གྲྭ་སའི་དཔེ་ཆ་བ་ཞིག་ལ་སྤྲིངས་པ།
བདག་ཀྱང་ཕ་ཡུལ་དྲན་མྱོང་།།
སྔོན་གྱི་མཁས་པའི་བསླབ་བྱ།།
སེམས་ལ་དྲན་ཐེངས་རེ་ལ།།
ཕ་ཡུལ་གཏིང་བརྗེད་འགྲོ་གི།།
གདན་སར་ཡུན་དུ་བཞུགས་ནས།།
ཀུན་སློང་རྣམ་པར་དག་པས།།
གཞུང་ཆེན་བཀའ་པོད་ལྔ་ལ།།
སློབ་གཉེར་ཚུལ་བཞིན་བྱོས་དང་།
ཕ་མ་སྤུན་མཆེད་ཚོ་ལ།།
ཞབས་ཕྱིས་རྒྱུ་རུ་འགྱུར་ན།།
དཀའ་མོ་ལམ་འདི་བརྒྱུད་དང་།
ནམ་ཡང་བསླུ་བ་མེད་དོ།།
གནམ་གཤིས་འགྱུར་ལྡོག་དེ་ཡང་།།
འཛམ་གླིང་ཡོངས་ཀྱི་གནས་སུ།།
འགྱུར་ལྡོག་འདྲ་མིན་འགྲོ་བ།།
འཇིག་རྟེན་ཆོས་ཉིད་ཡིན་ལ།།
གནམ་གཤིས་འགྱུར་ལྡོག་ཙམ་གྱིས།།
ཕ་ཡུལ་དྲན་དུ་བཅུག་ན།།
བསླབ་པ་སློབ་ལས་དཀའ་ཚེ།།
དེ་ལས་མང་བ་དྲན་སྲིད།།
ཕ་ཡུལ་བདུད་ཀྱི་བཙོན་ར།།
ཕ་མ་བདུད་ཀྱི་ཞགས་པ།།
སྔོན་གྱི་མཁས་པའི་གསུང་དེ།།
ཁྱེད་ལ་གདམ་ངག་སྟེར་རོ།།
ནད་དང་ན་ཚ་མེད་ཅིང་།།
བློ་དང་རིག་པ་གསལ་བས།།
རིག་པའི་གཞུང་ལུགས་ཆེན་མོར།།
རྟག་གུས་སྦྱོང་བརྩོན་གྱིས་ཤིག།
བསླབ་ལ་མུ་མཐུད་བརྩོན་དང་།།
ལས་འབྲས་བསླུ་བ་མེད་ལ།།
ཆོས་ཉིད་བདེན་པའི་སྟོབས་ཀྱིས།།
རིག་པའི་རྒྱལ་པོར་འགྱུར་ཡོང་།།