རྟའུ་ཞེས་པའི་མིང་ལ་ཅུང་ཟད་དཔྱད་པ།

 

ཞེས་ཚིགས་སུ་བཅད་པ་དབྱངས་ཀྱི་མཆོད་པ་འབུལ་བ་སྔོན་དུ་བཏང་ནས་གང་བཤད་པར་བྱ་བ་རྟའུ་ཞེས་པའི་ལུང་པའི་མིང་དེ་ནམ་བྱུང་ཞིང་དེ་ལྟར་མིང་ཐོགས་ཚུལ་སོགས་སྔོན་གྱི་རྒན་པོའི་ངག་རྒྱུན་གཞིར་བཞག་ཅིང་ལུང་དང་རིགས་པས་མཐའ་བརྒྱན་ཏེ་ཚད་ལྡན་གྱི་ལོ་རྒྱུས་མཁས་པའི་ཐུགས་དགྱེས་པའི་གཏམ་དུ་འགྱུར་བའི་ཐབས་ལ་ཅི་ནུས་ཀྱིས་འབད་དེ་འབྲི་བར་བྱའོ།།

དེ་ཡང་བོད་གངས་ཅན་པའི་ཤར་ཕྱོགས་དང་རྒྱ་ནག་གི་ནུབ་བྱང་དུ་གནས་པའི་རྟའུ་ཤོད་ཆེན་ལྗོངས་ཞེས་པ་དེར་རྟའུ་ཞེས་པའི་མིང་ཇི་ལྟར་ཐོགས་སམ་ཞེ་ན། དུས་རབས་བདུན་པའི་ནང་ཆོས་རྒྱལ་སྲོང་བཙན་སྒམ་པོས་རྒྱ་བཟའ་ཁབ་ཏུ་བཞེས་པའི་སྐབས་རྟའུ་ཞེས་པའི་ལུང་པའི་མིང་དེ་ཉིད་ཐོག་མར་རྙེད་པར་འདོད། དེ་ཡང་ཆོས་རྒྱལ་གྱིས་བཀའ་མངགས་ལྟར་བློན་ཆེན་མགར་སོགས་ཀྱིས་རྒྱ་ནག་ནས་རྒྱ་བཟའ་ཀོང་ཇོ་བསུས་ཏེ་བོད་དུ་ཕེབས་ཡོང་སྐབས། རྟའུ་ནགས་ཕྲན་ཆ་ད་ལྟའི་གླིང་གེ་སར་གྱི་སྦྲ་མལ་ཡོད་སའི་ཡར་ཙམ་དུ་རྟའུ་དམེ་རྗེ་ཧེ་ཁ་ཟེར་བ་དེར་སླེབས་པ་དང༌། བློན་ཆེན་མགར་གྱིས་འགྲོ་ལམ་བལྟས་པས་ལུང་པ་འདིའི་ནང་འགྲོ་མི་ཉན་དེ་ནི་རྟའི་ཁོག་པ་ལྟར་ཀྱག་ཀྱོག་མང་ཞིང་ལུང་མདོར་མཚོ་ཆེན་པོ་ཞིག་ཀྱང་འདུག་པས། ཧ་ཅང་གི་བགྲོད་དཀའ་དེ་ལས་གཡི་ཁོག་ཏུ་འགྲོ་ན་གཅན་གཟན་གཡི་ཡི་ཁོག་པ་ལྟར་རྒྱ་ཆུང་ཞིང་བགྲོད་བདེ་ཞེས་གསུངས་ཏེ་རྟའུའི་ཁ་འབྲོག་ཆེ་ཤོས་གཡི་ཁོག་ནས་ཕེབས་ཡོད་པ་རེད།དེ་ནས་བཟུང་ལུང་པ་འདི་ལ་སྐབས་དེར་རྟ་ཁོག་ཟེར་ཞིང༌། ཁ་འབྲོག་དེ་ལ་གཡི་ཁོག་ཅེས་མིང་གཏན་དུ་ཆགས་པ་རེད། དུས་ཕྱིས་སུ་རྟའུའི་ལུང་སྐད་དར་རྗེས་རྟའུ་བས་ཁོག་པ་ལ་འུ་ཟེར་གྱི་ཡོད་སྟབས་རིམ་བཞིན་སྐད་འགྱུར་ཏེ་རྟའུ་ཞེས་ཆགས་སོང་བ་རེད། དེ་ཡང་རྟ་ཞེས་པ་བོད་སྤྱི་སྐད་རང་སོར་གནས་ཤིང་ཁོག་པ་ཞེས་པ་འུ་ཞེས་རྟའུ་སྐད་དུ་བསྒྱུར་བའམ་རང་བཞིན་གྱི་འགྱུར་བ་ཞིག་ཡིན་པ་ཐག་བཅད་ཆོག་པ་ཞིག་རེད།

