ཁམས་པའི་རྣམ་བཤད།
ཨ་རོགས་ཁམས་པ་བོག་ལ་དགའ་ཟེར།།
བོག་དང་བག་གཉིས་ནོར་གྲབས་བྱེད་ཀྱི།།
བག་རྩེད་ཁྲོད་ཀྱི་ཁ་ཕོ་རེ་རེས།།
གཞིས་ཆུང་དྲོན་མོ་རྒྱན་ལ་བཞག་སོང་།།
ཨ་རོགས་ཁམས་པ་རྟ་ལ་དགའ་ཟེར།།
རྟ་དང་སྟུ་གཉིས་ནོར་གྲབས་བྱེད་ཀྱི།།
སྟུ་ཚོང་བུ་མོའི་བསླུ་བྲིད་ཁ་ནས།།
མཐོང་དང་ལུས་པོ་རྡོ་ལ་བརྡབས་སོང་།།
ཨ་རོགས་ཁམས་པ་ཚོང་ལ་དགའ་ཟེར།།
ཚོང་དང་གྱོང་གཉིས་ནོར་གྲབས་བྱེད་ཀྱི།།
གྱོང་ཉེན་ཆེ་བའི་ནག་ཚོང་ཁྲོད་ནས།།
མི་ཚེ་ནག་ཁུང་སྦུག་ལ་བསྐྱལ་སོང་།།
ཨ་རོགས་ཁམས་པ་ཆོས་ལ་དགའ་ཟེར།།
ཆོས་དང་ཆས་གཉིས་ནོར་གྲབས་བྱེད་ཀྱི།།
ཆས་གོས་གྲི་དང་ལྤགས་པའི་གསེབ་ནས།།
རང་གི་རིགས་ལ་རྨ་ཁ་བཟོས་སོང་།།
ཨ་རོགས་ཁམས་པ་དྲང་པོ་དགའ་ཟེར།།
དྲང་པོ་གྲོགས་གཉིས་ནོར་གྲབས་བྱེད་ཀྱི།།
གྲོགས་པོའི་གཡོ་སྒྱུ་ཤོག་གདུགས་ནང་ནས།།
ཁམས་པ་རོ་ཅོག་ཆར་བས་བརྡུང་སོང་།།
ཨ་རོགས་ཁམས་པ་ཟས་ལ་དགའ་ཟེར།།
ཟས་དང་ཟ་གཉིས་ནོར་གྲབས་བྱེད་ཀྱི།།
ཟ་མཆུ་ངན་པ་དངུལ་ལ་ཟུགས་ཏེ།།
མེས་པོའི་ཞབས་རྗེས་ལག་གསུབ་བྱས་སོང་།།
ཨ་རོགས་ཁམས་པ་ནོར་ལ་དགའ་ཟེར།།
ནོར་དང་ནག་མོ་ནོར་གྲབས་བྱེད་ཀྱི།།
ནག་མོ་གསུམ་བཞིའི་ནུ་འབུར་བར་ནས།།
ཆོས་སྲིད་མངའ་ཐང་རླུང་ཁར་སྤུར་སོང་།།
ཨ་རོགས་ཁམས་པ་དགྲ་ལ་དགའ་ཟེར།།
དགྲ་དང་གྲོགས་གཉིས་ནོར་གྲབས་བྱེད་ཀྱི།།
གྲོགས་ཀྱི་དང་མ་རང་རིགས་སྲོག་ལ།།
ཕྱིར་ཡོང་མེད་པའི་སྡོམ་རེ་བརྒྱབ་སོང་།།
ཨ་རོགས་ཁམས་པ་ལྷ་ལ་དགའ་ཟེར།།
ལྷ་དང་འདྲེ་གཉིས་ནོར་གྲབས་བྱེད་ཀྱི།།
འདྲེ་ངན་རྒྱལ་འགོང་གདུག་པའི་ཁ་ནས།།
གངས་ཅན་ལྗོངས་ལ་ཞབས་འདྲེན་བཞག་སོང་།།
ཨ་རོགས་ཁམས་པ་ལ་རྒྱ་དགའ་ཟེར།།
ལ་རྒྱ་ལུང་བ་ནོར་གྲབས་བྱེད་ཀྱི།།
ལུང་ཚན་སྒྲིག་པའི་ཁ་ཕོའི་གསེབ་ནས།།
