ཤུན་པགས་ལ་དེ་འདྲའི་དགའ་དོན་ཅི་ཡིན་ནམ།
བར་དང་གཏིང་འོག་མེད་པར་ནུར་བཞིན་འདུག
ངལ་རྩོལ་གྱིས་བར་གསེང་དུ
དཀའ་ཚེགས་ཀྱི་ལོ་ཟླའི་ཁྲོད
ཐ་ན མཚན་མོའི་རྨིས་པའི་རྨི་ལམ་གྱི་ཁྲོད
ཤུན་པགས་དེ་ནི་དེ་འདྲའི་ཡིད་དུ་འོང་བ་ཞིག
དོན་དངོས་སུ ཤུན་པགས་ནི་སྐྱི་མོ་རེད
སྐྱི་གཉེར་གྱི་འགྱུར་བ་ནི སྐད་ཅིག་མ་རེད
སྐད་ཅིག་མས་ང་ལ་གང་ཞིག་བསྐྲུན་ཡོད
ངས་ད་གཟོད སྐད་ཆ་ཁམ་བཀང་
དུས་ད་ལྟ་བར་དུ་ཡག་པོ་ཞིག་མ་འཁྱོང་
ཟ་རྒྱུ་རུམ་བཀང་མེད་པར
བཤད་རྒྱུ་ནི་རིའི་རྒྱལ་བོ་རི་རབ
ཁང་ཁྱིམ་དང་ས་གཞི
འདས་མ་ད་གསུམ སྐྱེ་རྒ་ན་འཆི
སང་འགྲོ་ནངས་འགྲོ་མི་ངེས་པའི་ལུས་པོ་འདི
མཚམས་རེར་དགོད་བྲོ་བོ་ཞིག
ཤུན་པགས་དེ་སྲུང་མཁན་གྱི་གཏོར་གཟུགས་ཤིག
ནམ་ཞིག བྱ་ཁྭ་ཏའི་མི་ཟ་བའི་གཏོར་མ་ལྟ་བུ་དེ་ནི
ཤུན་པགས་དེ་ཡིན་སྲིད་ཀྱང་
ད་དུང་བློས་མི་གཏོང་བ་དེ་ནི
དེ་ཉིད་ཁོ་ནར་གྱུར་ཡོད
མི་ནི་ང་དང་འདྲ་བར་ཉིན་མཚན་མེད་པར
ཤུན་པགས་ཁོ་ནར་དུངས་མཁན་དུ་གྱུར་དོན་ཅི་ཡིན