དེ་ལྟ་བུའི་བོད་སྤྱི་སྐད་དང་རྟའུ་སྐད་འདྲེས་མས་མིང་དུ་གྲུབ་པ། དཔེར་ན། འོ་ཇ་ལ་ལྷུ་ཇ་དང།ཚྭ་ཕོར་ལ་ཚྭ་ཥུ།ལྕགས་སྒམ་ལ་ཅོ་སྒམ། གསེར་གྱི་ཨ་ལོང་ལ་གསེར་ལོང་ཐུག གསེར་གྱི་ལག་གདུབ་ལ་གསེར་ལད་ཀེ། ཕ་བུ་ལ་ཕ་ཟི། མ་བུ་ལ་མ་ཟི། སྒོ་སྲུང་ལ་འ་སྲུང་། ཁྱིམ་སྲུང་ལ་ཡོ་སྲུང་། སྟག་ཕྲུག་ལ་སྟག་ཟི། གཟིག་ཕྲུག་ལ་གཟིག་ཟི། ཁྱི་ཕྲུག་ལ་ཁི་ཟི་སོགས་དཔྱད་ན་ཤིན་ཏུ་མང་པོ་ཡོད་དོ།།

དོན་དངོས་མ་ཐོག་རྟའུ་ཞེས་པའི་མིང་ཐོགས་སྟངས་བཤད་ཟིན་པ་ལྟར་ཡིན་ན་ཡང་ད་དུང་ཡང་མིའི་བཤད་ཚུལ་གཞན་པ་འོག་ཏུ་རིམ་པར་འགོད་རྒྱུ་དང་རང་ཉིད་ཀྱིས་ཀྱང་དེའི་ཐད་ཅུང་ཟད་བརྟག་ཞིབ་བྱ་རྒྱུ་ཡིན།

ངའི་བསམ་ཚུལ་ལ་རྒྱལ་རོང་དགེ་བཤེས་རྩའི་རྒྱལ་པོའི་མངའ་འོག་དགེ་བཤེས་ས་པ་ཟེར་བའི་གྲོང་ཚོ་ཞིག་ཡོད་པ་དང་། གྲོང་ཚོ་དེ་ནས་རྟའུ་ཕྱོགས་སུ་ཕར་བལྟས་ན་རྟ་པ་ལ་ཟེར་བའི་རི་ཞིག་ཡོད། རི་དེ་ལ་རྒྱང་ལྟ་བྱེད་སྐབས་རི་དེའི་རྩེ་མོ་ནི་རྟའི་རྣ་བ་དང་ཨ་ན་མ་ན་མཐོང་གི་ཡོད་སྟབས། རི་དེ་ལ་རྟ་པ་ལ་ཞེས་ཟེར་གྱི་ཡོད་ལ། རྟ་པ་རིའི་ཕར་རྒྱབ་ན་རྟའུ་

ཡོད་ཅིང་དེར་གནའ་སྔ་མོ་རྒྱལ་རོང་བའི་དྲེལ་པ་དང་མཛོ་པ་སོགས་འགྲིམ་འགྲུལ་རྒྱུ་ལམ་གཙོ་བོ་དེ་རྟ་པ་ལ་བརྒྱུད་ནས་རྟའུ་ལུང་ཕུག་ལུང་པ་འགྲིམས་ཏེ་སྟོད་ཉི་མ་ལྷ་སར་འགྲོ་དགོས་པ་དང༌། དུས་དེའི་རྒྱལ་རོང་བ་ཚོས་རྟ་པ་རིའི་རི་རྒྱབ་ན་འུ་འཐེ། འུ་ཤུ། འུ་འགྱུ་ར། འུ་འཇུ་ཅད། འུ་ཀེའམ་འུ་ཕྱོ། འུ་རྒུ་མད། འུ་སྐྱོ་གྱོ། འུ་ཐུ་པད། འུ་འཐུག འུ་རུ། འུ་མད། འུ་གཅར་(རིམ་བཞིན་ཐུངས་ཤིག་དང་། ཕར་སོང་། རྒྱུགས་ཤིག འཐེན་ཅིག དེད་ཅིག ཕོངས་ཤིག རྗེས་འདེད་ཐོངས། ཕུད་ཅིག ཆུགས་ཤིག བླུགས་ཤིག བུས་ཤིག གཅོར་ཅིག)སོགས་སྐུལ་ཚིག་ཚིག་གྲོགས་སུ་སྐུལ་ཚིག་རེའི་འགོར་འུ་ཞེས་པའི་ཚིག་གྲོགས་རེ་སྦྱར་ཏེ་གཏམ་ཤོད་མཁན་གྱི་མི་དེ་དག་ལ་དེའི་ཕར་རྒྱབ་ན་ཡོད་པས། རྟ་པ་ལའི་རྟ་དང་བྱ་ཚིག་ཚིག་གྲོགས་ཀྱི་འུ་ཟེར་བ་དེ་གཉིས་གཅིག་ཏུ་སྦྱར་ནས་རྟའུ་ཞེས་རྒྱལ་རོང་བས་རྟའུ་ལུང་པའི་མིང་དེ་ལྟར་བཏགས་སམ་སྙམ། རྒྱུ་མཚན་ནི་

