གླུ་བ་སོག་ཕྲུག་ཤེས་རབ་ལགས་འཇུ་བཟུང༌།
གཞས་པ་སོག་ཕྲུག་ཤེས་རབ་ལགས་ཀྱིས་ ༡༩༩༧ ཡས་མས་ནས་གླུ་དང་རྡུང་ལེན། བཞད་གར་དང་གཏམ་བརྗོད་སོགས་འཁྲབ་སྟོན་གང་མང་བྱས་ཡོད་པ་མ་ཟད། རྒྱ་ནག་གི་གཏམ་རྒྱུད་གྲགས་ཆེན། གྲུབ་ཐོབ་ཅཱི་ཀུང་ཟེར་བ་སོགས་འཁྲབ་སྟོན་བྱས་ཏེ། བོད་རིགས་རྒྱ་ཆེའི་གཟིགས་མཁན་དང་གསན་མཁན་རྣམ་པའི་དགའ་བསུ་ཆེན་པོ་ཐོབ་ཡོད་པ་དང༌། ལྷག་པར་དུ་སྔར་ལོ་ ༢༠༠༨ ལོར་མཚོ་སྔོན་བོད་སྐད་བརྙན་འཕྲིན་ཁང་གིས་གཙོ་སྒྲུབ་བྱས་པའི་མུ་འབྲེལ་བརྙན་འཕྲིན་ཟློས་གར། ཁ་སང་གི་གཏམ་རྒྱུད། ཅེས་པའི་འཁྲབ་གཞུང་ནང་གི་མི་སྣ་གཙོ་བོ་རྟ་རྡོ་ཞུ་བ་དེ་འཁྲབ་སྟོན་བྱས་ཏེ། སྒྱུ་རྩལ་གྱི་ཉམས་འགྱུར་དང་དངོས་ཡོད་འཚོ་བ་མཚོན་སྟངས་ཐད། གཟིགས་མཁན་ཡོངས་ཀྱི་བསྔགས་བརྗོད་དང་གདེང་འཇོག་ཚད་མཐོན་པོ་ཐོབ་ཡོད་འདུག ད་ལྟའི་གནས་སྟངས་གསལ་པོ་ཤེས་ཀྱི་མི་འདུག ཐེངས་འདིའི་ཁོང་གི་སྒྲ་སྙན་རྡུང་ལེན་ཆེད་སྒྲིག་འོད་སྡེར་ནང་གི་སྤྱི་ལོ་ལྔ་བཅུ་ང་བརྒྱད་ལོ་དང་སྤྱི་ལོ་ཉིས་སྟོང་བརྒྱད་ལོ། ཞེས་པའི་གཞས་ཚིག་གཤམ་དུ་བཀོད་ཡོད།
སྤྱི་ལོ་ལྔ་བཅུ་ང་བརྒྱད་ལོ།།
དགྲ་ནག་པོ་བོད་ལ་ཐོན་པའི་ལོ།།
རྗེས་བླ་མ་བཙོན་ལ་བཟུང་བའི་ལོ།།
ལོ་གན་ལ་ང་ཚོ་འཇིགས་སྣང་ཆེ།།
འདི་སྤྱི་ལོ་ལྔ་བཅུ་ང་དགུ་ལོ།།
བོད་དཔའ་བོ་ཁྲག་ལ་སྦྱར་བའི་ལོ།།
བོད་ཉེས་མེད་བཙོན་ལ་བཟུང་བའི་ལོ།།
ལོ་གན་ལ་ང་ཚོ་འཇིགས་སྣང་ཆེ།།
སྤྱི་ལོ་ཉིས་སྟོང་བརྒྱད་ཀྱི་ལོ།།
བོད་ཉེས་མེད་གཅར་རྡུང་བྱས་པའི་ལོ།།
སའི་གོ་ལའི་འབངས་མི་བསད་པའི་ལོ།།
ལོ་གན་ལ་ང་ཚོ་འཇིགས་སྣང་ཆེ།།
