བོད་ཡུལ་དུ་སྤྲིངས་པ།
འཆི་གསོན་རང་དབང་བྲལ་བའི་ངང་ཚུལ་རང་དྲན་དུས།
ཡུན་རིང་ས་མཐར་ལུས་པའི་བོད་མིང་ཙམ་ཐོབ་པའི།།
ནུས་མེད་སྤྲང་འཁྱམ་ཁོ་བོའི་སེམས་ཁོང་གི་འཕར་ལྡིང་།།
གཅིག་ལས་གཅིག་མགྱོགས་རྔམ་དྲག་འཇིགས་གཡེར་གྱི་ཚོར་བ།།
དཀར་གཙང་ཤོག་བུའི་ངོས་སུ་སྐྱུག་ཐབས་རང་མེད་ཀྱང་།།
ནང་གི་ཤེས་པ་འདི་ཡི་ན་ཟུག་གི་གྱོང་ནད།།
དུ་བའི་གཞུར་རྒྱུན་འདྲིས་དེ་མཁའ་དབྱིངས་སུ་འཕུད་དུས།།
གཤོག་རྩལ་ངོམ་བཞིན་རྒྱང་རིང་ཡུལ་ཕྱོགས་སུ་འགྲོ་བའི།།
བྱ་དང་བྱེའུ་ཚོགས་ལ་འཕྲིན་ཡིག་འདི་སྤྲིངས་ཡོད།།
སེམས་ཀྱི་འདུས་པ་བོད་ཀྱི་ཕྱོགས་སུ་གཞུར།།
ལུས་ཀྱི་འབྲེལ་ཐག་ཕྱི་རོལ་ཡུལ་དུ་འཚོ།།
ལུས་སེམས་ཁ་ཁར་གྱུར་བའི་བར་ཐག་འདིས།།
མི་ལུས་འདི་ལ་སུན་བཙེར་སྣ་དགུ་བྱེད།།
འགྲོ་ན་འདོད་པ་བོད་ཡུལ་གངས་ལྗོངས་ཡིན།།
འགྲོ་སའི་ཡུལ་དེར་རང་དབང་གཏན་བྲལ་བ།།
འགྲོ་བ་མི་རུ་སྐྱེ་ཡང་འགྲོ་བ་མིའི།།
འགྲོ་བ་སྤྱི་མཚུངས་བཞིན་དུ་མེད་འདི་སྐྱོ།།
ཤ་ཁྲག་རུས་གསུམ་གཅིག་པའི་བོད་ཡུལ་གྱི་སྤུན་ཟླ།།
ལས་འགུལ་གང་ཞིག་སྤེལ་ཡང་༧གོང་ས་ཡི་ཐུགས་དང་།།
འགལ་མེད་ཞི་བའི་ལམ་སྟོན་ཁོ་ན་རུ་འབུངས་དེ།།
གཅེས་པའི་ཚེ་སྲོག་སྲུང་ལ་འོས་འགན་རང་མ་ནོར།།
༡༠།༣།༠༩བྲིས།