རྒྱལ་རོང་བས་རྟ་པ་ལའི་ཕར་རྒྱབ་སྐད་མི་འདྲ་བ་བྱ་ཚིག་མང་ཆེ་བའི་མགོར་འུ་ཞེས་ཟེར་མཁན་གྱི་མི་དེ་འདྲ་ཡོད་པས།

རྟ་པ་ལའི་རྟ་དང་སྐུལ་ཚིག་ཚིག་གྲོགས་འུ་ཟེར་བ་གཉིས་གཅིག་ཏུ་སྦྱར་ནས་ལུང་པ་དེའི་མིང་ལ་རྟའུ་དང་། ལུང་པ་

དེའི་མི་ལ་རྟའུ་བ་ཞེས་ཟེར་བ་རེད་ཅེས་བཤད་ན་ཕལ་ཆེར་སྐྱོན་མེད་པ་འདྲ་ཞིག་རེད།

ས་ཁུལ་དེ་མཐོ་ས་ནས་གཤམ་ཏུ་རྒྱང་ལྟ་བྱེད་དུ་རྟ་དང་འདྲ་བར་བརྟེན་ནས་མིང་དེ་ཐོགས་ཤིང་རྟ་ཡི་རྟེའུ་ལ་གོ། ཞེས་དཀར་མཛེས་ཁུལ་གྱི་ 2004 ལོའི་མི་འབོར་ཞིབ་བཤེར་ཞེས་པར་དེ་འདྲ་བྲིས་འདུག་དེ་དང་ཕྲན་གྱི་ཤོད་ཚུལ་རྗེས་མ་གཉིས་ཕྲན་བུ་འདྲ་ཡང་རྟའི་རྟེའུ་ལ་གོ་ཞེས་པ་ནི་མ་བརྟགས་མ་དཔྱད་པའི་གཏམ་འབའ་ཞིག་ཡིན། རྒྱ་ནག་གི་ 新浪网ཟེར་བའི་དྲ་རྒྱ་འདི་ཐོག་ཡང་ཤོད་ཚུལ་ཞིག་ལ། མི་ཉག་གངས་དཀར་རི་གཤམ་དུ་རྔོན་པ་ཞིག་གིས་རྟ་རྒོད་མ་ཞིག་དང་རྟེའུ་ཞིག་རྩྭ་ཟ་བཞིན་ཡོད་པ་མཐོང༌། མདའ་འཕངས་ཏེ་རྒོད་མ་བསད་ཀྱང་རྟེའུ་བྲོས་བས་རྗེས་འདེད་བཏང་ནས་ས་ཆ་ཞིག་ཏུ་སླེབས། དེ་ནི་ས་སྐྱིད་ཅིང་རྩྭ་འབོལ་པོ་ཆུ་བཟང་བ་ཞིག་མཐོང་ནས་ཡུལ་དེའི་མིང་ལ་རྟའུ་ཞེས་ཐོགས་སོ།།

