ཨི་རན་གྱིས་རྒྱལ་ཁབ་བརྒྱད་ལ་གཏོར་རྒོལ་བྱས་ནས་རྒོལ་ལས་བསློགས།
ཕྱི་ལོ་༢༠༢༦ ཟླ་༢ ཚེས་༢༨ ཉིན། ཨ་རི་དང་ཨི་སི་རེལ་གཉིས་ཀྱིས་མཉམ་འབྲེལ་ཐོག་ཨི་རན་གྱི་གྲོང་ཁྱེར་འགའ་ཤས་སུ་ལོ་རྒྱུས་ནང་བྱུང་མ་མྱོང་བའི་གཞི་རྒྱ་ཆེ་བའི་གནམ་དམག་གིས་གཏོར་རྒོལ་ཞིག་བཏང་བ་དེས་འཛམ་གླིང་ཡོངས་ལ་གཡོ་འགུལ་ཐེབས་ཡོད་པ་དང་། ཨ་རིའི་རྒྱལ་སྲུང་ལས་ཁུངས་ཀྱིས་དམག་དོན་ལས་འགུལ་འདིར་ཁྲོ་བ་ཆེན་པོ་ཞེས་དང་། ཨི་སི་རེལ་གྱིས་ལས་འགུལ་དེར་སེང་གེའི་ངར་སྒྲ་ཞེས་མིང་བཏགས་ཡོད་འདུག
ཨ་རིའི་སྲིད་འཛིན་ཊོམ་གྱིས་བརྗོད་པ་ལྟར་ན། ཨི་རན་གྱིས་རྡུལ་ཕྲན་མཚོན་ཆ་དང་། རྒྱང་འཕེན་འཕུར་མདེལ་(Ballistic Missiles) བཟོ་སྐྲུན་བྱེད་བཞིན་པ་དེས་ཨི་སི་རེལ་དང་། དཀྱིལ་ཤར་ཁུལ་གྱི་ཨ་རིའི་དམག་སྒར་ཁག་ལ་འཇིགས་སྐུལ་དང་། ལྷག་པར་དུ་ཨ་རིའི་ས་ཐོག་ལ་ཡང་འཇིགས་སྐུལ་བྱེད་བཞིན་ཡོད་པར་བརྟེན། ཨི་རན་གྱི་རྡུལ་ཕྲན་ལས་གཞི་དང་འཕུར་མདེལ་གྱི་ནུས་པ་གཏོར་བཤིག་གཏོང་རྒྱུ་དང་།
ཨི་རན་གྱིས་དཀྱིལ་ཤར་ཁུལ་དུ་དྲག་པོའི་ཚོགས་པ་ཧ་མ་སི་དང་། ཧེ་ཛི་བྷོ་ལ་སོགས་ལ་དངུལ་དང་མཚོན་ཆས་རྒྱབ་སྐྱོར་བྱས་ཏེ། ས་ཁུལ་དེར་བརྟན་ལྷིང་མེད་པར་བཟོ་བཞིན་པ་དེ་མཚམས་འཇོག ཨ་རི་དགྲ་བོ་ལྟེ་བ་ཞིག་ལ་ངོས་འཛིན་བྱེད་མཁན་གྱི་སྲིད་གཞུང་བརྗེ་བསྒྱུར་སོགས་ལ་དམིགས་ནས་གཏོར་རྒོལ་བྱས་ཡོད་འདུག
ཐེངས་འདིའི་གཏོར་རྒོལ་ནི་སྔོན་ཚུད་ནས་འཆར་གཞི་ཞིབ་ཕྲ་བཏིངས་པ་ཞིག་ཡིན་པ་དང་། གཙོ་བོ་ཨི་རན་གྱི་རྡུལ་ཕྲན་ལས་གཞིའི་ལྟེ་གནས་ཁག་དང་། འཕུར་མདེལ་གསོག་ཉར་ཁང་། དེ་བཞིན་དྲག་པོའི་དཔུང་སྡེའི་བཀོད་འདོམས་ལྟེ་གནས་བཅས་ལ་དམིགས་ཡོད། ལྷག་པར་དུ་ཨི་རན་གྱི་རྡུལ་ཕྲན་ལྟེ་གནས་(Natanz) དང་ (Fordow) གཉིས་ལ་ཨ་རིའི་བཙན་རྫོང་གཏོར་བྱེད་ཀྱི་འབར་རྫས་ཆེན་པོ་བཀོལ་ནས་གཏོར་བཤིག་ཤུགས་ཆེན་བཏང་ཡོད་འདུག
ཐེངས་འདིའི་གཏོར་རྒོལ་གྱི་ཁྲོད་ཨི་རན་གྱི་ཆེས་མཐོའི་དབུ་ཁྲིད་དང་ཆོས་དཔོན་ayatollah ali khamenei དང་། ཁོང་གི་བུ་མོ། བདེ་སྲུང་བློན་ཆེན། ཁ་ཆེ་གསར་བརྗེ་དམག་དཔུང་གི་སྤྱི་ཁྱབ་དམག་སྤྱི་སོགས་ཆེས་མཐོའི་འགོ་ཁྲིད་༤༠ ཙམ་རྐྱེན་ལམ་དུ་བཏང་ཡོད་འདུག
