རྒྱ་གར་ཁང་བདག་གི་རྙོག་འཛིང༌།
ངེད་བང་ཆེན་ཚང་གི་རྒྱ་ཡིག་དྲ་རྒྱའི་ཡིག་སྒྱུར་གྱི་ལས་གནས་གསར་པར་ཞུགས་ནས་ལོ་འཁོར་གྲབས་འདུག་ཀྱང༌། དེང་སང་རྒྱ་ཡིག་དྲ་ལམ་དུ་ཡིག་འཇུག་མ་ཐུབ་པ་ཟླ་བ་ཁ་ཤས་ཕྱིན་ཞིང༌།ལས་སྒོའི་བྱ་བ་འཐུས་ཚང་སྒྲུབ་མ་ཐུབ་པར་རྒྱུན་དུ་སེམས་ལ་དཀའ་ངལ་འཕྲད་བཞིན་འདུགཡིན་ཡང་འབྲེལ་ཡོད་དོ་དམ་པས་དཀའ་ངལ་སེལ་ཐབས་གནང་བཞིན་པ་ཡིན་ཙང་གནད་དོན་སྔ་ཙམ་ཐག་གཅོད་ཡོང་བའི་རེ་བ་ཡོད།
དེ་མིན་སྒེར་གྱི་དོན་ཆུང་རེ་གླེང་ན་དེ་སྔོན་རྒྱ་གར་བའི་ཁང་པ་ཆུང་ཆུང་ནས་ད་ཆ་གཞུང་ལས་ཁང་ཉེ་འཁོར་གྱི་ཁང་གསར་ཁང་མིག་གཅིག་ཅན་ཞིག་ཏུ་གནས་སྤོ་ཐུབ་པ་ནི་དགའ་འོས་པའི་གནས་ཚུལ་ཆུང་ཆུང་ཞིག་རེད།གླས་པའི་ཁང་གསར་ཉིས་ཐོག་ཁང་ཆུང་མདུན་དུ་གོམ་ཞག་གཅིག་ཙམ་གྱི་ཉི་རྭའི་འགྲོ་ལམ་ཡོད་ཅིང༌།ཁྲུས་ཁང་དང་གསང་སྤྱོད་གཅིག་ལྕོག་དེ་ང་དང་ཁྱིམ་མཚེས་ལས་རོགས་ངེད་གཉིས་ལས་བེད་སྤྱོད་མཁན་མེད་སྟབས་རང་བཞིན་གྱིས་གཙང་སྦྲ་དོད་པོའང་ཡོད།དམིགས་བསལ་ཁང་ཆུང་ནང་དུ་བསྡད་དེ་ཕྱིར་རྒྱང་ལྟ་རེ་བྱེད་དུས་ལྕང་མའི་ཚང་ཚིང་གསེབ་ཀྱི་ཞིང་ཁ་དང༌།རྒྱ་གར་ཡུལ་མི་ཚོའི་ཁང་ཁྱིམ་ཐར་ཐོར།དེ་ནས་ཅུང་རྒྱང་རིང་སར་ལྗང་མདོག་ཅན་གྱི་རི་གདོང་གཉིས་དང༌།དེའི་རྒྱབ་རིའི་རྩེར་ད་དུང་དངུལ་མདོག་གིས་རྒྱན་ཡོད་པ་དེ་ནི་ཡུལ་གྱར་བའི་སེམས་ལ་རྟག་ཏུ་ཕ་སའི་དྲན་གསོ་བྱེད་དང༌།མཚམས་རེར་དགའ་མ་སྡུག་གི་སྐྱོ་སྣང་འཚུབ་ཅིང༌།མཚམས་རེར་རི་རྩེའི་ཁ་བ་དཀར་པོ་དེ་ངའི་མིག་ནང་སྡུག་པའི་མཛེས་རྒྱན་ཞིག་ཀྱང་ཡིན་།
རྒྱ་གར་ཁང་བདག་ཚང་ལ་རྨོ་རྨོ་དང་ཁོའི་བཟའ་ཟླ། ལོ་བཞི་ནས་བཅུ་གྲངས་བར་གྱི་ཕྲུ་གུ་བཞིའི་ནང་ཆུང་ཤོས་དེ་བུ་དང༌། དེ་ནས་ཅུང་ཆེ་བའི་བུ་མོ་གསུམ་གྱི་ཐ་ཆུང་དེ་ཅུང་རིག་ཚོ་མ་ཐུབ་པ་ཞིག་རེད།གོ་ཐོས་ལ་དེ་སྔོན་ཁང་བདག་ཁོས་སྤྱི་བསྐྱོད་གླའཁོར་ཞིག་བཏང་ནས་ཡོང་འབབ་གསོག་པ་དང༌།དེ་རྗེས་རླངས་འཁོར་བཙོང་ནས་ང་དང་བོད་པ་དུད་ཚང་བཞི་བསྡད་ཡོད་པའི་ཁང་ཐོག་ཉིས་བརྩེག་འདི་གསར་རྒྱག་བྱས་སྐད་འདུག