ཀ་བཤད་མོ་སྨོད་ཚར་གཅོད།
ཅ་ཅོའི་མོ་སྨོད་ཚིག་ཚོགས་སྒྲོག་ལ་དགའ། །
ཆ་འཇོག་ཡིད་བརྟན་བྲལ་བའི་རྒོད་གཏམ་མང༌། །
ཇ་རོ་ལས་ཀྱང་ལོད་པའི་མདོ་མེད་ཁྱོད། །
ཉ་མོ་ཆུ་ཡིས་སྐྱོང་འདྲའི་སྐྱེད་མར་སྨོད། །
ཏ་རེ་དཔལ་མོའི་རྣམ་སྤྲུལ་མིན་ན་ཡང༌། །
ཐ་ཤལ་ཁྱོད་འདྲ་ཟླ་དགུ་ཁོག་ཏུ་རུམ། །
ད་དུང་སྡུག་རྒུས་སྙིང་ཁམས་གཟེར་གྱུར་ཡང༌། །
ན་ཚ་རིང་དོར་བུ་རྒྱུད་བྱམས་ཀྱིས་སྐྱོང༌། །
པ་ཕའི་གྲིབ་གཟུགས་ཙམ་གྱི་སྣང་བ་ལས། །
ཕ་ཡིས་བསྐྱུར་བའི་དྭ་ཕྲུག་མང་ལ་བལྟོས། །
བ་གླང་སེམས་ལྡན་མི་ཡི་ཤ་ཚུགས་ཅན། །
མ་ལོའི་བཀའ་དྲིན་མི་དྲན་སྐལ་དམན་ཁྱོད། །
ཙ་ར་གཙོད་པའི་འདུ་ཤེས་བྲལ་བའི་ཕྱིར། །
ཚ་གྲང་འགལ་ཟླ་མང་བའི་ཁྱོད་ཀྱི་གཏམ། །
ཛ་དྲག་ཉེར་གཅིག་དུས་ཀྱི་སྤྱི་ཚོགས་འདིར། །
ཝ་མོའི་ངང་ཚུལ་ཁྱོད་འདྲ་སྙིང་བརྗེའི་ཡུལ། །
ཞྭ་གོས་སྤྱང་ཀིའི་ཕྱི་ལྤགས་མཛེས་ན་ཡང༌། །
ཟ་མ་མོ་ལ་སྨོད་པའི་ཅོལ་ཅུང་བ། །
འ་ཅག་བློ་ལྡན་ཀུན་གྱི་དུག་རྩ་དེ། །
ཡ་རབས་སྨྲ་ལྕེ་གཞན་གྱིས་བརྐུས་དང་མཚུངས། །
ཧ་ཧ་མ་དགོད་བྱིས་པའི་ངང་ཚུལ་ཅན། །
ཧ་ཅང་རྟོགས་དཀའི་ཤེས་རབ་མཛངས་ལྡན་ཏེ། །
ཨ་མའི་དཀའ་དྲིན་ཡིད་ལ་བསམ་ཤེས་དང༌། །
ཨ་ཉོག་ལོག་ལྟ་ལྡོག་གཤེར་བྱས་ན་ལེགས། །
དུས་རྒྱུན་བུད་མེད་ལ་སྨོད་པར་དགའ་བའི་མྱི་སྡང་
ཁུར་མེད་འཁྱམ་པོ་ཞིག་དང་འཕྲད་པས་
ཕྱི་ལོ་༢༠༠༦། ༠༨། ༠༦ ཉིན།