གླེང་གཞི་ནག་པོ།།
བཅོས་མའི་འཛུམ་གྱིས་བསུ་བའི་ཟླ་འོད་འོག།
ས་གཞི་ཡུན་གྱིས་བསྐོར་བའི་རེ་ཞགས་འཕེན།།
རྒྱ་མཚོ་ཧུབ་ཀྱིས་བཏུང་པའི་གཏམ་རྒྱུད་ཅིག།
བྱེ་ཐང་རྒྱ་གྲོང་འགྲིམས་པའི་དཔའ་ཁར་རྒོད།།
ལྷག་བསམ་དར་ཆེན་མཁའ་ལ་བསྒྲེངས་ཤུལ་དུ།།
སླད་མེད་ལ་རྒྱ་སྨྲ་པའི་ཁ་གཡང་འདི།།
ཕངས་མེད་རྒྱལ་ཁམས་བསྐོར་ནས་གྲགས་ལུགས་ཀྱིས།།
དམར་པོའི་ཚོན་མདངས་བསྒྲིགས་པའི་ལས་འཆར་བརྩམས།།
མདའ་ཁ་ནང་དུ་གཏད་པའི་གནམ་འོག་ན།།
དཔའ་དར་གཞན་ལ་ཕུལ་བའི་བཀོད་འདོམས་འདི།།
སྲང་ཁ་མཐོ་དམའ་བརྩད་པའི་ལུགས་སྲོལ་གྱིས།།
དགྲ་ཁ་རང་ལ་ཕྱོགས་པའི་སྔ་ལྟས་ཡིན།།
འདོད་འཇོ་འོ་མཚོ་བསྲུབས་པའི་མདུན་ངོགས་ན།།
མགོ་བོ་བྲག་ལ་བརྡབ་པའི་སྔ་གཞུག་ཏུ།།
བྲག་ཅ་རང་གི་རྣ་བར་མི་ཚོར་ཡང་།།
ས་ཆེན་ལག་པས་འགེབས་འདི་ཡ་རེ་མཚར།།
ཁྲོམ་གཞུང་བྲེལ་གྱིས་བསྐོར་བའི་རྒྱུག་ལུགས་འདི།།
རྒྱལ་ཁའི་ལམ་བུ་འཚོལ་བའི་གཤམ་ངོགས་ན།།
གཞན་ངོར་དཀར་རྩི་གསོལ་བའི་ཐབས་ཚུལ་ཞིག།
ཡངས་པོ་རླུང་གིས་འཁྱེར་བའི་ལྟད་མོ་གདའ།།
སྤུས་ཚོང་དངོས་ཟོག་འགྲེམས་པའི་ཁྲོམ་ར་ན།།
ཁེ་དབང་ལས་ཀྱིས་བསྐྱུར་བའི་ཚོང་དཔོན་འགའ།།
ཚོང་དོན་བྲེལ་ཟིང་ཐེངས་ཤིག་བསླངས་ཙ་ན།།
ཅང་མེད་རྟ་སྒྲོ་སྟོང་པའི་རྡོག་ཁྲིས་བསྐྲུན།།
མ་ནིའི་དབྱངས་རྟ་གྱེར་བའི་གནམ་འོག་ན།།
ཤོག་བུ་རླུང་གིས་བདས་པའི་ཟུར་སྣེ་རུ།།
སྨག་རུམ་མུན་པ་འཐིབས་པའི་ལམ་ཆེན་ན།།
ལྗིད་ཚད་ལྷགས་པས་འཇལ་བའི་ཟློས་གར་མཐོང་།།
དྲོད་འཇམ་ཉི་འོད་ཚེར་བའི་གཤམ་འོག་ན།།
སྤྱི་སེམས་སྟོང་གཏམ་སྒྲོག་པའི་ཆུ་གཏེར་ངོགས།།
རང་དོན་ཁོག་ན་འཕྱོར་བའི་ཐལ་རྡུལ་གྱིས།།
འཇིག་རྟེན་མུན་པས་བསྒྲིབས་པའི་སྔ་ལྟས་ཤིག།
དཀར་གསལ་ཉིན་བྱེད་འབྱེད་པའི་ཐང་ཆེན་ན།།
གོར་གོར་འོད་ལ་འཁྲེང་པའི་ཨ་འཐས་ཀྱིས།།
མངོན་གསལ་རང་མཚང་འགྲེམས་པའི་གྲུ་ཁ་ནས།།
རྗེན་མའི་གར་གྱིས་གླེང་གཞི་ནག་པོ་བསླངས།།
༢༠༡༠། ༩། ༢༡ ཉིན་གྱི་དགོང་མོར་རང་ཤག་ཏུ་གློ་བུར་ཚོར་སྣང་ཞིག་གིས།།
