ཨ་ཕྱེ་རྒྱ་རི་སྒྲོལ་མར་སྤྲེངས།
རྒྱ་གར་ནག་དབར་དུ་མཐོང་ཆུང་ཇི་ཙམ་མྱོང།
བོད་གཞིས་བྱིས་གཉིས་ཀྱི་སྡུག་ཚོར་ཇི་ཙམ་ལྕི།
བདག་རང་གཞན་དབར་གྱི་ལོག་ལྟ་ཇི་ཙམ་བརྒལ།
རིགས་ཕོ་མོ་དབར་གྱི་གཉའ་གནོན་ཇི་ཙམ་ཚོར།།
སྐྱེས་ཕོའི་སྣ་ཚོགས་གཡོ་སྒྱུར་སུན་ནས་ཉོབས་སྣང་མ།
ཕོ་མོའི་འདོད་ཞེན་འགག་རྡོར་མ་འཁོན་ཤར་སྤྱོད་མ།
རང་ལུས་རང་ལ་དབང་བར་བརྩོན་པའི་ལས་བཟང་མ།
མ་ཡུམ་ཤུལ་ཐག་མ་ཆད་འཛིན་པའི་བུ་ལྡན་མ།།
བཟང་ངན་བློའི་དབར་ནས་སེམས་ཀྱི་མཛེས་ལྗོངས་ཅི་ཙམ་བཀོད།
ཕུ་ཕྱི་ཐག་རིང་ཐུང་དཀྱིལ་དུ་བྲེལ་འཚུབ་ཅི་ཙམ་མྱུལ།
མཐོ་སྐེས་འཛེགས་འགྲིམ་དུས་ལོག་ལྟའི་དཀའ་སྤྱད་ཅི་ཙམ་བྱུང།
ལས་ཕྲག་དོག་འཁོན་སེམས་དྲ་བ་ཉོབས་པོ་ཇི་ཙམ་གཏོར།།
ཉམས་ཆུང་ལས་བྱ་ཕྲག་པས་སྟེགས་པའི་སྡུག་རུས་མ།་
གཞུང་དང་སྒེར་གྱི་བྱ་བར་བརྩོན་བའི་བྲེལ་ལྡན་མ།
གང་ལ་ཐུག་ཀྱང་ལས་དོན་སྒྲུབ་པའི་འགུལ་སྤྱོད་མ།
རིགས་རུས་ལ་རྒྱ་མ་ལྷོད་བཟུང་བའི་འཁྱུག་ལྡན་མ།།
ལས་ཨ་མའི་འགན་འཁྲི་དོར་ཐབས་མེད་པའི་དུས་སྐབས་དེར།
ཕོ་གཡོག་ལས་མི་དགོས་དབང་ཤེད་བཙན་པོ་རྫོགས་མཐའ་དབེན།
གཟུགས་ལུས་ཐོག་བུ་རྒྱུད་སྦྲུམ་པའི་དཀའ་ངལ་དུས་སུ་ཡང།
གཞུང་ལས་ཁང་གྲུབ་བཞིའི་སྒོ་ཐེམ་སྲ་མོ་ཇི་ཙམ་བརྫིས།།
སེམས་ཚོར་བ་མ་འཁོག་རླབས་བཞིན་བཙན་དུས་ངུ་འབོད་མ།
གཏམ་བཤད་ཐེངས་རེ་རེའི་སྐབས་ཀྱང་སྙིང་གཏམ་དབྱངས་ལྡན་མ།
དམངས་སེམས་རྩ་མང་ཙམ་བརྐུས་པའི་དུས་ཀྱི་བྱང་ལྡན་མ།
བློ་ལ་ཞེན་དྲག་པོ་མེ་ལྟར་འབར་བའི་རྩལ་ལྡན་མ།།
མི་ཉམས་ཆུང་འཚོ་བརྟེན་ཁོ་ནར་ཡིན་ཡང་འབད་འབུངས་འོག
དཔོན་དྲེགས་ལྡན་དག་གིས་མ་འཇོན་དམངས་ཀྱི་བྱ་བཟང་སྒྲུབ།
བློ་བསམ་པའི་ཕུག་ན་བཟང་པོའི་བྱ་བར་བྲེལ་བའི་ངང།
སྡུག་ངལ་ཡང་བཟོད་པའི་དཔུང་པ་ནམ་མཁར་ཇི་ཙམ་འཕྱར།།
མཐོན་པོའི་དཔོན་ལ་གུས་བརྩི་གང་ལེགས་ཞུ་མཁས་མ།
དམའ་མོའི་དམངས་ལ་བྱམས་པའི་འཛུམ་ལྡན་སྙིང་རྗེ་མ།
དུས་མཚུངས་ཀུན་ལ་མཉམ་འགྲོག་མཁས་པའི་ངོ་དགའ་མ།
བདེན་དོན་བྱ་བར་དྲང་ཚུགས་བསྐུལ་མ་སྟེར་མཁས་མ།།
མ་ཡུམ་ཆེན་དག་གི་ལ་རྒྱ་མ་བོར་སེམས་སུ་དམ་པོར་ཆོངས།
ཤེས་བློ་གྲོས་རྩལ་ལྡན་འཚོ་བའི་དངོས་སུ་མོ་མགོ་མཁའ་རུ་སྟེགས།
མི་ལུས་རྟེན་ཐོབ་ཀྱང་རང་དབང་ཐོབ་རེ་ཀན་བའི་དུས་ངན་འདིར།
མོ་རིགས་རུས་དག་གི་རྨོངས་གཉིད་སད་ཕྱིར་ལྕོང་བརྡ་ང་ཚོས་སྒྲོག།
དཔོན་རྭའི་མཁྲེགས་བཟུང་གཏོར་ནས་གསར་བསྒྲགས་གཏམ་བརྗོད་མ།
ལུས་སེམས་འདར་བཞིན་དབང་ཆའི་ཐོབ་ཐང་འགྲན་རྩོད་མ།
ཁྱེད་ཀྱང་བོད་པའི་བུད་མེད་རྣམས་ཀྱི་འཐུས་གཙོ་མ།
ཧ་ ཧ་ད་དུང་ང་ཡི་སེམས་སུ་མཛའ་བའི་རིགས་མཐུན་མ།།