ཁུ་བྱུག་དམར་པོ།
ཚུལ་གསུམ་གྱི་ཉི་མས་གསོ་བའི།།
ལུང་རིག་གི་འདབ་བརྒྱ་གྲོལ་ཚེ།།
འཁོར་འདས་ཀྱི་ཚིག་ལ་མ་ཆགས།།
ཏིང་འཛིན་གྱི་གནས་སུ་འཕུར་ནས།།
བདེན་སྟོང་གི་ཤོག་སྒྲོ་བརྐྱང་ཞིང་།།
སྒྲིབ་གཉིས་ཀྱི་སྤྲིན་རུམ་གཏོར་དང་།།
འོད་གསལ་གྱི་མཁའ་དབྱིངས་ངོས་ན།།
མཛེས་སྡུག་གི་འཇའ་མཚོན་བཀྲ་ཡོང་།།
རིགས་དྲུག་གི་གདུང་བར་གཟིགས་ནས།།
དམ་ཆོས་ཀྱི་གསུངས་དབྱངས་བསྒྲོག་དང་།།
སྐལ་བཟང་གི་བུ་སློབ་མང་པོས།།
བདེ་སྐྱིད་ཀྱི་དཔྱིད་དཔལ་རོལ་ཡོང་།།
སྐྱེས་རབས་ཀྱི་ས་འཛིན་བརྒྱུད་ནས།།
མཁའ་ཁྱབ་ཀྱི་འགྲོ་བ་སྐྱོང་དང་།།
ཐུགས་བསྐྱེད་ཀྱི་རེ་སྨོན་འགྲུབ་ནས།།
འཁོར་སྡུག་གི་མུན་པ་དྭངས་ཡོང་།།