འཁྲབ་སྟངས་འདིས་གཉིད་ལས་སློང་སོང་།
དཀར་ངོགས་འོད་ལ་འཁྲེང་བའི་གླེན་རྟགས་དང་།།
འཇིག་རྟེན་མུན་པར་བལྟས་པའི་ལྟ་སྤྲོད་འདིས།།
ལྷོད་ལྷོད་འཛུམ་གྱིས་ཁེངས་པའི་གནས་མཆོག་འདིར།།
ངོ་སྲུང་བང་ཁ་འགྲིམས་པའི་འཁྲབ་ཚན་མང་།།
མཐོ་པོའི་གནམ་ལ་ལག་པས་ཀེར་བྱས་ཏེ།།
དམའ་པོར་རྡོག་པས་གནོན་པའི་གཤིས་ལུགས་འདིར།།
ལྷོད་ལྷོད་འཇིག་རྟེན་འགྲེམས་པའི་དཀར་ངོགས་སུ།།
ནམ་ཡང་དཔའ་རྟགས་བགྲངས་པའི་ལོ་རྒྱུས་མེད།།
ཡོད་ཚད་རིན་གོང་རང་གི་རྒྱབ་བྱས་ཏེ།།
རང་མཐོ་གཞན་གནོན་ལས་ཀྱི་ཚོང་ར་རུ།།
རང་ཉིད་ལྷ་རུ་བལྟས་པའི་གོམས་གཤིས་འདིས།།
ལྷིང་འཇགས་ཁོར་ཡུག་འདིར་ཡང་འུར་ཟིང་སློང་།།
རང་གིས་རང་ཉིད་བཏེགས་པའི་ཁྲིམས་ལུགས་མཁས།།
རང་བསྟོད་གཞན་ལས་འཚོལ་བའི་ཐབས་བྱུས་མཁས།།
རང་ཉིད་གནམ་ཁར་འཕུར་བའི་འཁྲབ་ཚན་གྱིས།།
རང་གཞན་ལྷོད་ལ་བབ་པའི་བསམ་གཏན་དཀྲོགས།།
ད་དུང་འཁྲབ་དང་ལྟད་མོ་སྣ་ཚོགས་གདའ།།
ད་ནས་འཕུར་དང་གཤོག་རྩལ་ངས་ཀྱང་མཐོང་།།
རང་བསྟོད་འཚོལ་དང་རིན་གོང་ངས་ཀྱང་ཤེས།།
རང་མགོ་གནམ་ལ་བཏེགས་པའི་ལས་རྩོམས་ཤིག།
ཡོད་ཚད་གནམ་ལ་བཏེགས་ཏེ་ངོམས་ཤིག་དང་།།
ཐུབ་ཚད་རང་ལ་རིན་གོང་རྒྱོབས་ཤིག་དང་།།
ངོ་སོ་ཟློས་གར་འདི་ཀོ་འཁྲབ་ཤོག་དང་།།
ངས་ཀྱང་ལྟད་མོ་མིག་གིས་སྒུག་བཞིན་ཡོད།།
ཕྱི་ལོ་༢༠༡༡ ༤ ༢༠ ཉིན་དགོངས་མོ་རང་ཤག་ཏུ་རང་གི་ཉེ་གནས་ཤིག་གིས་བྱེད་སྟངས་སྣ་ཚོགས་མཐོང་བས་གློ་བུར་བྲིས།