གཡུང་དྲུང་བོན་གྱི་བགྲོ་གླེང་ཐེངས་བཅུ་གཅིག་པ།
ད་ལོ་ ༢༠༡༠ ཟླ་ ༦ ཚེས་ ༡༧ ནས་ ༢༣ བར་གཡུང་དྲུང་བོན་གྱི་སྐོར་བགྲོ་གླེང་ཐེངས་བཅུ་གཅིག་པ་དེ་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་གི་གཡུང་དྲུང་བོན་གྱི་དཔེ་མཛོད་ཁང་ཆེན་མོར་ཚོགས་གནང་ཡོད་པ་རེད། བགྲོ་གླེང་གི་དབུ་མཇུག་མཛད་སྒོ་གཉིས་ཀར་༸སྐྱབས་རྗེ་རྒྱལ་བ་སྨན་རི་བ་མཆོག་དངོས་སུ་ཞབས་སོར་བཀོད་གནང་གིས་ལེགས་ཉེས་བླང་དོར་དང་། ཉམས་མྱོང་དགེ་ཕན་སྐོར་གྱི་ཞལ་གསུང་བཀའ་སློབ་ཀྱི་བཀའ་དྲིན་སྨིན་སོན་བྱུང་ཡོད་པ་དང་། བགྲོ་གླེང་དངོས་གཞིའི་སྐབས་གསུང་བཤད་སློབ་དཔོན་བཤད་སྒྲུབ་མཁན་པོ་དགེ་བཤེས་གཤེན་བསྟན་རབ་གསལ་དང་། བཤད་སྒྲུབ་སློབ་དཔོན་དགེ་བཤེས་ཉི་མ་དོན་གྲུབ། སྣང་རྒྱལ་དགེ་བཤེས་ཤེས་རབ་དགེ་ལེགས། སྡེ་དགེ་བ་དགེ་བཤེས་སྦྱིན་པ་ཚེ་བརྟན། བོན་སྤྱི་ཁྱུང་དཀར་དགེ་བཤེས་སྨོན་ལམ་མཐར་ཕྱིན་བཅས་ཀྱིས་གོ་རིམ་བཞིན་སྙིང་པོ་རྣམ་གསུམ་གྱི་སྐོར་དང་། བོན་གྱི་ཐུན་མོང་མ་ཡིན་པའི་འདོད་ཚུལ། ཞང་ཞུང་གི་སྐད་ཡིག་སྐོར། རླུང་རྟ་དང་དར་ལྕོག་སྐོར། ས་སྐྱ་བ་ནས་དགའ་ལྡན་ཕོ་བྲང་བར་གྱི་གཞུང་དང་བོན་གྱི་འབྲེལ་བའི་སྐོར་བཅས་ལ་ཉིན་རེ་བཞིན་འགྲེལ་བརྗོད་དང་། སློབ་མ་རྣམས་ཀྱི་དོགས་འདྲི་ལ་ལན་འདེབས་དང་གསལ་བཤད། སློབ་ཕྲུག་ནང་ཁུལ་རིག་རྩལ་འགྲན་པའི་གླེང་སྟེགས། ཆེད་དུ་གདན་འདྲེན་ཞུས་པའི་མི་སྣ་ཁག་གི་སྐབས་བསྟུན་གཏམ་བཤད། ཞང་བོད་ཡིག་གཟུགས་དང་རྩོམ་རིག་འགྲན་བསྡུར། སློབ་མ་རྣམས་ཀྱིས་བགྲོ་གླེང་གི་དགེ་ཕན་མྱོང་ཚོར་སྐོར་ཡིག་ངག་ཅི་རིགས་ནས་གླེང་བ་བཅས་སྡེ་ཚན་སྣ་མང་འཛོམས་པའི་བགྲོ་གླེང་དེ་ཉིད་གཡུང་དྲུང་བསྟན་པ་རྒྱས་པའི་སྨོན་ལམ་གྱིས་མཚམས་སྦྱར་ཏེ་ལེགས་གྲུབ་བྱུང་ཡོད་པ་རེད། ད་ལན་གྱི་བགྲོ་གླེང་ནང་མཐོ་སློབ་དང་འབྲིང་སློབ་བཅས་ཁྱོན་སློབ་མ་ ༡༥༠ ལྷག་མཉམ་ཞུགས་གནང་ཡོད་པ་བཅས་ཀྱི་གནས་བསྡུས་སུ།། ཐ་ཚན་མུ་ཙུག་སྨར་རོ། །
