རྒྱལ་གཅེས་དཔའ་བོ་བློ་བཟང་ཕུན་ཚོགས་ཀྱི་རྒོལ་ལུགས།
ས་ཡ་དྲུག་གི་ལས་དབང་སེམས་སུ་རུམ་དུས།། སྐྱིད་སྡུག་མཉམ་མྱོང་ཞིག་ལ་ཕུགས་བསམ་བཅོལ་དུས།། རང་གི་རིགས་ལ་ཞེན་པ་དཀར་པོ་འཆང་དུས།། ཁྱེད་ཀྱི་དཔའ་སྩལ་སུས་ཀྱང་འགྲན་ནུས་མ་སོང་།། གཏམ་རྒྱུད་ནག་པོ་ཕྱིར་དྲན་ཐེངས་ཤིག་བྱས་དུས།
། ཕ་གྱོད་རྙིང་པར་སྤྱན་ཞགས་ཐེངས་ཤིག་འཕེན་དུས།། རྒོལ་ལུགས་སྲོལ་དང་མཐུན་པའི་རྒོལ་སྟངས་འདིས་ཀྱང་།། ཁྱེད་ཀྱི་དཔའ་སྩལ་སུས་ཀྱང་འགྲན་ནུས་མ་སོང་།། རང་རིགས་མི་ལ་བཀུར་བའི་དད་འདུན་ཕྲ་མོ།། ལྷད་མེད་དྭངས་གཙང་སེམས་འདི་ཐུགས་སུ་འཁྲུང་དུས།། རང་སྲོལ་མཆོད་མེ་འབུལ་པའི་རྒོལ་ལུགས་འདིས་ཀྱང་།། ཁྱེད་ཀྱི་དཔའ་སྩལ་སུས་ཀྱང་འགྲན་ནུས་མ་སོང་།། རང་རིགས་དོན་དུ་རྒོལ་སྟངས་གྲངས་ལས་འདས་ཀྱང་།། རང་ལུས་མེ་རུ་བསྲེག་པའི་རྒོལ་སྟངས་རྫིག་པོ།། དེའི་ཕྱིར་ལ་རྒྱའི་དབང་གི་མཆོང་སྟངས་འདིས་ཀྱང་།། ཁྱེད་ཀྱི་དཔའ་སྩལ་སུས་ཀྱང་འགྲན་ནུས་མ་སོང་།། སྙན་ཚིག་བུང་བའི་གཤོག་སྒྲོ་ལྡེམ་མྱུར་ཞིག་གིས།། ཁྱེད་རང་དྲན་པའི་གདུང་བ་སེལ་བའི་ཕྱིར་དུ།། དབང་མེད་སྨྱུ་གུས་གར་སྟོབས་བསྒྱུར་སྟངས་འདིས་ཀྱང་།། སྐྱིད་སྡུག་མཉམ་མྱོང་ཞིག་གི་མཚོན་དོན་ཡིན་ནོ།། ༢༠༡༡་་༥་་༤་་ཡི་དགུང་མོ་འབྲས་སྤུངས་བློ་གསལ་གླིང་གྲྭ་ཚང་གི་ཉིན་ཞག་ཞེས་དགུ་འཁོར་བའི་དུས་སྐབས་དང་བསྟུན་ནས་སྨོན་ལམ་གསུང་དུས་ཐོལ་བྱུང་དུ་ཚོགས་ཐོག་ན་གདུང་བ་དྲག་པོ་ཞིག་སྐྱེས་ནས་མྱ་ངན་ཞིག་གི་ཚབ་ཏུ་བྲིས།།
