ཨི་རན་མི་མང་གིས་ངོ་རྒོལ་དང་ཨི་རན་གཞུང་གིས་ཨ་རི་དང་ཨི་སི་རཱེལ་ལ་ཉེན་བརྡ།

ད་ཆ་ཨི་རན་ནང་མི་མང་གིས་གཞི་རྒྱ་ཆེ་བའི་ངོ་རྒོལ་ཞིག་བྱེད་བཞིན་འདུག་ལ། ངོ་རྒོལ་བ་ཚོས་ད་ལྟ་སྲིད་དབང་འཛིན་བཞིན་པའི་ཨ་ཡ་ཏོལླཱ་ ཨ་ལི་ ཁ་མེ་ནེ་(Ayatollah Ali Khamenei)གཞུང་དེ་མཚམས་འཇོག་དགོས་པ་དང་། མི་མང་ལ་རང་དབང་དགོས་པའི་དགོས་འདུན་བཏོན་གྱི་ཡོད་འདུག་ཀྱང་། གཞུང་གིས་མི་མང་ཐོག་དྲག་གནོན་བྱས་ནས་ད་བར་མི་མང་༡༨༠ ཙམ་རྐྱེན་ལམ་དུ་ཕྱིན་ཡོད་པར་བརྗོད་འདུག

ཕྱི་ལོ་༢༠༢༦ ཟླ་༡ ཚེས་༡༢ ཉིན་བྷི་བྷི་སིའི་གསར་ཁང་གིས་གནས་ཚུལ་སྤེལ་དོན་ལྟར་ན། ཨ་རིའི་གསང་བའི་ལས་ཁུངས་དང་བྷི་བྷི་སིའི་གསར་འགོད་པ། དེ་བཞིན་ལས་འགུལ་བ་ཚོས་ལྐོག་ནས་གནས་ཚུལ་མཁོ་སྤྲོད་བྱས་པར། ད་ལྟ་ཨི་རན་ནང་མི་མང་སྟོང་ཚོ་མང་པོས་ངོ་རྒོལ་བྱེད་བཞིན་པའི་ཁྲོད་མི་མང་༡༨༠ ཙམ་བསད་ཡོད་པ་དང་། མི་མང་༡༠༦༠༠ ཙམ་གཞུང་གི་བདེ་སྲུང་མི་སྣས་འཛིན་བཟུང་དང་བཙན་ཁྲིད་བྱས་ཡོད་པར་བརྗོད་འདུག ཁ་སང་གཟའ་ཉི་མའི་ཉིན་ཨ་རིའི་སྲིད་འཛིན་ཊོམ་གྱིས་ཨི་རན་གྱི་འགོ་ཁྲིད་མཐོ་ཤོས་ཨ་ཡ་ཏོལླཱ་ ཨ་ལི་ ཁ་མེ་ནེ་ (Ayatollah Ali Khamenei)ངོས་ནས་ཨ་རི་དང་ལྷན་དུ་གྲོས་མོལ་བྱེད་དགོས་པའི་དགོས་འདུན་བཏོན་ཡོད་འདུག་ཅིང་། དེ་དང་ལྷན་དུ་ཊོམ་གྱིས་ཨ་རིའི་ངོས་ནས་འདེམས་ཀ་ཁག་པོ་ཞིག་མ་འདེམས་ཐབས་མེད་འགྱུར་ཉེན་འདུག་ཅེས་བརྗོད་ཡོད་འདུག་ཀྱང་། འདེམས་ཀ་ཁག་པོ་དེ་གང་ཡིན་མིན་གང་ཡང་བཤད་ཡོད་མི་འདུག (The Wall Street Journal) བརྒྱུད་ལམ་ཐོག་ཏུ་ཨ་རིའི་ལས་བྱེད་ཅིག་གིས་འདེམས་ཀ་དེ་ནི་ཨ་རི་ངོས་ནས་དྲྭ་ཐོག་ནས་ཨི་རན་གཞུང་ལ་གཏོར་རྒོལ་གཏོང་རྒྱུ་དང་། ཨི་རན་གྱི་དམག་གི་དྲྭ་རྒྱ་ཁག་ལ་གཏོར་རྒོལ་གཏོང་རྒྱུ། དེ་བཞིན་ཉེས་ཆད་གཅོད་རྒྱུ་བཅས་རེད་ཅེས་བརྗོད་པ་ལས་གཞན་གང་ཡིན་མིན་བཤད་ཡོད་མི་ཡོད་འདུག
ད་ལྟ་ཨི་རན་ནང་མི་མང་སྟོང་ཚོ་མང་པོས་ངོ་རྒོལ་བྱེད་དགོས་དོན་ནི་ཕྱི་ལོ་༢༠༢༥ ལོ་མཇུག་དང་ཕྱི་ལོ་༢༠༢༦ ཟླ་བ་༡ པོའི་ཟླ་འགོའི་ནང་ཨི་རན་གྱི་དངོས་ཟོག་གི་རིན་གོང་ཧ་ཅང་འཕར་ནས་མི་མང་གི་ཉིན་རེའི་འཚོ་བའི་དགོས་མཁོ་རྣམས་ཉོ་མི་ཐུབ་པར་གྱུར་བ་དང་། ཨི་རན་དངུལ་གྱི་ཛ་ཐང་ཆག་ནས་དཀའ་ངལ་ཆེན་པོ་འཕྲད་བཞིན་པ། དེ་བཞིན་ལྐོག་ཟ་རུལ་སུངས་དང་། ལས་མེད་སོགས་ཀྱི་དཀའ་ངལ་དུ་མ་ཞིག་འཕྲད་བཞིན་ཡོད་པའི་རྐྱེན་གྱིས་མི་མང་སྟོང་ཚོ་མང་པོས་ངོ་རྒོལ་འགོ་འཛུགས་བྱས་ནས་ཡུལ་དེའི་འགོ་ཁྲིད་མཐོ་ཤོས་ཨ་ཡ་ཏོལླཱ་ ཨ་ལི་ ཁ་མེ་ནེ་ (Ayatollah Ali Khamenei) ཡིས་དབང་ཆ་མཚམས་འཇོག་དགོས་པའི་དགོས་འདུན་བཏོན་གྱི་ཡོད་འདུག