འདི་ལྟར་འཇིག་རྟེན་པའི་སྤྱི་མཚུངས་ཀྱི་ཁྱིམ་གཞིས་ནང་ལུགས་མཐུན་གྱིས་འཚོ་བར་རོལ་ན་རྒན་གཞོན་མཉམ་དུ་ཚོགས་པའི་དྲོ་སྐྱིད་ལྡན་པའི་ཁྱིམ་ཚང་ཞིག་ཡིན་ཆོག་ཀྱང༌།འཇིག་རྟེན་པ་མང་པོས་དོན་མེད་ཀྱི་ལས་ཀས་བྲེལ་བ་ལྟར།ད་ཆ་ཁོ་ཚོའང་རྙོགས་དྲའི་སྒམ་ཆུང་དུ་ཚུད་ཟིན།དེའང་ངས་ཤེས་རྟོགས་བྱས་པ་ལྟར་ན་ཚང་མས་མི་གཤིས་བཟང་པོ་ཡོད་ལུགས་བརྗོད་བཞིན་པའི་ཁང་བདག་ཁོས་དེ་སྔོན་རྒྱུན་དུ་ཆང་རག་ཚད་མེད་འཐུང་བར་བརྟེན།བཟའ་ཚང་དབར་འཁྲུག་འཛིང་འགོ་བརྩམས་པ་དང༌།དེ་ནས་ཁོས་ཆང་རག་ག་དུས་འཐུང་ཡང་འཁྲུག་རྩོད་ཡོད་ཡོད་པ་རེད་འདུགཁང་བདག་ཁོའི་ལོ་དྲུག་ཅུ་མ་ཟིན་ཙམ་གྱི་རྨོ་བོ་དེ་ནི་སྔ་ལངས་ཕྱི་ཉལ་གྱིས་སྒོ་ཟོག་ལྟ་སྐྱོང་དང་ཁྱིམ་ལས་སོགས་ལ་ཧུར་བརྩོན་ཆེ་ཞིང༌།མཐོང་སྣང་ལ་ཨ་མ་ཉམས་ཆུང་ཚུལ་མཐུན་ལྟར་ཡོད།དེ་མིན་ཕྲུ་གུ་བུ་མོ་ཆེ་བ་གཉིས་སློབ་གྲྭར་འགྲོ་བ་དང༌།རྒྱུན་ལྟར་གཙང་སྦྲ་ལེགས་པོ་མེད་ཀྱང་འགྲིག་ཐག་ཆོད་ཡོད།ཁང་བདག་གི་བཟའ་ཟླ་བུད་མེད་དེ་ཁོ་དང་གཅིག་མཚུངས་ཀྱིས་གཟུགས་པོ་སྐམ་ལ་རིད་པ་ཞིག་ཡོད་ཀྱང་ཕྱིའི་རྣམ་པའང་བཟང་བའི་གྲས་ཤིག་རེད།
ཉིན་ཁ་ཤས་སྔོན་གྱི་མཚན་མོ་ཞིག་ལ་ཁྱིམ་ཚང་དེར་འུར་ཟིང་གིས་ཁེངས་ཤིང་ང་དང་ཁྱིམ་མཚེས་གཉིས་ཀྱང་སྐད་ཅོར་གྱིས་དཀྲོགས་བྱུང༌།གོམ་ཞག་འགའི་མཚམས་ནས་བལྟས་དུས་བུད་མེད་དེས་ནུས་ཤུགས་ཡོད་རྒུས་མོའི་ཁྱོ་བོར་ངུ་འཐམ་དང་འཛིང་འགོ་ཚུགས་པ་མ་ཟད།ཆང་རག་གིས་བཟི་ཚར་བའི་ཁང་བདག་དེས་སྐད་ཤུགས་ཆེན་པོས་གཅིག་བཤད་ཀྱི་འདུག་ཀྱང་ཁོ་ལ་བཟའ་ཟླས་རྡུང་འཚོག་ཀྱང་མ་ཉུང་བ་རག་སོང༌།ཁང་བདག་གི་ཨ་མས་ནུས་ཤུགས་ཡོད་