ཨེ་ཤ་ཡའི་དུང་ཟླ་དཀར་པོ།
འཚེ་མེད་བྱམས་བརྩེའི་བདེ་བའི་རོ་མཆོག་འཆམ་མཐུན་འཚོ་བའི་རྨང་གཞི་ཉིད།།
ཆོས་ལུགས་བར་གྱི་རིས་མེད་སྤྱོད་པ་མཆོག་གྱུར་ཆོས་པའི་མཛད་བཟང་ལགས།།
ཆོས་ཚན་རིག་པའི་ཟུང་འབྲེལ་ལམ་བཟང་འགྲོ་རྣམས་བདེ་བའི་རེ་སྨོན་ཡིན།།
འདི་ནི་ཞི་བདེའི་འདྲེན་པ་ཁྱེད་ཀྱི་སྙན་པ་འདེགས་པའི་ལྟ་གྲུབ་བོ།།
ཆེ་དགུས་དབང་དང་མཚན་གྱི་ཆེད་དུ་རང་གི་འབངས་དང་བྲན་ལ་སྡང་།།
ཁྱེད་ཀྱིས་འབངས་དང་དམངས་ཀྱི་ཆེད་དུ་དབང་དང་གོ་ཆའི་མཛེས་པ་དོར།།
འདི་ནི་ཁྱེད་ཉིད་ཁྱད་དུ་འཕགས་པའི་མཛེས་པ་སྟོང་གི་ཉིང་བཅུད་ཡིན།།
འདི་ནི་འགྲོ་བའི་གུས་སེམས་བསུ་བའི་འགྲན་བྲལ་མཆོག་གི་སྤྱོད་པ་ཉིད།།
ཁྱེད་ཉིད་གླིང་འདིའི་རྒྱན་དུ་བཞད་པར་ངོ་མཚར་སྟོང་གི་སྙན་དབྱངས་ལྡིར།།
ཁྱེད་ཉིད་གངས་རིའིི་མགོན་དུ་ཕེབས་པས་གདོང་དམར་བོད་ཀྱི་གཟི་བརྗིད་བཏེགས།།
ཁྱེད་ཀྱི་མཛད་འཕྲིན་སྣང་བ་དཀར་པོས་མུན་གླིང་སྣང་བའི་ཡུལ་དུ་བྱས།།
འདི་ནི་ལོ་རྒན་བདུན་ཅུའི་དུས་ཀྱི་ཁྱེད་སྐུ་བཞད་པའི་དགེ་མཚན་ཡིན།།