རྒྱ་སྐད་ཐོག་རྟའུ་ལ་ཏོ་ཕྷུག་ཅེས་ཟེར་བ་ནི་ཟུར་ཆག་གི་མིང་ཡིན། དཔེར་ན། 新浪网 དྲ་རྒྱ་འདིའི་ཐོག་རྒྱས་སྤྱི་ལོ་1911ཡན་དུ་རྒྱ་སྐད་ཐོག་ཀྱང་རྟའུ་道坞ཞེས་ཟེར་གྱི་ཡོད་ཀྱང༌ཚིག་དོན་དེ་མི་ལེགས་པར་མཐོང་ནས། སྤྱི་ལོ་1912ལོར་གོ་མིན་ཏང་གིས་རྫོང་ཐོག་མར་བཙུགས་ཤིང་མིང་ཡང་ཕྱེད་ཀ་བརྗེ་བསྒྱུར་གྱིས་ཏོ་ཧྥུག་道孚ཅེས་པ་རྒྱའི་ཚིག་གི་ནང་དུ་དོན་བཟང་པོ་ཞིག་ལ་གོ་རྒྱུ་ཡོད་པས་དེ་ལྟར་བཟོས་ཡོད་ཅེས་བཤད། ཡང་སྤྱི་ལོ་1936དམར་དམག་ཐོག་མར་འབྱོར་ནས་朱德、刘伯承，徐向前སོགས་ཀྱིས་མིང་གསར་པ་དེ་རང་འཇགས་བཞག་སྟེ་རྟའུ་རྫོང་མི་མང་སྲིད་གཞུང་ཐོག་མར་བཙུགས། སྤྱི་ལོ་1989ལོར་རྟའུ་རྫོང་རྒྱ་བསྐྱེད་བཏང་ནས་མི་ཉག་པ་ཕྱེད་ཀ་ཙམ་རྟའུ་རྫོང་ཁོངས་སུ་བཙུད་དེ་ས་གཞི་ཡོངས་ཀྱི་ཁྱབ་ཚད་ཕུག་ཁྲི་7546དང་། མི་འབོར་48000ཙམ་ཡོད་པ་ཡིན། དེའི་ནང་བོད་རིགས་དང་། རྒྱ་རིགས། ཆངས་རིགས་སོགས་མི་རིགས་16ཙམ་ཡོད་ཀྱང་བརྒྱ་ཆ་89བོད་རིགས་ཡིན་ཞེས་འཁོད།

ཡང་མི་མང་པོ་ཞིག་གིས་ཨ་མདོ་ཕྱོགས་ཀྱི་རྟ་བོ་དང༌། རང་རེའི་ཁམས་རྟའུ་གཉིས་ནོར་གྱི་ཡོད།གདན་ས་ཆེན་མོ་དཔལ་ལྡན་འབྲས་སྤུངས་དགོན་པའི་རྟ་བོ་མི་ཚན་ནི་སྒོ་མང་གྲྭ་ཚང་གི་ཁོངས་སུ་གཏོགས་ཤིང༌། རྟའུ་མི་ཚན་ནི་མཁས་མང་བློ་གསལ་གླིང་གྲྭ་ཚང་གི་ཡ་གྱལ་ཏྲེ་ཧོར་ཁང་ཚན་གྱི་ཁོངས་སུ་གཏོགས་ལ། ཡང་གླིང་གེ་སར་རྒྱལ་པོའི་སྒྲུང་ཆེན་འཇང་གླིང་ཞེས་པར་ཧོར་ཤན་པ་རྨེ་རུ་རྩེས་འཇང་གཡི་ལྷ་ཐོགས་འགྱུར་བཟུང་སའི་རྟའུ་ཚ་མཚོ་དཀར་མོ་ཟེར་བ་དེ་ཁམས་རྟའུ་མ་རེད་ཨ་མདོ་རྟ་བོ་རེད་ཟེར་བ་དེ་ཡང་བདེན་པར་འཛིན་དཀའ་སྟེ། སྒྲུང་ཡིག་ཏུ་རྟའུ་ཚྭ་མཚོ་དཀར་མོ་ཞེས་བྲིས་པ་ལས་རྟ་བོ་ཚྭ་མཚོ་དཀར་མོ་ཞེས་བྲིས་མེད་པས་ལུང་པ་དེ་གཉིས་ཀྱི་མིང་གི་དག་ཆ་ལ་བལྟས་ན་ཤེས་ནུས། ད་དུང་རྟའུ་ཚྭ་མཚོ་དཀར་མོ་ཞེས་པ་ནི་ལྷོ་རི་གཡག་སྙིང་གི་རི་འདབ་གྲུ་ཕུག་གྲོང་པའི་ལྷོ་ངོས་སུ་ཡོད་ཅིང་། མཚོ་དེའི་ཆུ་འཐུང་ན་ཚྭ་ཁུ་ཡིན་པས་ཚྭ་ཞེས་ཟེར་ལ། ཚེས་བཟང་དུས་བཟང་གི་སྐབས་མཚོ་དེའི་ཆུ་མདོག་འགྱུར་ནས་འོ་མའི་ཁ་དོག་ལྟར་ཆགས་ཀྱི་ཡོད་པས་དཀར་མོ་ཞེས་ཟེར།སྤྱིར་རྟའུ་ཡི་ཡུལ་དུ་ནི་གླིང་གེ་སར་སྐབས་ཀྱི་གནས་ཚུལ་ཤོད་རྒྱུ་མང་པོ་ཡོད། གྲུ་ཕུག་ལུང་པར་སྟག་རོང་དཔོན་པོ་ཁྲོ་ཐང་ཚང་གི་མཁར་མཇལ་རྒྱུ་ཡོད་ལ། དེང་སང་ཡུལ་དེའི་གྲོང་པའི་མིང་ལ་སྟག་མཁར་གྲོང་པ་ཞེས་ཟེར། སྟག་མཁར་ཚང་ཟེར་བའི་མི་ཚང་ཞིག་ཀྱང་ཡོད། ཁྲོ་ཐུང་གི་མི་རྒྱུད་ཡིན་མིན་ནི་མི་ཤེས། ཡང་རྟའུ་ཅོ་ལོ་སྣེར་གེ་སར་རྒྱལ་པོ་འུར་རྡོ་རེད་ཅེས་རྡོ་ཕ་ཝང་ཆེན་པོ་ཞིག་མཇལ་རྒྱུ་ཡོད།རིག་གནས་གསར་རྗེ་ཆེན་པོའི་སྐབས་འབར་རྫས་ཀྱིས་གཏོར་ནས་ད་ལྟའི་ཆར་ཤུལ་ཙམ་ལས་མེད། སྒྱོགས་ས་གྲོང་པ་ཞེས་ཡང་གེ་སར་རྒྱལ་པོས་སྒྱོགས་རྡོ་འཕེན་ས་ཞིག་ཀྱང་ཡོད།རྟའུ་ནག་ཕྲན་ཆར་གེ་སར་སྦྲ་མལ་ཟེར་བའི་གླིང་གེ་སར་རྒྱལ་པོའི་སྦྲ་ཕུག་ས་རྩྭ་ཐང་ཡངས་ཤིང་རྒྱ་ཆེ་བ་ཞིག་ཀྱང་ཡོད། ད་དུང་མ་འབྲུག་མོས་ཇ་རྡུང་ས་དང་། དབུ་སྐྲ་བཀྲུས་ས། གེ་སར་རྒྱལ་པོའི་བླ་ཙེ་སོགས་ངོས་འཛིན་བྱ་རྒྱུ་ཡོད་དོ།།

