བླ་མ་ལགས། ད་ཕ་ཡུལ་ལ་ཕེབས་རོགས།
སྡུག་བསྔལ་ལ་ཟད་མཐའ་ཡོད་དགོས་ལ།
བདེ་སྐྱིད་ལ་དབུ་འཁྱུད་བཀོད་རན་པར་བདེན་ན།
རང་རིགས་ཀྱི་བློ་གྲོས་དང་དཔའ་ངར་བསྐྱེད་དེ།
བླ་མ་ལགས། ད་ཕ་ཡུལ་ལ་ཕེབས་རོགས།
ས་མཐའི་མི་རྣམས་ལ་རང་དབང་གི་དམིགས་ཚད་ཡོད།
གཞན་ཡུལ་གྱི་མི་ཚོགས་ལ་གུ་ཡངས་ཀྱི་དམངས་གཙོའང་མཆིས།
མུན་ནག་ཤར་གླིང་དེ་ཁྱེད་ཀྱི་གདུལ་ཞིང་ཡིན་པར་བདེན་ན།
བླ་མ་ལགས། ད་ཕ་ཡུལ་ལ་ཕེབས་རོགས།
འབྲོག་པ་རྒས་པོ་ཁྱེད་སྒུག་ཡུན་རིང་མཐར་ཕྱི་མིའི་ལམ་དུ་བཞུར།
ཞིང་པ་རྒས་མོ་སྐྱོ་གདུང་འཚུབ་ཐེངས་མང་བས་ཨ་ཐང་གཏིང་ནས་ཆད།
ཡོངས་རྫོགས་རེ་བའི་ཤུལ་ཙམ་ལས་ལྷག་མེད་པར་བདེན་ན།
བླ་མ་ལགས། ད་ཕ་ཡུལ་ལ་ཕེབས་རོགས།
མི་ཡུལ་སྐྱིད་ཀྱང་རང་ཡུལ་དོར་ཐབས་མེད།
རང་ཡུལ་སྐྱོ་ཡང་ཕ་མེས་ཀྱི་གཞིས་ཁྱིམ་རེད།
ཁྱེད་གངས་ཅན་པའི་མགོན་སྐྱབས་ཡིན་པར་བདེན་ན།
བླ་མ་ལགས། ད་ཅིས་ནས་ཀྱང་ཕ་ཡུལ་ལ་ཕེབས་རོགས།
བླ་མས་ཞི་བདེའི་གཟིངས་རྟགས་བཞེས་ནས་ལོ་ངོ་ཉི་ཤུ་འཁོར་བའི་དུས་དྲན་ཉིན་བྲིས།