ཚད་ཀྱིས་བཟའ་ཚང་གཉིས་དབར་ལ་འཆམ་འགྲིག་ཡོང་ཐབས་ལྟ་བུར་བྱས་ཀྱང་ནུས་པ་དེ་ཙམ་ཐོན་ཐུབ་ཀྱི་མེད་ཚོད་རེད།དེ་རྗེས་འཛིང་རྒྱུ་ཅུང་བཞག་ནས་རྩོད་གླེང་རྒྱུན་མཐུད་བྱས་སོང༌།མཚན་མོ་ས་རུབ་ཙམ་གྱི་མཚམས་སུ་སླེབས་ཚར་ཡང་ཁོ་ཚོ་སླར་འུར་ཟིང་ཆེན་པོ་ཐེངས་གཉིས་པ་ལངས་ཤིང༌། ཁྱོ་བོས་བཀག་མ་ཐུབ་པར་ཨ་མ་དང་མནའ་མ་གཉིས་འཁྲུག་ཚར་འདུག
དེ་ནས་ཁྱོ་བོས་བར་འདུམ་ཟོལ་འདྲ་ཡིན་ཁུལ་བྱས་ཀྱང་མནའ་མ་ངར་མ་དེ་མ་ཐུབ་པར་རྨོ་བོའི་ཅོ་ཐོ་འཐེན་ནས་འཛིང་འགོ་ཚུགས།ཁྱོ་བོ་དེ་མུར་རྗེས་སུ་རྒྱུགས་ནས་མའི་ཕྱོགས་ལངས་ཏེ་མནའ་མར་རྡུང་སོང༌།མནའ་མ་ངར་མ་དེ་སྐད་འབོད་དང་བཅས་ངུ་རྒྱུགས་བྱས་ཏེ་མུན་ནག་ནང་དུ་བོར་ཚར་འདུག
ཕྱི་ཉིན་ཞོགས་པར་མནའ་མ་ཕྱིར་འབྱོར་འདུག་ཀྱང་ཁྱོ་བོ་དང་ཡུན་རིང་རྩོད་གླེང་བྱས་རྗེས་ཁྱོ་བོའི་ཁོང་ཁྲོ་ཐེངས་ཤིག་གིས་མནའ་མའི་མགོ་བོར་རྨ་བཟོས་ནས་ཁྲག་དམར་ཆིལ་ལེར་སྐྲ་དང་གྱོན་ཆས་ཚོས་པ་བྱས་ཚར་འདུགརྒྱ་གར་ཁྱིམ་མཚེས་གཞན་ཡོད་ཀྱང་རྒྱང་རིང་ནས་ལྟད་མོ་བལྟ་བ་ལས་བར་འདུམ་ཙམ་ཡང་མེད་པ་ནི་ཁོ་ཚོའི་རྒྱུན་སྲོལ་གྱི་གནས་སྟངས་རེད།ངས་ལག་བརྡ་དང་བཅས་ཁྱོ་བོར་མནའ་མ་སྨན་ཁང་དུ་སྐྱེལ་རྒྱུའི་རེ་བ་ཞུས་ཀྱང་ཁོས་ཕལ་ཆེར་གང་བྱེད་ཀྱི་མ་རེད།བུད་མེད་འདི་ཁ་ངར་མ་ཞིག་རེད་ཟེར་གྱི་ཡོད་པ་འདྲ།སྨན་ཁང་དུ་འཁྲིད་རྒྱུ་བཞག་ནས་ལྟོ་ཕད་ཅིག་རྒྱབ་ལ་འཁུར་ནས་ཕྲུ་གུ་ཚོའི་ངུ་ངག་དང་།ཨ་མ་དང་མནའ་མ་དབར་གྱི་རྩོད་གླེང་ཁྲོད་ནས་ཕྱིན་སོང༌།
དེ་ནས་ངས་མནའ་མ་བདེ་ལེགས་སྨན་ཁང་དུ་ཁྲིད་དེ་སྨན་བཅོས་བྱེད་བཅུག་པ་དང༌།མོའི་རོགས་པ་བུད་མེད་གཞན་ཞིག་ལ་རྩིས་སྤྲད་དེ་ཕྱིར་གཞུང་ལས་ཁང་དུ་འབྱོར་དུས།ལས་རོགས་ཚོས་བཟང་སེམས་ཀྱིས་རྒྱ་གར་བའི་རྙོགས་དྲའི་དོན་ལ་ཇུས་རྟོགས་བྱས་ན་མ་འོངས་རང་ལའང་རྙོགས་དྲ་རྫོགས་རྒྱུ་མེད་པ་ཡོང་སྲིད་པའི་སྐོར་བསླབ་བྱ་བྱེད་ཀྱི་འདུག
