བལ་ཡུལ་དུ་བོད་དོན་སྐོར་གྱི་ཚོགས་འདུ།

ཚོགས་འདུའི་ཐོག་ད་ལྟའི་ཆར་རྒྱ་གར་གྲོས་ཚོགས་ཀྱི་ཚོགས་མི་ཡིན་པ་དང་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་བྷེ་རྒྱ་ཤེས་བྷུཤན་ཏེ་བཱ་རེ་དང། རྒྱ་གར་གྱི་ཧིན་བོད་མཛའ་འབྲེལ་ཚོགས་པའི་དྲུང་ཆེ། ཇ་ཧ་ལ་ནེ་རོའི་སློབ་གྲྭ་ཆེན་མོའི་མཁས་དབང་ཨ་ནན་ཀུ་མར། ཧྥ་རན་སི་ནས་བོད་དོན་རྒྱབ་སྐྱོར་བ་ཧྥུ་རན་སེའུ། བལ་ཡུལ་གྱི་འགྲོ་བ་མིའི་ཐོབ་ཐང་ཚོགས་པའི་ཚོགས་གཙོ་སྐུ་ཞབས་སོའུ་ཏེབ། བོད་མི་མང་སྤྱི་འཐུས་ཚེ་བརྟན་ནོར་བུ་སོགས་ཀྱིས་རིམ་པས་བོད་དོན་དང་འབྲེལ་བའི་བརྗོད་གཞི་འདྲ་མིན་སྟེང་གཏམ་བཤད་སྤེལ་ཡོད་པ་དང། སྐབས་དེར་བོད་མི་ཚོའི་བདེན་པའི་འཐབ་རྩོད་དང་ཞི་བའི་ལས་འགུལ་ཁག་ལ་བལ་ཡུལ་གཞུང་དང་མི་མང་གི་ཕྱོགས་ནས་རྒྱབ་སྐྱོར་འཚོལ་ཐབས་བྱེད་རྒྱུ་ནི་གལ་ཆེན་ཡིན་པ་དང། དེ་ཡང་ཐོག་མར་བོད་མི་ཚོས་བལ་བོའི་སྐད་ཡིག་ཐོག་བོད་དོན་སྐོར་གྱི་ཚགས་པར་འདོན་རྒྱུ་དང། བལ་ཡུལ་གྱི་མཐོ་སློབ་ཁག་གིས་གཙོས་སློབ་གྲྭའི་ནང་བོད་བརྒྱུད་ནང་ཆོས་སྡེ་ཚན་དང་བོད་རིགས་པ་སྡེ་ཚན་འཛུགས་རྒྱུ། བལ་པོའི་གྲོས་ཚོགས་དང་མི་མང་ཁྲོད་བོད་ཀྱི་གྲོགས་པོ་དང་མཛའ་འབྲེལ་ཚོགས་པ་འཛུགས་རྒྱུ། ལྷག་པར་བལ་ཡུལ་ཧི་མ་ལ་ཡའི་ནང་པའི་མི་རིགས་ཚོ་ལ་བོད་མི་ཚོས་མཛའ་འབྲེལ་དམ་པོ་འཛུགས་རྒྱུ་སོགས་གལ་ཆེན་ཡིན་པའི་གཏམ་བཤད་བྱས་ཡོད་པ་རེད། ལྷག་པར་མཁས་དབང་ཨ་ནན་མཆོག་གིས་བལ་ཡུལ་གྱིས་སོ་སོའི་རྒྱལ་པོར་མི་སྐྲག་པར་གཞན་པའི་འགྲུལ་པར་སྐྲག་པ་དང། སོ་སོའི་ཨ་པར་མི་བརྩི་བར་ཁྱིམ་མཚེས་ཨ་ཕར་བརྩི་བའི་སྤྱོད་ངན་དེ་དོར་ནས་རང་ཚུགས་ཐུབ་པ་ལ་ཁ་ཕྱོགས་རྒྱུ་གལ་ཆེན་ཡིན་སྐོར་སོགས་ཀྱི་གསུང་བཤད་གནང་ཡོད་པ་རེད།།གནས་ཚུལ་དང་འདྲ་པར་ཀླུ་འབུམ་བཀྲ་ཤེས་ཀྱིས་བཏང།