ལས་དབང་བཙན་པོའི་བོད་ཀྱི་ལོ་གསར་གི་སྡོ་རྩིས།
གཞུང་མང་འཛའ་དྲག་ཚོགས་ཆུང་ཟེར་བས་ཆབ་སྲིད་ལམ་ཕྱོགས་གཅིག་ཏུ་གཟུང།།
བཙལ་བྱོའི་ནང་ལ་གོ་སྐབས་དེར་བསྟུན་སྔར་མེད་ཚོགས་པ་མང་པོ་གཙུག།།
༢༠༠༩ལོ་དམར་པོའི་བོད་རིགས་དཔའ་རྟུལ་བརྩོན་འཇུག་སྲོད་ཁྲིམས་བཏང་།།
རྒྱ་གར་སོགས་ལ་དབང་ཡོད་བཤད་ཅིང་བོད་དོན་འབྲེལ་མོལ་འགྱུར་མཚམས་བཅད།།
གོ་ལ་ཧོ་པོའི་འགྱུར་མགྲོས་གཅིག་ལས་རྒྱ་ནག་ཧམ་སེམས་ཇེ་ཆེ་འགྲོ།།
བོད་དེ་རྒྱ་ཁོང་ཡིན་པའི་གསལ་བཤད་སྲིད་འཛིན་མང་པོའི་ཞལ་ནས་བསྒྲགས།།
ལམ་འགྲོན་དོན་ཏུ་བོད་གཞུང་སྤྱི་འཐུས་གྲོས་ཚོགས་འཛུག་སྒྲིག་མ་ཐུབ་ལུས།།
འདི་ལོ་ཁམས་དང་ཨ་མདོ་རྔ་བ་ཕྱོགས་ནས་ལོ་གསར་མི་བཏང་ལས་འགུལ་སྤེལ།།
བཀའ་ཤག་མཆོག་ནས་འདི་ལོ་ལོ་གསར་རྒྱས་སྤྲོས་མ་བཏང་རེ་བཀུལ་བྱས།།
གཞིས་བཞུགས་བོད་མིའི་གནས་སྟངས་བསམ་ན་མྱང་ངན་བྱས་དགོས་དངོས་ཡོད་མཐོང་།།
བོད་རང་དབང་སློབ་ཕྲུག་ཚོགས་པས་ལོ་གསར་དྲ་རྒྱས་བཏང་དགོས་བསྒྲགས།།
ལྷོ་ཕྱོགས་སོགས་སུ་ཚོགས་པ་མང་པོའི་རང་འདོད་ལས་འགུལ་སྣ་ཚོགས་སྤེལ།།
གོ་སྐབས་དམ་འཛིན་ང་ཡང་དེའི་དོན་རྒྱང་ནས་ལྟས་མོ་ལྟ་མཁན་ཡིན།།
གོ་སྐབས་བྱུང་ན་འདི་འདྲའི་དོན་ལ་གསལ་བཤད་ནད་མོ་བྱས་འདོད་བྱུང་།།
གནམ་ལོ་གསར་པའི་ལོ་གསར་ཚུལ་དུ་དྲ་གྲོགས་རྣམས་པར་བྲིས་པ་དགེ།།
