རང་སྲིད་རང་སྐྱོང་སྐོར་ལ་དགག་སྒྲུབ་བགྲོ་གླེང།
བྷེལ་ཀོབ་ལུགས་བསམ་ས་གནས་མགོ་འཛིན་དགྲ་འདུལ་ལགས་ཀྱིས་སྒྲུབ་ཕྱོགས་ཀྱི་གཏམ་བཤད་བྱེད་སྐབས། “དང་པོ་བོད་མིའི་ཆབ་སྲིད་འཕོ་འགྱུར་གྱི་བརྒྱུད་རིམ་དང་འབྲེལ་རང་བཙན་བློས་གཏོང་བྱས་ཤིང༌། བོད་ཀྱི་ཁོར་ཡུག་དང། མི་རིགས་རིག་གཞུང་སོགས་ཛ་དྲག་གི་གནས་བབས་ལ་གཟིགས་ནས་འཐབ་རྩོད་བྱེད་ཕྱོགས་ཤིག་ཡིན་པ་རེད་”ཅེས་གསུངས་སོང།
དེ་རྗེས་དགག་ཕྱོགས་གཏམ་བཤད་པ་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་དབང་རིག་འཛིན་ལགས་ཀྱིས་“བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་མིན་ནི་པེ་ཅིང་ནས་གང་བྱས་རེད་མ་གཏོགས། ཡིག་ཆ་དང་རྩ་ཁྲིམས་ནང་དུ་གང་ཡོད་མེད་ལ་ཐུག་ཡོད་པ་མ་རེད་”ཅེས་གསུངས་སོང། ད་དུང་ཁོང་གིས་མུ་མཐུད་དུ་གསུང་དོན། “ང་རང་ཚོས་གང་བྱས་པ་ཚང་མ་རྒྱ་ནག་གིས་རྩིས་མེད་གཏོང་གི་ཡོད་པ་རེད། ཁོ་རང་ཚོའི་ཁྲིམས་ཀྱང་རྩིས་མེད་གཏོང་གི་ཡོད་རེད། ཁོ་རང་ཚོས་གང་བྱས་བྱས་རེད། དེ་རིང་འདི་ཁྲིམས་རེད་ཟེར་ན་འགྲིག་གི་རེད། སང་ཉིན་ཁོ་རང་ཚོའི་དགོས་མཁོ་དང་དམིགས་ཡུལ་འགྲུབ་ཀྱི་མེད་ན་དེ་མ་རེད་ཡར་བསྡུས་ཤོག་ལབ་ན་འགྲིག་པ་རེད་”ཅེས་བོད་པས་དགོས་འདུན་དང་རེ་བ་གང་བྱས་ཀྱང་གཙོ་བོ་པེ་ཅིང་གཞུང་འཛིན་པའི་ལག་པར་ཡོད་པ་དང། རྒྱལ་སྤྱི་དང་རྒྱ་ནག་བཅས་ཀྱིས་རྩིས་མེད་གཏོང་གི་ཡོད་པར་བརྟེན། འགྲུབ་ཐབས་མེད་པ་ཞིག་ཡིན་སྐོར་བརྗོད་དེ་དགག་པ་བརྒྱབ་ཡོད་པ་རེད།
བགྲོ་གླེང་གོ་སྒྲིག་པའི་གསལ་བསྒྲགས་ནང་དུ་“རྒྱ་བོད་དབར་གྱི་འཐབ་རྩོད་འདི་དུས་ཡུན་རིང་པོའི་བར་གནས་དགོས་པ་ཆགས་སྲིད་པས་བོད་མི་མང་གི་ངོས་ནས་དེའི་ཐད་ཆབ་སྲིད་གོ་རྟོགས་ཀྱི་ལས་དོན་གནད་སྨིན་སྤེལ་རྒྱུ་སོགས་གྲ་སྒྲིག་ཚགས་ཚུད་ངེས་པར་བྱེད་དགོས་པ་ནི་འདོར་ཐབས་མེད་པའི་ལས་འགན་ཞིག་ཡིན་ལ། མ་འོངས་པའི་ལོ་ཟླའི་ནང་འདས་པའི་ལོ་རྒྱུས་དང༌། ད་ལྟའི་གནས་སྟངས་གཞི་ལ་བཞག་པའི་ཐོག་ནས་བོད་མི་མང་ཚོགས་ལ་མང་ཚོགས་ཀྱི་དམིགས་འདུན་ལངས་ཕྱོགས་ཡོད་དགོས་པ་བོད་ཀྱི་རྩ་དོན་མཐའ་མའི་ཐག་གཅོད་བྱེད་པར་མེད་དུ་མི་རུང་བ་ཞིག་ཡིན་པ་ནན་བརྗོད་བྱེད་ཀྱི་ཡོད་”ཅེས་སོགས་འཁོད་ཡོད་པ་རེད།།
མེ་སོར་གསར་འགོད་པས།
