དྲང་གཏམ་མདའ་མོ།
ཕར་ལ་རྐུན་ཁག་གཅིག་བཙུགས་དུས།།
ཚུར་ལ་རྐུན་ཁུངས་གཅིག་སྟོན་འོང་།།
གཉིས་ཀ་སྤྱི་ཚོགས་འདིའི་ནང་དུ།།
ནག་པོ་ཕར་བཟོས་ཏེ་ཚུར་བསྐུས།།
འདི་ཡང་ཆབ་སྲིད་གཅིག་ཡིན་ནམ།།
རྒྱ་རི་མགོ་བདེ་རེད་ཞུས་ན།།
བློ་སེང་ལྕེ་བདེ་རེད་གསུང་འདུག།
བཀྲས་མཐོང་རྐུན་མ་རེད་ཞུ་དུས།།
བློ་སེང་རྫུན་མ་རེད་གསུང་འདུག།
ཉེས་སྐྱོན་ཕར་འགེལ་དང་ཚུར་འཕེན།།
འདི་ཡང་ཆབ་སྲིད་གཅིག་ཡིན་ནམ།།
ཁམས་པའི་ལ་ཞེན་ཞིག་གླེང་བཞིན།།
ཁམས་པར་བསམ་ཤེས་ཤིག་མེད་ཀྱང་།།
ནང་ཁུལ་བསྙོན་འཛུགས་འདི་མ་གནང་།།
བོད་ལ་ཐུགས་བསམ་ཞིག་བསྐོར་རོགས།།
ཀ་བར་འབྲེང་ལྕག་ཅིག་མ་རྒྱབ།།
འབྲེང་སྣེ་རང་མིག་ལ་ཕོག་ཡོང་།།
ནང་ཁུལ་འཐབ་རྩོད་འདི་མ་གནང་།།
ངན་འབྲས་བོད་པ་ལ་འཁོར་ཡོང་།།
སྤྱི་འཐུས་རྩོད་རྙོག་གི་གློག་བརྙན།།
ལྷ་སའི་ཁྲོམ་ལམ་དུ་བཤམས་སོང་།།
ཁམས་པའི་ནང་ཁུལ་གྱི་སྡང་ཟུག།
ཀྲུང་གོའི་དུས་དེབ་ཏུ་འགོད་དམ།།
ཉམས་མྱོང་ལྷག་བསམ་ཀྱིས་ཕྱུག་པའི།།
སྒྲོལ་མ་བཀའ་ཁྲི་རུ་འོས་ཀྱང་།།
ད་ལྟའི་གནས་བབ་ལ་གཞིག་པའི།།
བློ་སེང་དེ་ལས་ཀྱང་ལྷག་པ།།
འདི་འདྲའི་བཤད་སྟངས་ཙམ་བྱས་ན།།
རང་གི་འདོད་དོན་དེ་འགྲུབ་ཅིང་།།
མི་ལ་བརྡབ་གསིག་ཀྱང་མི་ཡོང་།།
འདི་ལས་ལྷག་པ་ཞིག་གང་འདུག