མི་ཉག་ལྕགས་ལ་རྒྱལ་པོ་དང་། རྒྱལ་རོང་དགེ་བཤེས་རྩའི་རྒྱལ་པོ། ཧོར་ནམ་མཁའ་རྒྱལ་མཚན་སོགས་ཀྱི་གོང་དུ་རང་རེའི་ཡུལ་ལ་ནི་རྟའུ་ཞེས་ཟེར་གྱི་ཡོད་ལ། བོད་ཀྱི་ལོ་རྒྱུས་གླེང་བའི་གཏམ་ཤོག་གྲངས་༣༡༢ལས། ཁམས་ཕྱོགས་ཀྱི་གནའ་བོའི་ཡུལ་མིང་འགའ་རེ་དཔེར་ན་ཏྲེ་་དང་མདན་དང་རྟའུ་དཀྱུས་ལྟ་བུའང་ཏུན་ཧོང་གཏེར་ཡིག་ཏུ་མཐོང་རྒྱུ་ཡོད་ལ། ཞེས་པར་བལྟས་ན་ཏུན་ཧོང་ཡི་གེ་ནི་སྤྱི་ལོ་༧༨༧ནས་༨༤༧ལོའི་བར་གྱི་ལོ་རྒྱུས་ཡིག་རྙིང་ཡིན་དགོས། དེར་བལྟས་ན་དུས་རབས་བདུན་པའི་དུས་མཇུག་མིན་ནའང་དུས་རབས་བརྒྱད་པའི་དུས་མགོ་མཚོ་དེ་ཡང་རིམ་བཞིན་བྲི་པའམ་ཡང་ན་བཙན་པོའི་དམག་མི་དང་མ་མང་གིས་མཚོ་བསུས་ནས་མིའི་ལུང་པ་ཆགས་པ་ནས་བཟུང་ཡུལ་དེ་ལ་རྟའུ་ཞེས་མིང་ཐོགས་ཡོད་པ་ཐག་བཅད་དེ་བཤད་ཆོག་པ་ཞིག་རེད། གོང་དུ་བཤད་ཟིན་པ་ལྟར་བློན་ཆེན་མགར་གྱིས་འགྲོ་ལམ་ལྟ་སྐབས་རྟའི་ཁོག་པ་ལྟ་བུ་རེད་ཅེས་བཤད་པ་ནས་བཟུང་ལུང་པའི་མིང་གི་ས་བོན་ཙམ་གྲུབ། དེའི་གོང་དུ་རྟ་ཤུལ་ཞེས་ཟེར་གྱི་ཡོད་པ་དང་། དུས་ཕྱིས་སུའང་རྟ་ཤུལ་ཞེས་འབོད་མཁན་ཡོད་དེ། ཆོས་ཉིད་སྒྱུ་མར་རོལ་པའི་སྣང་ལམ་གསང་བ་ཉམས་བྱུང་གི་རྟོགས་བརྗོད་གསལ་བའི་མེ་ལོང་ ཤོག་གྲངས་གསུམ་པ་དང་བཞི་པའི་རྒྱབ་ཏུ།འདྲ་ལྕགས་ཁུང་ཞེས་པ་རྒྱ་མིས་ལྕགས་བརྐོ་པའིི་ཁུང་ བུ་ཡོད་པ་ལ་ཡུལ་གྱི་མིང་དུ་གྲགས་པའི་སྟོད་དུ་གནས་སོ།།