གནས་ཚུལ་འདི་ཐོན་མ་ཐག་ཨི་རན་གྱི་རྒྱལ་ས་ཐེ་ཧི་རན་དང་གྲོང་ཁྱེར་ཆེ་ཁག་ནང་དུ་ཟིང་ཆ་ཆེན་པོ་ལངས་ཡོད། ཕྱོགས་གཅིག་ནས་ཨི་རན་གཞུང་གིས་ཉིན་བཞི་བཅུའི་མྱ་ངན་ཞུ་རྒྱུའི་གསལ་བསྒྲགས་སྤེལ་ཞིང་། སྲིད་གཞུང་ལ་དགའ་ཞེན་ཡོད་མཁན་ཚོས་མྱ་ངན་དང་ངོ་རྒོལ་བྱེད་བཞིན་ཡོད་པ་དང་། ཕྱོགས་གཅིག་ནས་སྲིད་གཞུང་མི་དགའ་མཁན་ཚོས་ཨ་རི་ལ་བསྟོད་བསྔགས་དང་གཞུང་ལམ་སོགས་སུ་དགའ་སྟོན་བྱེད་འགོ་བཙུགས་ཡོད་འདུག
ཨ་རི་དང་། ཨི་སི་རེལ་གཉིས་ཀྱིས་གཏོར་རྒོལ་བྱས་ནས་ཆུ་ཚོད་འགའ་ཤས་ཀྱི་རྗེས། ཨི་རན་གྱིས་ཀྱང་རང་གི་འཕུར་མདེལ་གྱི་ནུས་པ་བེད་སྤྱོད་བཏང་ནས་ལན་འདེབས་དྲག་པོ་བྱས་ཡོད། ཨི་རན་གྱིས་ཨི་སི་རེལ་གྱི་རྒྱལ་སྤྱིའི་གནམ་ཐང་དང་། ཨ་རིའི་དམག་སྒར་ཡོད་སའི་སའོ་ཌི་ཨ་རབ་དང་། ཨ་རབ་ཨེར་མེ་མཉམ་འབྲེལ་རྒྱལ་ཁབ། ཁ་ཐར་དང་བྷ་རེན། ཨི་རག་བཅས་ཁྱོན་རྒྱལ་ཁབ་བརྒྱད་ཙམ་ལ་དུས་གཅིག་ཏུ་འཕུར་མདེལ་གྱིས་གཏོར་རྒོལ་བྱས་ཡོད་འདུག
ཨི་རན་གྱིས་དམག་དོན་གྱི་ལན་འདེབས་ཤུགས་ཆེ་ཤོས་ཤིག་ནི། འཛམ་གླིང་གི་ས་སྣུམ་བརྒྱ་ཆ་༢༠ ནས་༣༠ བར་འགྲོ་སའི་ཧོར་མུ་ཛི་མཚོ་འགག་དེ་སྒོ་བརྒྱབ་པ་དེ་ཡིན་ཞིང་། མཚོ་འགག་བཀག་པས་ས་སྣུམ་གྱི་རིན་གོང་འཕར་པ་སོགས་འཛམ་གླིང་གི་དཔལ་འབྱོར་ལ་ཉེན་ཁ་བཟོས་ཡོད་འདུག
རྩ་བའི་ཨི་རན་དང་། ཨི་སི་རེལ་བར་ལོ་རྒྱུས་ཐོག་ཕན་ཚུན་དགྲ་འཁོན་གྱི་རྙོག་གྲ་ཡུན་རིང་ཡོད་པ་མ་ཟད། ལྷག་པར་དུ་ཕྱི་ལོ་༢༠༢༥ ཟླ་༦ པའི་ནང་། ཕྱོགས་གཉིས་ཀྱི་བར་ཉིན་བཅུ་གཉིས་རིང་དམག་འཁྲུག་བྱུང་བ་དེས་འགལ་བ་ཇེ་སྡུག་ཏུ་བཏང་ཡོད་པ་དང། ཐེངས་འདིའི་དམག་འཁྲུག་ནི། ལོ་མང་རིང་གི་འཁོན་འཛིན་དེ་གས་འཐོར་བྱུང་བ་ཞིག་ཡིན།
ད་ལྟའི་ཆར་དམག་འཁྲུག་འདི་མཇུག་བསྡུས་མེད་པར་མུ་མཐུད་འགྲོ་བཞིན་ཡོད་པ་དང་། ཨི་རན་གྱི་སྲིད་གཞུང་གསར་པ་གང་འདྲ་ཞིག་སླེབས་མིན་དང་། དཀྱིལ་ཤར་གྱི་ཞི་བདེ་ག་དུས་ཤར་མིན་ནི་འཛམ་གླིང་ཡོངས་ཀྱིས་དོ་སྣང་བྱེད་ས་གཙོ་བོ་དེ་ཆགས་ཡོད། ཨ་རིའི་བྱེད་སྟངས་འདིར་རྒྱ་ནག་དང་ཨུ་རུ་སུ་སོགས་ཀྱིས་སྐྱོན་བརྗོད་བྱེད་བཞིན་ཡོད་པས། དམག་འཁྲུག་འདི་རྒྱལ་སྤྱིའི་དམག་ཆེན་ཞིག་ཏུ་འགྱུར་རྒྱུ་ཡིན་མིན་ལ་ཐམས་ཅད་ཀྱིས་དངངས་སྐྲག་བྱེད་བཞིན་ཡོད་འདུག།
གསར་འགོད་པ། བློ་བཟང་རྒྱ་མཚོ།
