དྲི་རྟགས་ཆེན་པོ་གཉིས།
འོན་ཀྱང་འགྱུར་ལྡོག་གང་མང་ཞིག་གི་ཁྲོད་ནས་བོད་ཀྱི་ཆོས་རིག་ལེགས་བྱང་སླར་ཡང་རྩ་མེད་དུ་འགྱུར་ལ་ཉེ་བའི་སྐབས་སུ་འཛམ་གླིང་སའི་གོ་ལའི་འཕྲུལ་ལས་རིག་རྩལ་གྱི་འཕེལ་རིམ་གསར་བ་ཞིག་དར་རྒྱས་སུ་བྱུང་ཞིང་དེ་དང་དུས་མཚུངས་སུ་བོད་གངས་ཅན་པའི་སྐད་ཡིག་རིག་གནས་ལའང་གསོན་ཤུགས་གསར་བ་ཞིག་དང་རེ་བ་གསར་བ་ཞིག་གི་མ་ལག་རྒྱས་འགོ་བརྩམས། དེ་ལྟར་ཡང་དུས་རབས་ཉེར་གཅིག་པའི་འཛུམ་དཀར་ས་ཡི་གོ་ལའི་དཀྱིལ་འཁོར་དུ་བཞད་པའི་སྐབས་འདིར་ན་གཞོན་གང་མང་ཞིག་གིས་སྐད་ཡིག་གི་ཚེ་སྲོག་ལ་རིན་ཐང་བཞག་ནས་མཁས་པ་རྒན་པ་ཚོའི་རྗེས་སུ་འབྲངས་ཏེ་རྒྱུན་འཛིན་དར་སྤེལ་གྱི་ལས་ལ་ཞུགས་མོད། ང་ཡིན་བསམ་པའི་ཁ་ཕོ་དང་ཧམ་པ་ཅན་སྐོར་ཞིག་གིས་དྲ་བའི་རིག་གནས་འདིར་དུང་ཞེན་དང་འབྲེལ་གཞི་རྩའི་དགེ་སྐྱོན་ལ་བསམ་གཞིགས་གནད་དུ་སྨིན་པ་ཞིག་མ་བྱས་པར་ཡ་མཚར་དང་། རྨོངས་པའི་དུང་ཞེན་། རྩེད་རྒོད། ཐ་ན་དུས་ཚོད་འགྲོ་བ་ཙམ་གྱི་ཆེད་དུ་ཟིན་བྲིས་སྤེལ། མཆན་བུ་བཏབ། རྩོམ་དེབ་པར། བརྡ་དག་སྤྱིའི་འགྲོ་སྟངས་དང་། རིག་གནས་ཀྱི་རྨང་གཞི་ཡོད་མེད་ལ་མ་བལྟོས་པར་ཕུལ་བྱུང་ཟིན་བྲིས་པ་ཆགས་ཤིང་གྲགས་ཅན་རྩོམ་པ་པོར་གྱུར་ནས་བསམ་བློའི་སློབ་སྟོན་པར་བདམས། འདིའི་ཕྱོགས་ངོས་གཞན་ཞིག་ན་རང་གི་རིག་གཞུང་ལ་དུང་ཞིང་སྤོབས་པས་མདུན་སྙེག་ཐུབ་པ་སོགས་ཀྱི་དགེ་མཚན་ཡོད་སྲིད་ཀྱང་། ངོས་གཞན་ཞིག་ན་ཚད་ལྡན་རྩོམ་པ་དག་གི་མཚན་སྙན་ལ་རྨ་བཟོས་པ་དང་། རྩོམ་པ་པོ་སྤྱིའི་རིན་ཐང་གི་ཚད་ཐིག་ལ་ནག་རྩི་བྱུགས་པ། རྩོམ་པ་པོ་དང་རིག་གནས་པ་ནི་སྤྱི་ཚོགས་ཀྱི་སྣེ་འཁྲིད་པ་ལས་ལྡོག་སྟེ་དཀྲུགས་ཤིང་མཁན་དང་། སྨྱོན་པའི་སྤྱོད་ཚུལ་ཅན་ཞིག་ཡིན་པའི་འདུ་ཤེས་སྤྱི་ཚོགས་སུ་སྤེལ་བ། བརྡ་དག་སོགས་ཀྱི་འགྲོ་སྟངས་ནོར་བ་དང་། ཕྲད་ཀྱི་སྦྱོར་ལུགས་མ་ཤེས་ཀྱང་གང་བསམ་གང་དྲན་ཡིག་ནོར་དང་བརྡ་ལོག