ཨི་རན་གྱི་དམག་སྤྱི་ཞིག་གིས་མི་མང་ཚོས་ངོ་རྒོལ་ངེས་པར་དུ་མཚམས་འཇོག་བྱེད་དགོས་པ་དང་། མཚམས་འཇོག་མ་བྱས་ཚེ་དཀོན་མཆོག་ལ་ངོ་རྒོལ་བྱས་པར་བརྩིས་ནས་སྲོག་ཐོག་གི་ཉེས་ཆད་གཅོད་རྒྱུ་ཡིན་ཚུལ་བརྗོད་འདུག ད་བར་ངོ་རྒོལ་བའི་ཁྲོད་ཤི་རྨས་བྱུང་མཁན་ཧ་ཅང་མང་པོ་ཡོད་འདུག་པས། སྨན་ཁང་དག་ནད་པ་དང་ཕུང་པོས་ཁེངས་ནས་དཀའ་ངལ་ཆེན་པོ་འཕྲད་བཞིན་ཡོད་པར་བརྗོད་འདུག
གནས་ཚུལ་མང་པོ་ཞིག་ད་ལྟ་ཕྱིར་འཐོན་ཐུབ་ཀྱི་མེད་པ་དང་། རྒྱལ་སྤྱིའི་གསར་འགྱུར་ཆེ་ཁག་མང་པོ་ཞིག་ཨི་རན་ནང་བཀག་འགོག་བྱས་ཡོད་འདུག དེ་བཞིན་ཨི་རན་གཞུང་གིས་ངོ་རྒོལ་དེ་རྒྱ་ཁྱབ་མི་འགྲོ་བའི་ཆེད་དུ་ཨི་རན་གྱི་དྲ་རྒྱ་ཡོངས་སུ་བཀག་ཟིན་ཡོད་འདུག་ལ། མི་མང་ངོ་རྒོལ་བ་ཚོས་རང་རང་གི་ཕ་མ་སྤུན་མཆེད་དག་ལ་འབྲེལ་གཏུག་དང་གནས་ཚུལ་གཏོང་ལེན་མི་ཐུབ་པ་སོགས་ཀྱི་དཀའ་ངལ་འཕྲད་བཞིན་ཡོད་འདུག
ཨི་རན་གྱི་སྲིད་འཛིན་མ་སུད་ པེ་ཛེ་ཤི་ཀི་ཡན་(Masoud Pezeshkian) གྱིས་ཐེངས་འདིའི་མི་མང་གི་ངོ་རྒོལ་དེ་ནི་ཨ་རི་དང་། ཨི་སི་རཱེལ་གཉིས་ཀྱི་ངན་བྱུས་འོག་འཇིགས་སྐུལ་རིང་ལུགས་པའི་ཤོག་ཁག་དེ་འདྲ་ཨི་རན་ནང་བཏང་ནས་ས་ཆ་འདྲ་མིན་ནང་ངོ་རྒོལ་དང་གཏོར་རྒོལ་བྱེད་དུ་བཅུག་ཡོད་ཚུལ་བརྗོད་འདུག་ལ། ཨི་རན་གྱི་རྒྱལ་ས་ཏེ་ཧེ་རན་(Tehran) ནང་མི་མང་ངོ་རྒོལ་བ་དང་བདེ་སྲུང་དམག་མི་གཉིས་བར་གདོང་ཐུག་ཤོར་ནས་མི་མང་ཐོག་ཏུ་དམག་གིས་མེ་མདའ་གང་བྱུང་རྒྱག་གི་ཡོད་པར་བརྗོད་འདུག
ཨི་རན་ནང་ཕྱི་ལོ་༢༠༢༢ ནང་བུད་མེད་མ་ཧ་ས་ ཨ་མི་ནི་ (Mahsa Amini)ཞེས་པ་ཞིག་གིས་ཁ་ཆེའི་བུད་མེད་ཚོས་མགོ་ལ་གྱོན་སྲོལ་ཡོད་པའི་རས་དེ་ཆ་ལུགས་ལྟར་གྱོན་མེད་ཚུལ་བརྗོད་ནས་ཨི་རན་གྱི་ཉེན་རྟོག་པས་བཙན་ཁྲིད་དང་རྡུང་རྡེག་བྱས་པའི་དབང་གིས་རྐྱེན་ལམ་དུ་སོང་བར་བརྟེན། མི་མང་གིས་གཞི་རྒྱ་ཆེ་བའི་ངོ་རྒོལ་ཞིག་བྱུང་ཡོད་པ་དང་། སྐབས་དེ་དུས་མི་མང་༥༥༠ ཙམ་བསད་པ་དང་༢༠༠༠༠ ཙམ་བཙོན་འཇུག་བྱས་ཡོད་པ་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པ་ཁག་གིས་བརྗོད་འདུག།
གསར་འགོད་པ། བསོད་ནམས་ཕུན་ཚོགས།