འདྲ་ལྕགས་ཁུང་ཞེས་པ་ཡུལ་གང་དུ་གཏོགས་ཤེ་ན་དེ་ནི་སྨད་མདོ་ཁམས་སྒང་དུག་གི་ཡ་གྱལ་ཤར་མི་ར་བ་སྒང་གི་སའི་ཐིག་ལེ།་ཁམས་ཀྱི་གནས་ཆེན་ཉི་ཤུ་རྩ་ལྔའི་ཡ་གྱལ། སྦ་ཞབས་བྲག་དཀར་རམ། ཝ་ཞེས་སེང་གེ་བྲག་དཀར་ཞེས་སྔོན་དུས་སྤ་མི་ཕམ་མགོན་པོས་ཧེ་རུ་ཀའི་སྒྲུབ་གནས་སུ་བྱིན་གྱིས་བརླབས་པ་དེའི་གཡས་ཕྱོགས་ནས་བབས་པའི་ཆུ་བོའི་རྒྱུན་དང་ལྡན་པ་ལ་འདྲ་ལྕགས་ཁུང་བ་ཞེས་གྲགས་པ་དེའམ་ཡུལ་དེར་གནས་པའི་གྲོང་ཁྱེར་བ་རྣམས། སྟོད་ཕྱོགས་རྒྱང་འབྲོག་པ་རྣམས་ལའང་སྤྱི་མིང་ལྕགས་ཁུང་བ་ཞེསསྦ་ཞབས་བྲག་དཀར་རམ། ཝ་ཞེས་སེང་གེ་བྲག་དཀར་ཞེས་སྔོན་དུས་སྤ་མི་ཕམ་མགོན་པོས་ཧེ་རུ་ཀའི་སྒྲུབ་གནས་སུ་བྱིན་གྱིས་བརླབས་པ་དེའི་གཡས་ཕྱོགས་ནས་བབས་པའི་ཆུ་བོའི་རྒྱུན་དང་ལྡན་པ་ལ་འདྲ་ལྕགས་ཁུང་བ་ཞེས་གྲགས་པ་དེའམ་ཡུལ་དེར་གནས་པའི་གྲོང་ཁྱེར་བ་རྣམས། སྟོད་ཕྱོགས་རྒྱང་འབྲོག་པ་རྣམས་ལའང་སྤྱི་མིང ལྕགས་ཁུང་བ་ཞེས་ཟེར།ཞེས་གསུངས་པ་ནི་རང་རེའི་རྟའུ་སྦ་ཞབས་ཀྱི་ཕྱོགས་སུ་ཡོད་པ༷འི་འདྲ་ལྕགས་ཁུང་ཡིན་པ་ཐག་ཆོད་ཅིང་དོགས་པ་ཡང་མི་དགོས་ལ། ཡང་དེ་ཉིད་ཀྱི་ཤོག་གྲངས་༥༣རྒྱབ་ཏུ་དེ་ནས་རང་ལོ་ཉེར་དྲུག་ལ་བབས་ཚེ། བུ་ཆུང་རྟ་ཤུལ་གྱི་ནང་དུ་རྙེད་ཚོལ་ལ་ཕྱིན་ཚེ་མཁའ་འགྲོའི་ལུང་བསྟན་མང་དུ་བྱུང་བ་ཐམས་ཅད་ཐོག་ཏུ་མི་ཁེལ་བ་གཅིག་ཀྱང་མ་བྱུང་ངོ། ཞེས་གསུངས་པ་དང་། ཡང་དེ་ཉིད་ལས་རྟ་ཤུལ་གོང་མའི་བུམ་སྒྲུབ་བྱས་ཚེ་ཡང་ནུབ་གཅིག་གི་རྨི་ལམ་ན་ཞེས་གསུངས་པ་དང་ཡང་དེ་ཉིད་ཀྱི་ཤོག་གྲངས་༥༣ལས།དེ་ནས་རང་ལོ་ཉེར་དྲུག་ལ་བབས་ཚེ།་་་བུ་ཆུང་རྟ་ཤུལ་གྱི་ནང་དུ་རྙེད་ཚོལ་ལ་ཕྱིན་ཚེ་མཁའ་འགྲོའི་ལུང་བསྟན་མང་དུ་བྱུང་བ་ཐམས་ཅད་ཐོག་ཏུ་མི་ཁེལ་བ་གཅིག་ཀྱང་མ་བྱུང་ངོ།།གོང་ལུང་སྔ་ཕྱི་གཉིས་ནས་རྟ་ཤུལ་ཟེར་བ་དེ་རྟའུའི་ནང་དུ་ཡིན་ན་སྔོན་ཆད་རྟ་ཤུལ་ཞེས་ཟེར་གྱི་ཡོད་པའི་བདེན་དཔང་ཞིག་རྙེད་པ་ཡིན། འོན་ཀྱང་བླ་མ་འདིའི་འཁྲུངས་ཡུལ་ནི་གསེར་རྟ་དང་རྟའུ་གང་ཡིན་བརྟག་དགོས་ལ། གསེར་རྟའི་ནང་དུ་རྟ་ཤུལ་གོང་མ་དང་། རྟ་ཤུལ་རུ་ཐལ་མ་ཟེར་བ་སོགས་རུས་རྒྱུད་མང་པོ་ཡོད་ཅེས་གསེར་རྟ་ཚུལ་ཁྲིམས་ལགས་ཀྱིས་འགྲེལ་བརྗོད་གནང་བ་ལ་བལྟས་ན་ད་དུང་རྟ་ཤུལ་ཟེར་བ་དེ་རྟའུ་ལ་ཟེར་བ་ཡིན་གསེར་རྟའི་རྟ་ཤུལ་ཟེར་བ་ཡིན་བརྟག་དགོས། སྤྱིར་རུས་རྒྱུད་ཟེར་བ་དེ་ཡུལ་གཅིག་ཏུ་ངེས་པ་ཞིག་མིན་ལ། བདུད་འཇོམས་ཁྲག་འཐུང་གླིང་པའམ་བདུད་འཇོམས་རྡོ་རྗེ་གྲོད་ལོ་ནི་དུས་རབས་བཅུ་དགུ་པའི་དུས་མཇུག་ཏུ་ཕེབས་པ་ཞིག་རེད། གལ་ཏེ་རྟ་ཤུལ་ཞེས་རྟའུའི་རུས་རྒྱུད་ཅིག་ལ་ཟེར་བ་ཡིན་ན་སྐབས་དེར་ཡང་ད་དུང་རྟ་ཤུལ་ཞེས་འབོད་མཁན་ཡོད་པ་ལ་བལྟས་ཀྱང་སྔོན་ཆད་རྟ་ཤུལ་ཟེར་གྱི་ཡོད་པ་ཤེས་ནུས། ཁོང་གི་རུས་ཁུངས་རྟའུའི་ཡུལ་མཐའ་ལྕགས་སྐོང་ཟེར་ས་ཡིན་པས་ས་ཁུག་ཀྱོག་ཏུ་བརྡ་རྙིང་མང་དུ་ལུས་པ་དེའང་ཡོངས་གྲགས་ཤིག་ཡིན། སྤྱིར་བཏང་རུས་མིང་དེ་འབྲོག་སར་དར་ཁྱབ་ཆེ་ཞིང་རོང་པས་དེ་ཙམ་རུས་མིང་ལ་དོ་སྣང་སྤྲོད་ཀྱི་མེད་པའི་རྒྱུ་མཚན་གྱིས་རྟའུའི་ནང་དུའང་དུས་རབས་བདུན་པའི་དུས་སྟོད་དུ་རྟའུ་ལ་རྟ་ཤུལ་ཟེར་གྱི་ཡོད་པའི་བདེན་རྟགས་དེང་སང་གི་རྟའུའི་ནང་དུ་རྙེད་དཀའ་བ་དེ་ཡང་རྟ་ཤུལ་ཞེས་པའི་རུས་རྒྱུད་མེད་པའི་རྒྱུ་མཚན་དུ་མི་འགྲོ་སྟེ།སྔོན་ཆད་རྟའུ་བས་དོ་སྣང་མ་བྱས་པའི་ཕྱིར། རྟ་ཤུལ་ཞེས་ཟེར་དགོས་དོན་ནི་རྟའུ་བ་ནི་ལྡོངས་རིགས་ཡིན་པའི་རྟགས་མཚན་གསལ་པོ་ཞིག་ཡིན་ལ་རྟའུ་བ་བྱིངས་ནི་ལྡོངས་རིགས་ཡིན་པས་རྟ་ཤུལ་གྱི་རིགས་རྒྱུད་དེའང་ལྡོངས་རིགས་དར་རྒྱས་ཆེ་ས་ཞིག་ཏུ་ཡོད་སྙམ། རྟ་ཤུལ་ཞེས་པ་དེ་ལྡོངས་ཤུལ་ཆེན་བཅོ་བརྒྱད་ཀྱི་ནང་དུ་རྟ་ཤུལ་ཟེར་བ་དེ་ཡིན་ནོ།།

