བློ་བཟང་སྨོན་ལམ།

མེས་པོའི་གཅེས་ནོར་བསོག་པའི་རིག་མཛོད་འདི།

སྲོང་བཙན་ཐུན་མི་གཉིས་ཀྱིས་སྐྲུན་པར་གྲགས།

མཐོན་པོའི་དཔོན་དང་དབང་ཆེན་མི་དྲག་ལས།

སྐྱེ་བོ་ཕལ་པས་མཇལ་བའི་སྐལ་བ་མེད།

དུས་ཀྱི་ཉི་ཟླ་འཁོར་འགྲོས་ཞིག་དང་ལྷན།

མི་རྣམས་རྨོངས་པའི་གཉིད་ལས་ཡོངས་སད་ནས།

རིག་པའི་ལམ་དུ་བསྐྱོད་པའི་དུས་སྐབས་འདིར།

བློ་སྨོན་ཁྱོད་ནི་ཐུན་མི་གཉིས་པར་སྣང་།

རིགས་ཞེན་ལ་རྒྱ་ཅན་གྱི་ཕ་བཟང་བུ།

ཤེས་འཇོན་ལྷག་བསམ་ཕྱུགས་པའི་རྒན་བཟང་བུ།

ཆོས་འཇིག་གཉིས་ལ་བཞག་པའི་བྱ་བཟང་གསུམ།

བློ་བཟང་སྨོན་ལམ་འཛོམས་པའི་བཟང་གསུམ་རེད།

བློ་སྨོན་ཡིག་གཟུགས་སྤྱད་པའི་དཔྱོད་ལྡན་ཚོ།

བཟང་ངན་རྩོད་པའི་དུས་ལས་མ་འདའ་བར།

སྨོན་པའི་དབང་གིས་མི་ལུས་ཐོབ་པ་འདིར།

ལམ་ཞིག་འཚོལ་ནས་དམིགས་དོན་འགྲུབ་པར་བྱོས། །