འགྱོགས་བྲིས་དུས་གཏམ་མ།
ཅ་ཅོའི་གཏམ་ནི་སྲང་མདོའི་ཁྱི་ལྡོམ་བཞིན།།
ཆ་འཇོག་འོས་པའི་གནས་ལུགས་མ་མཆིས་མོད།།
ཇ་དཀར་ལག་ཏུ་བཏེགས་པའི་ཞོར་ལས་སུ།།
ཉ་རྒྱས་ཟླ་བ་ལྟ་བུའི་གཏམ་རེ་སྤྲོ།།
ཏཱ་ལའི་བླ་མ་དུས་ཀྱི་ཕོ་ཉ་རེད།།
ཐ་ཆད་ང་ཚོ་རྡོག་སྣ་ཐོགས་ས་རེད།།
ད་རེས་དམངས་ཀྱི་ནུས་ཤུགས་སྒྲིམ་རན་མོད།།
ན་ནིང་ལས་ཀྱང་ཐུ་པའི་ལས་བྱས་བྱུང་།།
པ་ཕའི་རྣམ་ཤེས་དགྲ་ཡི་རྗེས་འདེད་རེད།།
ཕ་ཆོས་བཟང་པོ་གཤེད་ཀྱི་གནོད་ས་རེད།།
བ་ཤ་གསོས་པ་ལྐོག་གཟའ་བྱ་རྒྱུ་རེད།།
མ་གྱུར་སེམས་ཅན་ངག་གི་མཛེས་རྒྱན་རེད།།
ཙ་རི་མཐོན་པོ་སེམས་ཀྱི་དུང་ས་རེད།།
ཚ་བ་དམར་པོ་ལུས་ཀྱི་ལས་དབང་རེད།།
ཛ་དྲག་མི་ཚེ་ཞེད་སྣང་སྐྱོ་སྣང་རེད།།
ཝ་མོ་བཞིན་དུ་ངུ་བཞིན་འཁྱམ་བཞིན་འགྲོ།།
ཞ་བོའི་སྨྱུག་གུ་ལག་ཏུ་འབྱོར་ན་ཡང་།།
ཟ་འདོད་མེད་པའི་སེམས་ཀྱིས་ལྷོད་ལྷོད་དེད།།
འ་རེ་འུར་རེའི་འཆོལ་ཉོག་སྤྱོད་པ་རྣམས།།
ཡ་རབས་མེད་པའི་ཉེས་ལྟུང་འབྱུང་ས་རེད།།
ར་མ་བྱེད་རྒྱུ་མང་ཡང་རིལ་མ་ཡོད།།
ལ་མོར་འཛེགས་རྒྱུ་དཀའ་ཡང་ཐུ་ལམ་ཡོད།།
ཤ་ཁྲག་སྤྲེ་འུས་བྱིན་པའི་གདུང་རྒྱུད་ཚོས།།
ས་ཆེན་མཐོ་སར་བསྡད་པའི་རྡོག་ཁྲལ་སྤྲོད།།
ཧ་ལོའི་དུག་ལས་ལོད་པའི་སྒེར་གཤིས་དང་།།
ཨ་ཙ་དགྲ་ལས་རྩུབ་པའི་གཏུམ་སྤྱོད་དག།།
ཧ་ཆ་ཤར་རེ་རྒྱང་ནས་མཐའ་རུ་སྐྲོད།།
ཨེ་མ་ཧོ་ཡི་གནས་ལ་ཤུགས་སྣོན་རྒྱོབས།།
༢༠༡༠་༧་༢༨ ཉིན།