ཁམས་གསེར་རྟར་རུས་མིང་འདྲ་ལྕགས་ཁུང་ཞེས་པ་ནི་རྟའུའི་འདྲ་ལྕགས་ཁུང་གི་ཡུལ་ནས་གསེར་རྟར་མཆེད་པའི་མི་རྒྱུད་ལ་ཟེར་བ་ལྟར།ཁམས་གསེར་རྟའི་རྟ་ཤུལ་ཟེར་བའི་རུས་རྒྱུད་དེ་ཡང་རྟའུ་ནས་ཡར་མཆེད་པའམ་ཡང་ན་གསེར་རྟ་ནས་མར་མཆེད་པ་ཡིན་དེ་ཡང་བརྟག་དགོས་པའི་གནས་ཤིག་ཡིན།གལ་ཏེ་མར་མཆེད་པ་ཡིན་ན་དུས་རབས་བདུན་པའི་དུས་སྟོད་ཙམ་ནས་མཆེད་པ་ཞིག་ཡིན་དགོས་པའི་ཆེས་སྔ་ལ།གསེར་རྟར་ཡར་མཆེད་པ་ཞིག་ཡིན་ན་དེ་ལྟར་དུས་ཡུན་རིང་པོ་ཞིག་སོང་མེད་སྙམ་མོ།།

