བཙན་གཡེམ་གྱི་དོན་རྐྱེན་འོག་རྒྱ་དཔོན་ཞིག་བསད་པ།
ཟླ་འདིའི་ཚེས་༢༣ ཉིན་གསར་ལམ་ཁག་ནས་གནས་ཚུལ་སྤེལ་གསལ་ལྟར་ན། རྒྱ་ནག་གི་དཔོན་རིགས་༣ གྱིས་ཟ་ཁང་ནང་ཞབས་ཞུ་བྱེད་མཁན་བུ་མོ་ཞིག་ལ། འཁྲིག་སྤྱོད་ཀྱི་དགོས་འདུན་བཏོན་པར་བུ་མོས་དང་ལེན་མ་བྱས་ནས་བཙན་གཡེམ་བྱེད་སྐབས། བུ་མོ་དེས་གྲི་བཙུགས་ཏེ་དཔོན་པོ་གཅིག་བསད་པ་དང་རོགས་པ་གཉིས་ལ་རྨས་སྐྱོན་བཏང་ཡོད་པའི་གནས་ཚུལ་ཐོན་ཡོད་པ་རེད།
དེ་ཡང་རྒྱ་ནག་གི་གྲོང་ཁྱེར་ཞིག་ཏུ་ཟ་ཁང་དང་མགྲོན་ཁང་ཆང་ཁང་གཅིག་ལྕོགས་ཡིན་པ་ཁཱ་རོ་ཁའི་ཟེར་བ་ཞིག་ཏུ། བུ་མོ་རང་ལོ་༢༡ སོན་པ་ཏིན་ཡུས་ཇཱའོ་ཡིས་རྒྱ་ནག་དམར་ཕྱོགས་ཀྱི་དཔོན་རིགས་རང་ལོ་༤༣ ལ་སོན་པ་ཀོས་དཱ་ཟེར་བ་དང་ཁོ་ཡི་རོགས་པ་༢ བཅས་ལ་ཞབས་ཞུ་བྱེད་སྐབས། དཔོན་རིགས་ཚོས་བུ་མོར་འཁྲིག་སྤྱོད་ཀྱི་དགོས་འདུན་བཏོན་པར་བུ་མོས་དང་ལེན་མ་བྱས་ནས། ཁོ་ཚོས་མཉམ་དུ་བུ་མོ་འབོལ་གདན་སྟེང་མནན་ནས་བཙན་གཡེམ་བྱེད་སྐབས། བུ་མོ་དེས་སྐྱེས་པ་དེའི་སྐེ་ལ་ལྟེབ་གྲི་བཙུགས་ནས་བསད་ཡོད་པ་དང༌། ཁོའི་རོགས་པ་གཅིག་གི་སྒལ་པར་གྲི་བཙུགས་ནས་སྨན་ཁང་དུ་བསྐྱལ་དགོས་བྱུང་ཡོད་པ་རེད། རྒྱ་ནག་གི་དྲ་རྒྱ་ཁག་དང་ཚགས་པར་སོགས་སུ་བུ་མོ་དེར་བསྟོད་ར་གཏོང་མཁན་དང་དྲང་བདེན་མ་ཡིན་པའི་དཔོན་རིགས་ཀྱི་བྱ་སྤྱོད་ལ་འཁང་ར་བྱེད་མཁན་ཧ་ཅང་མང་པོ་བྱུང་ཡོད་པས། ས་གནས་གཞུང་གིས་མི་མང་ལ་བུ་མོ་དེར་ལུགས་མཐུན་གྱི་ཁྲིམས་གཤེར་བྱེད་རྒྱུ་ཡིན་པའི་ཁས་ལེན་བྱེད་དགོས་བྱུང་ཡོད་པ་རེད།།