ཁམས་པའི་བྱས་རྗེས་ས་ལ་གཡུག་སོང་།།
ཨ་རོགས་ཁམས་པ་མཐུན་པོ་དགའ་ཟེར།།
མཐུན་པོ་འཐོར་གཉིས་ནོར་གྲབས་བྱེད་ཀྱི།།
འཐོར་ས་མང་བའི་ཚོགས་སྡེ་བཙུགས་ནས།།
གཞན་སེམས་དགའ་བའི་ནང་དམེ་བྱས་སོང་།།
ཨ་རོགས་ཁམས་པ་འཆམ་པོ་དགའ་ཟེར།།
འཆམ་པོ་འཁྱམ་ཉུལ་ནོར་གྲབས་བྱེད་ཀྱི།།
འཁྱམ་གཡེངས་མི་ཚེ་མིག་དཔེར་བཟུང་ནས།།
མ་འཇོན་བྲེལ་ལ་ཁམས་པས་བཀང་སོང་།།
ཨ་རོགས་ཁམས་པ་གྲོགས་ལ་དགའ་ཟེར།།
གྲོགས་དང་བྲན་གཉིས་ནོར་གྲབས་བྱེད་ཀྱི།།
བྲན་གཡོག་འོག་གི་ལོ་ཟླ་རྒས་ནས།།
ཤེས་རྟོགས་མེད་པ་རྗེས་ལུས་ཐེབས་སོང་།།
ཨ་རོགས་ཁམས་པ་བླ་མ་དགའ་ཟེར།།
བླ་བ་བརླ་གཉིས་ནོར་གྲབས་བྱེད་ཀྱི།།
བརླ་ཤའི་གླང་ཆེན་མཆེ་བའི་བར་ནས།།
ཕྱིར་ཡོང་མེད་པ་ཕྱིར་ལ་ཕེབས་སོང་།།
ཨ་རོགས་ཁམས་པ་ཁོག་ཆེན་དགའ་ཟེར།།
ཁོག་ཆེན་ཁང་བ་ནོར་གྲབས་བྱེད་ཀྱི།།
ཁང་ཆེན་བརྩིག་པའི་བྲེལ་ལའི་གསེབ་ནས།།
ཤོག་ངོས་ལོ་རྒྱུས་ཀློག་མཁན་མི་འདུག།།
ཨ་རོགས་ཁམས་པ་བདེན་པ་དགའ་ཟེར།།
བདེན་པ་གླེན་པ་ནོར་གྲབས་བྱེད་ཀྱི།།
གླེན་རྟགས་ཚ་བའི་ཡིད་ཆེས་རེ་རེས།།
རྗེས་མའི་སེམས་པ་དུ་བུར་གཏོར་སོང་།།
ཨ་རོགས་ཁམས་པ་བུ་ལ་དགའ་ཟེར།།
བུ་དང་བོག་གཉིས་ནོར་གྲབས་བྱེད་ཀྱི།།
བོག་ཁ་གཟན་པོ་ནང་ལ་བསྐོར་ཏེ།།
མགོ་ནག་མི་ཡི་སྲོག་རྩ་བཅད་སོང་།།
ཨ་རོགས་ཁམས་པ་ཇ་ལ་དགའ་ཟེར།།
ཇ་དང་ཇག་གཉིས་ནོར་གྲབས་བྱེད་ཀྱི།།
ཇག་པའི་ལག་པ་འགུལ་ཐེངས་གཅིག་གིས།།
གྱོད་དང་མི་ཁ་ཡོང་ལ་བཀྲམས་སོང།།
ཨ་རོགས་ཁམས་པ་རྒྱུ་ལ་དགའ་ཟེར།།
ཁང་ཆུང་གྲུ་བཞི་རྡོ་འདེད་བྱས་སོང་།།
རྒྱ་འབྲེལ་དམ་པོའི་གཟའ་འདོད་ཁ་ནས།།
རྒྱུ་དང་རྒྱ་གཉིས་ནོར་གྲབས་བྱེད་ཀྱི།།
༢༠༡༠་༣༢༩། རྒྱ་གར་གྱི་རྒྱལ་ས་ལྡི་ལི་ནས་འཆམ་ར་སྨྱོན་པས།།