ཚོད་དཔག་བྱས་ན་ད་ཆ་རྒྱ་གར་ཁང་བདག་ལ་ཞིང་ཁ་དང་ཕྱུགས་ཟོག་གི་མ་རྩ་ཡོད་པའི་ཐོག་ཟླ་རེར་ཁང་གླ་གཅིག་པུར་སྒོར་དྲུག་སྟོང་གི་ཡོང་བབས་ཡོད་ལ་འཚོ་བའི་རྒྱབ་བརྟེན་འདང་ངེས་ཡོད།དེ་ལྟར་ཕན་ཚུན་མཛའ་བརྩེ་དང་ལྡན་པ་ཞིག་བྱུང་ན་དྲོ་སྐྱིད་ལྡན་པའི་ཁྱིམ་གཞི་ཞིག་འགྲུབ་པར་ཐེ་ཚོམ་མི་དགོས་ཀྱང༌།ཐོག་མར་ཁྱིམ་གཞི་དེ་གཏོར་བཅོམ་བཏང་བའི་དུག་རྩའམ་སྨྱོ་ཆུ་དེས་ཁྱིམ་བདག་བཟང་པོ་ཡིན་ཟེར་བ་དེའི་ལུས་སེམས་འཁྲུག་པ་ནས་འགོ་བརྩམས་ནས་ཁྱིམ་མི་ཚང་མར་འཁྲུག་ཟིང་ལངས་བ་དང༌།དེ་ནས་མནའ་མས་ཐབས་ཀྱིས་མ་འདང་བའི་རང་གཤིས་ངར་མས་ཁྱོ་བོར་ཁ་གཏད་གཅོག་དུས།རྨོ་རྨོས་རང་གི་བུ་ལ་སྙིང་ཞེན་གྱིས་མ་བཟོད་པར་མནའ་མ་དང་འཛིང་བ།དེ་རྗེས་བུས་ཀྱང་ཨ་མ་དང་མཉམ་དུ་མནའ་མ་རྡུང་ནས་ཕྲུ་གུ་བཞིས་ངུ་འབོད་ཀྱིས་ཁེངས་པའི་གནས་སྟངས་སྐྱུར་མོ་འདི་གྱུར་ཡོད་པ་རེད།
ཁོ་ཚོའི་མི་གཤིས་ལ་ལེགས་ཉེས་དབྱེ་འབྱེད་བྱེད་ཐབས་དཀའ་་བ་མ་ཟད། །མི་རེ་ངོ་རེ་ནས་སོ་སོའི་སྐྱོན་ཆ་ལེགས་བཅོས་རེ་ཡོང་ཐབས་མ་བྱས་པའི་ཁར་ཁྱིམ་བདག་ཁོའི་རང་ངོས་ནས་ཐོག་མར་སྐྱོན་ཆ་ཆུང་ངུ་ཡིན་ཡང་དེ་དོར་མ་ཐུབ་ཅིང༌།ད་ཆ་ཁོའི་སྒེར་གྱི་གནད་དོན་དེ་ཁྱིམ་ཚང་ལ་འཁྲུག་གཞི་ལངས་བའི་སྐྱོན་ཆེན་དུ་གྱུར་ཏེ་སྐབས་བབས་སུ་བཅོས་ཐབས་མ་བྱུང་བ་དང༌།དེ་མིན་ཁྱིམ་གཞི་འདི་འཁྲུག་འཛིང་ཤོར་དགོས་པའི་གནད་དོན་གཞན་ཡང་ཡོད་སྲིད་ཀྱང་།མདོར་བསྡུས་ནས་བརྗོད་ན།ཚང་མས་སོ་སོའི་སྐྱོན་ཆ་བཙན་གྱིས་སྦས་ཤིང་གནད་དོན་ཆུང་ཆུང་ཞིག་དུས་ཐོག་ཐག་གཅོད་ལེགས་པོ་མ་བྱུང་བར་བརྟེན།ད་ལྟའི་ཆར་ངའི་རྒྱ་གར་ཁང་བདག་གི་ཁྱིམ་གཞིའི་གནས་སྟངས་ཐབས་སྡུག་འདི་བྱུང་བ་ཡིན་ནོ།།
སྤུན་ཟླ་དྲ་གྲོགས་ཚོ། ཁྱེད་རྣམ་པས་གསུངས་ན་གནས་ཚུལ་དེ་འདྲ་ཨེ་རེད།