ཁ་སྐད། ཕ་སྐད།་ལུང་སྐད་སོགས་གང་བྲིས་ཀྱང་བོད་ཀྱི་སྤྱི་སྐད་དང་རིག་གནས་པའི་སྡེ་ཡི་གཟི་བརྗིད་ལྟར་སྣང་པའི་ལོག་རྟོག་འགྲེམས་པ་སོགས་ཀྱི་ཉེས་སྐྱོན་ལྕི་བར་སྣང་། རང་གི་རིག་གཞུང་ལ་དུང་ཞིང་བརྩེ་བའི་བསམ་བ་ཅན་དག་གིས་འདིའི་དགེ་སྐྱོན་ངེས་པར་དུ་བསམ་དགོས། རྩོམ་པ་པོ་དང་བསམ་བློ་བ་ནི་དོན་ངོ་མར་སྤྱི་ཚོགས་ཀྱི་སྣེ་འཁྲིད་པ་དང་། མི་མང་མདུན་ཕྱོགས་སུ་འཁྲིད་མཁན་གྱི་དེད་དཔོན་ཞིག་ཡིན་དགོས་མོད་ང་ཚོ་གངས་ཅན་པར་འདི་ལྟ་བུའི་ཚད་ལྡན་གྱི་རྩོམ་པ་པོ་ག་ཚད་ཅིག་ཡོད་དམ། དངོས་གནས་ཚད་ཐིག་འདིའི་སྟེང་གི་རྩོམ་པ་པོ་ཚོར་གདེང་འཇོག་ག་ཚོད་ཅིག་ཡོད་དམ། དོན་ངོ་མར་ང་ཚོའི་ཤེས་ཡོན་པར་བསམ་བློ་མེད་སོང་བ་མ་ཡིན་པར་ང་ཚོའི་བསམ་ངོ་ན་ཁོང་ཚོའི་རིན་ཐང་གི་གཟི་འོད་མེད་སོང་བས་རེད། དེ་ཡང་ཕར་དེད་ན་རྩོམ་པ་པོ་ནི་ང་ཚོའི་མིག་མདུན་གྱི་རྩོམ་པ་པོ་དེ་ཚོ་དང་འདྲ་བར་གཞི་རྩའི་ཡོན་ཚད་མི་ལྡན་ཞིང་དཀྲུགས་ཤིང་སློང་མཁན། ལེགས་ཉེས་མི་བརྟག་པར་གང་དྲན་གང་བསམ་བརྡ་ནོར་ཡིག་ནོར་གྱིས་འགྲེམས་མཁན་ཞིག་ལ་གོ་སོང་བས་རེད། དྲ་བའི་རིག་གནས་འདིར་ཞུགས་ནས་རང་གི་རིག་གཞུང་སྲུང་སྐྱོབ་བྱེད་དང་རྩ་གཏོར་བྱེད་ནི་འདིར་ཞུགས་པའི་མི་བུ་ཚོའི་ལག་ཏུ་ཡོད་པས་ཕུགས་རྒྱང་རིང་བའི་བསམ་བློ་ཞིག་གིས་ཡང་དག་པའི་འདོར་ལེན་ཞིག་ངེས་པར་དུ་བྱེད་དགོས། འདི་ནི་ཚོད་ཚོད་ལ་བལྟས་ན་དོན་ཆུང་ཞིག་ཏུ་སྣང་མོད་ཞིབ་ཏུ་བསམ་ན་རིག་གཞུང་གསོན་གནས་ཀྱི་སྲོག་རྩ་ལ་རྒྱུས་པའི་འགུལ་སྐྱོད་ཆེན་པོ་ཞིག་ཡིན།