གསར་འགོད་རང་དབང་ལ་ངོ་ལེན་མ་བྱས་པ་དེ་ཚབ་ཆེན་རེད།
ད་ལྟ་ནད་པའི་འབོར་ལ་ལ་བལྟས་ན་དངོས་གནས་ཚབ་ཆེན་རེད་ལ་དེ་ལས་ཀྱང་ཚབ་ཆེ་བ་ཞིག་ནི། གསར་འགོད་རང་དབང་ལ་ངོ་ལེན་མ་བྱས་པ་དེ་རེད། གསར་འགོད་པའི་བརྗོད་དོན་ལྟར་ན་རྡ་ཤོད་སློབ་གྲྭའི་སློབ་སྤྱི་སོགས་ལས་བྱེད་སུ་གང་གི་གསར་འགོད་པའི་དྲི་བ་དང་ལེན་བྱེད་ཀྱི་མེད་སྐོར་བཤད་འདུག ང་ཚོ་བཙན་བྱོལ་གཞུང་གིས་དུས་རྟག་ཏུ་རང་དབང་ལུང་པར་གནས་པའི་བོད་པའི་སྒྲིག་འཛུགས་དེ་ལེགས་ཉེས་ཅི་ཞིག་བྱུང་ན་ཕྱི་གསལ་ནང་གསལ་ཡིན་ཞེས་སྐད་མགོ་མཐོ་པའི་སྟེང་ནས་བཤད་བཞིན་ཡོད་པ་དེ་ཚོ་དངོས་གནས་ཞིག་མ་ཡིན་པའི་བདེན་དཔང་སྟོན་གྱི་ཡོད་པ་མེད་འགྲོ དེ་མིན་ན་གནད་དོན་འདི་ཚོ་སྦས་གསང་བྱེད་དགོས་དོན་མེད་མོད། ཡང་མིན་ན་རྡ་ཤོད་སློབ་གྲྭའི་ནང་དུ་དགྲ་དགའ་གཉེན་སྡུག་གི་བྱ་བ་སྒྲུབ་མཁན་ཡོད་པར་ངོ་སྲུང་དང་བསྟུན་མཁས་བྱེད་དགོས་རྒྱུ་མེད་འགྲོ གསར་འགོད་པ་ནི་སྤྱི་ཚོགས་གང་རུང་ཞིག་ཏུ་ལེགས་གཉིས་གང་བྱུང་བ་རྣམས་དྲང་ཞིང་བདེན་པའི་ཐོག་ནས་སྤྱི་ཚོགས་ལ་གསལ་པོ་བཟོ་མཁན་ཞིག་ཡིན་པ་ལས་སྤྱི་ཚོགས་དཀྲུགས་ཤིང་བྱེད་མཁན་མིན་པ་ནི་གསར་འགོད་རང་དབང་ཚད་ལྡན་ཡོད་པའི་ཡུལ་གྲུ་ཚོར་བལྟས་ན་ཤེས་ངེས་པ་རེད།