བློན་ཆེན་མགར་གྱིས་རྟའི་ཁོག་པ་ལྟ་བུ་ཞེས་གསུངས་དོན་ཡང་སྐབས་དེར་ལུང་པ་དེ་ལ་རྟ་ཤུལ་ཟེར་གྱི་ཡོད་པའི་བདེན་རྟགས་ཡིན། དཔེར་ན། སྐབས་དེར་བློན་ཆེན་གྱིས་ཆོབ་ལྟ་བུ་རྟ་ཤུལ་ནི་རྟ་རང་རེད། ལྟོས་དང་ལུང་པའང་རྟའི་ཁོག་པ་འདྲ་པོ་མི་འདུག་གམ་ཞེས་གསུངས་ཡོད་མདོག་ཁག་པོ་འདུགདེ་ལྟ་བུའི་དཔྱད་པ་མང་དུ་བཏང་ན་རྟའུ་ཞེས་པའི་ལུང་པའི་མིང་གྲུབ་སྟངས་དེ་བཤད་ཚུལ་དང་པོ་དེ་ཇེ་བདེན་ཇེ་གསལ་དུ་འགྲོ་ཞིང་ལུང་རིགས་ཀྱི་རྒྱབ་རྟེན་ཡང་འཚོལ་དུ་ཡོད་པ་ཞིག་མ་ཡིན་ནམ།

བློན་ཆེན་མགར་གྱིས་འགྲོ་ལམ་བརྟག་པའི་ཚེ།།

ས་ཡི་དབྱིབས་དང་མིང་ཟུར་ལ་གཟིགས་ནས།།

རྟ་ཡི་ཁོག་པ་འདྲ་ཞེས་གསུངས་པའི་རྗེས།།

ལུང་པའི་མིང་གི་ས་བོན་དེ་ནས་གྲུབ།།

གངས་དཀར་རི་ལས་རྔོན་པའི་བུས།།

རྟེ་འུ་དེད་དང་རྟེའུ་དབྱིབས་འདྲ།།

དེ་ལྟར་ཤོད་ཚུལ་རབ་མང་ཡང་།།

ཡིད་བརྟོན་དཀའ་བའི་གནས་སུ་ལྷུང་།།

རྟ་རྣ་རི་ཡི་ཕར་རྒྱབ་ན།།

འུ་ཞེས་བརྗོད་མཁན་ལུང་པ་ལ།།

རྒྱལ་རོང་བ་ཡིས་བཏགས་ཞེས་པ།།

ཁོ་བོས་བཤད་པའང་རྒྱུ་མཚན་ཡོད།།