ཀ་ཕྲེང་།
ཀ་དག་དབྱིངས་ཀྱི་ངང་ལས་རྣམ་རོལ་བའི།།
ཁ་དོག་སྒྱུ་མའི་གར་གྱིས་མི་བསླུས་པར།།
ག་བུར་སེམས་ཀྱི་དྲི་མ་རབ་བསྟེན་པས།།
ང་འཛིན་གདོན་གྱི་འཇིགས་པ་རྩད་ནས་བཅད།།
ཅ་ཅོའི་འདུ་འཛིས་མ་གོས་དབེན་པའི་གནས།།
ཆ་རྒྱུས་མེད་པའི་གནས་རི་ལ་ཞུགས་ཏེ།།
ཇ་ཕོར་ཙམ་ལས་མ་འགྲོགས་བླ་མའི་བཀའ།།
ཉ་ཆུ་ཇི་བཞིན་སེམས་དང་ཡེ་མ་བྲལ།།
ཏཱ་ཐ་ག་ཏའི་རྡོ་རྗེའི་ཐེག་པའི་ལམ།།
ཐ་གུའི་སེམས་ཀྱི་འཆིང་བས་ལེགས་བཅིངས་པས།།
ད་བཟོད་ཟུང་འཇུག་གོ་འཕང་ཐོབ་པའི་དཔལ།།
ཎ་རོའི་སྒྲུབ་རྒྱུད་རྗེ་བཙུན་མར་པའི་དྲིན།།
པ་སངས་ལྟར་དཀར་ཟབ་མོའི་སྒྲུབ་རྒྱུད་དེ།།
ཕ་རོལ་ཕྱིན་དྲུག་ཉམས་ལེན་བཟང་པོས་བསྐྲུན།།
བ་སྤུ་ཆ་ཡི་སྒྲིབ་པས་མ་བསླད་པའི།།
མ་རྟོག་འོད་གསལ་ངང་ལ་རོ་གཅིག་གནས།།
ཙ་རི་ཁ་བའི་གོས་དཀར་གྱོན་པ་དང་།།
ཚ་རིས་མེ་སྐྱེས་དྲོད་འཛིན་རི་བོ་སོགས།།
ཛ་ཏི་སྨན་ལྟར་རྣམ་ཀུན་ཉེར་བསྟེན་པས།།
ཝ་སྐྱེས་ངང་ཚུལ་མཁས་རློམ་སྐྱེངས་པར་བྱས།།
ཞྭ་ལྟར་བླ་མ་སྤྱི་བོའི་གཙུག་བསྟེན་པས།།
ཟ་བྱེད་མཆེ་བ་ཅན་གྱིས་ཆོ་འཕྲུལ་སྒྲས།།
འ་འུར་ལུང་པར་ཁེབས་ཀྱང་ཏིང་འཛིན་བརྟན།།
ཡ་ངའི་གདོན་རྣམས་ངོ་ཚའི་གོས་ཀྱིས་བཀབ།།
ར་རོ་ཇི་བཞིན་འགྲོ་བ་ལ་གཟིགས་ནས།།
ལ་ལུང་འགྲིམ་པའི་རྣལ་འབྱོར་མགོན་ཁྱེད་ལ།།
ཤ་ཚའི་སྙིང་རྗེ་རྟག་ཏུ་གཡོ་བ་ལས།།
ས་ལམ་ཉམས་རྟོགས་ཚངས་པའི་མགུར་དུ་ལེན།།
ཧ་ཅང་རླབས་ཆེན་ཁྱེད་ཀྱི་བརྩོན་པ་དེར།།
ཨ་ཙི་ཡི་རངས་མེད་པ་སྐྱེ་འགྲོ་སུ།།
བདག་ཀྱང་མི་ལྡོག་བརྩོན་པའི་གྲུར་ཞུགས་ཏེ།།
ཚོགས་གཉིས་རྒྱ་མཚོའི་ཕ་མཐར་སོན་པར་ཤོག།།