དྷེར་རྡུན་ས་གནས་སུ་སྨོན་ལམ་མཆོད་འབུལ།
ཡིད་སྐྱོ་བའི་གནས་ཚུལ་ཐོས་མ་ཐག་འདི་གར་བྱེས་ཀྱི་གདན་ས་དཔལ་ས་སྐྱའི་ཆོས་སྒར་དུ་ས་སྐྱའི་སྒྲོལ་མ་ཕོ་བྲང་གི་སྐྱབས་རྗེ་༧གོང་མ་འཁོན་གདུང་སྐུ་བགྲེས་གཞོན་རྣམ་གཉིས་དབུ་བཞུགས་ཐོག་བླ་སྤྲུལ་དགེ་འདུན་སུམ་བརྒྱ་ལྔ་བཅུ་ལྷག་འདུ་འཛོམས་ཐོག་སྨོན་ལམ་གསུང་སོང་། སྐབས་དེར་སྐྱབས་རྗེ་༧གོང་མ་འཁོན་གདུང་སྐུ་བགྲེས་རིན་པོ་ཆེས་ཐུགས་ཕམ་དང་བཅས་བཀའ་སྩལ་དོན། དེ་རིང་སྔ་དྲོ་ཁམས་སྐྱེ་དགུ་མདོར་འབྱུང་བཞིའི་གནོད་འཚེ་འོག་མི་བརྒྱ་ཕྲག་མང་པོ་ཚེ་སྲོག་ཤོར་ཡོད་རེད། དེར་བརྟེན་དགེ་འདུན་པ་ཚང་མས་དམིགས་པ་བསྒྲིམས་སྟེ་འདས་པོ་དེ་རྣམས་ཀྱིས་ཚེ་རབས་ནས་བྱས་བསགས་སྡིགས་ལྟུང་ཐམས་ཅད་དག་ནས་རྣམ་མཁྱེན་རྒྱལ་བའི་གོ་ཕང་རིན་པོ་ཆེ་འཐོབ་ཐུབ་པའི་ཐུགས་སྨོན་གནང་རོགས་གནོང་ཞེས་ཅེས་བཀའ་བསྩལ་སོང། དེ་བཞིན་དུ་དྷེར་རྡུན་མངའ་ཁུལ་དུ་ཡོད་པའི་ས་དགོན་ཁག་དང་བཙུན་དགོན་རིན་ཆེན་ཆོས་གླིང་བཅས་སོ་སོར་ཡིད་སྐྱོ་བའི་གནས་ཚུལ་དེ་ཐོས་ཕྲལ་ཞབས་རིམ་དང་སྨོན་ལམ་ཚོགས་བཞིན་རེད་འདུག དེ་མཚུངས་སྤོན་ཊ་ས་གནས་པུ་རུ་ཝ་ལ་ས་སྐྱ་མ་དགོན་ནས་ཀྱང་བླ་སྤྲུལ་དགེ་འདུན་བརྒྱ་ཡས་མས་ཤིག་ནས་སྨོན་ལམ་དང་མཆོད་འབུལ་རྒྱ་ཆེན་ཞུ་བཞིན་རེད་འདུག
