རྣམ་རྟོག་རྒོད་པོ།
རྒྱང་བལྟ་མགོ་བོའི་མིག་གིས།
ཡོདཚད་སེམས་ནང་འདྲེན་གིན།
བྱ་སྤོྱ་འཆོལ་བ་མང་པོས།
དུས་ཚོད་བསྐྱལ་ནས་འགྲོ་གི།
རྣམ་རྟོག་རུལ་བ་འདི་ལ།
སོས་པའི་དུས་ཤིག་མི་འདུག་།
ཡང་ཡང་ལོ་མང་ཕྱིན་ཀྱང་།
སེམས་ནས་རུལ་སོང་དྲོ་ཀི།
རང་ཉམས་རྣམ་རྟོག་མ་ཆུན།
དམ་ཆོས་སྒྲུབ་པའི་གནས་ཀྱང་།
འདུ་འཛི་ལང་ལོང་གཡོ་བའི།
འཁྲུགས་པའི་གནས་ཤིག་མཐོང་གི།
བསླབ་བྱ་གསུང་ཚིག་ཟབ་མོ།
ལན་གཅིག་མཇལ་བའི་མོད་ལ།
དམ་ཆོས་སེམས་པའི་རི་མོ།
ཉིན་གསུམ་སེམས་དང་འདྲེས་ཀི།
ཡང་ཡང་རྣམ་རྟོག་རྒོད་པོས།
ཆུ་གཤལ་སེམས་ནང་འདེབ་པས།
རི་མོ་བྲིས་པའི་གསུབ་ཁ།
གཏན་ནས་མཐོང་རྒྱུ་མི་འདུག།
དབེན་པ་རི་ལ་ཆེས་པའི།
སྙིང་སྟོབས་ཆར་སྤྲིན་འཐིབ་ཚེ།
རྨ་བྱས་དགའ་བས་མཇུག་མ་།
ཡང་ཡང་སྒྲེང་དང་མཚུངས་གི།
ཡང་ན་རིག་གཞུང་ཟབ་མོ།
རྒྱུན་འཛིན་གངས་ཅན་བོད་ཕྲུག།
གཞིས་གཞུགས་བོད་ཀྱི་ཡུལ་ན
འཕྲིན་ཡིག་བང་ཆེན་སྐྱལ་འགྲོ།།
ཡང་ན་རྒྱལ་ཁམས་སྐོར་བའི་
ཡར་རྒྱས་ཕྱི་ཡི་གྲོང་དུ
དངུལ་ལོར་གྲངས་འབོར་རྩིས་ནས།
དཔལ་འབྱོར་ཅན་དུ་ཆས་འགྲོ།