥའོ་སེན་ཚོགས་གཙོ་རྒྱ་རྡོ་ཚང་ཡོན་ཏན་རིན་ཆེན་གྱིས་གདན་ཞུས་སྐུ་མགྲོན་གཙོ་བོ་ཨ་མ་རྗེ་བཙུན་པདྨ་མཆོག་བཅས་ལ་ཐུགས་རྗེ་ཆེས་གཏམ་བཤད་གནང་རྗེས་མཛད་སྒོ་གྲོལ་ཡོད་པ་རེད།།
གསར་འགོད་པ་ཆོས་ཉིད་འོད་ཟེར།
