སྨོན་པའི་ཚིག་གསུམ།
རྩི་ཤིང་ལྗང་ལྗོན་གསེབ་ཀྱི་ལྡུམ་རྭའི་ནང༌༎
མགོན་མེད་ཟས་སྦྱིན་མགྲོན་གྱི་ཁང་བཟང་དུ༎
སྔོན་ལས་ཟབ་པའི་མཐུ་ནུས་སྣེ་ཤེན་འོག།
འུ་ཅག་ལྷན་གཅིག་འཛོམས་པའི་བསྐལ་བ་བཟང༌༎
ཡ་རབས་གུས་ཞབས་ཆེ་བའི་རྣམ་པ་མཛེས༎
རིག་པའི་རླབས་སུ་རྩེན་པའི་ཉམས་རྟོག་བཟང༌༎
ཕྱི་ནང་ཀུན་དུ་བཟང་བའི་ཁམས་གཙང་དེས༎
སློབ་གླིང་སྐྱེད་ཚལ་སྔར་བས་མཛེས་པར་མཐོང༌༎
དམིགས་བསལ་སློབ་གླིང་ནང་གི་མེ་ཏོག་མས༎
རིག་པའི་བཅུད་ལ་དུང་བའི་ཧུར་སེམས་དང༌༎
ཡ་རབ་མཐུན་ལམ་བཟང་བའི་ཉམས་སྟོབས་ཀུན༎
ཝ་ནྰའི་ཁང་བཟང་དབུས་ཀྱི་མཛེས་རྒྱན་ཉིད༎
ཟང་ཟིང་བཙོག་དྲི་མ་སྦགས་ཚུལ་ལྡན་མ༎
ཤེས་བྱའི་དོན་དུ་འཇུག་པའི་བརྩོན་ལྡན་མ༎
སྤོབས་པའི་སེམས་རྩ་མ་ཉམས་མེ་ཏོག་མ༎
ང་ཡི་ཡིད་དུ་འོང་བའི་སྲིང་ཆུང་མ༎
དགེ་བའི་བཤེས་གཉེན་དབུ་ཡི་ཏོག་ལྟར་བཀུར༎
སློབ་གྲོགས་ཕོ་མོ་དབར་ལ་མཛས་བརྩེས་སྐྱོང༌༎
རིགས་ཀྱི་བདེ་སྡུག་སྙིང་ཁོང་འཆང་བཞིན་དུ༎
རིག་པའི་རྒྱ་མཚོའི་ཕ་མཐའ་གྲོལ་བར་མཛོད༎
ཕྱི་ཡི་དགྲ་ཆེན་གདུལ་བར་དཔལ་མཛངས་དགོས༎
ནང་གི་དགྲ་ངན་འདུལ་ཡང་ཤེས་རབ་དགོས༎
འདབ་གཤོག་གསུམ་ལྡན་རིགས་མཐུན་སྤུན་ཟླ་རྣམས།
ཆོས་དང་འཇིག་རྟེན་ཐབས་ཀྱིས་སྐྱོང་བར་མཛོད༎
གཞིས་བྱེས་བོད་མིའི་མ་འོངས་བདེ་དོན་དག།
འགན་འཁྲི་ཕྲག་ཏུ་བབས་པའི་དུས་སུ་ཤར༎
ལོ་རྒྱུས་དཀྱོགས་མཚམས་འདི་ནས་ཁྱེད་ཅག་ཀུན༎
ཤེས་འཇོན་གཉིས་ཚོགས་བློ་གྲོས་འཕེལ་བར་སྨོན༎