༈ ཨ་མའི་ཁ་ཆེམས།

ཨ་མའི་གདོང་ལ་གབ་པའི་སྐྱོ་ཉམས་དེས།།

ཨ་ཕའི་ཁོག་མས་བྲིས་པའི་སྐལ་ཞིག་ལྷག།།

ལྟོ་བ་འབུར་ལ་ཙོག་པའི་ཉིན་ཐོ་ངོས།།

མྱི་སྐད་དག་མོས་ཨ་མར་དངངས་ཤིག་བསླང་།།

 

ཞིག་རལ་གྱང་ལྡེབས་འོག་གི་མལ་ས་རུ།།

ཨ་མའི་རྨི་ལམ་འཁྲུག་པའི་སྒྲུང་ཞིག་བཀལ།།

སྒོ་ཁྱི་རྒྱ་བོས་ལད་ཟློས་འབོད་སྟངས་དེས།།

ཇག་པ་རོང་ལ་ལྕེབས་པའི་གབ་ཚིག་འཐེན།།

ཕྱི་རོལ་མུན་པས་སྟུག་པའི་མཚན་མོ་དེར།།

སྤྱང་མོ་སྟོང་གིས་ལྷས་ར་ཚལ་བུར་བཏང་།།

ནང་མི་བྱང་ཐང་བྲོས་པའི་ཕྱི་ཉིན་ནས།།

སྦྲ་གུར་ངོ་གདོང་འདི་ཡང་སྐྱོ་བས་ཁེངས།།

ཡ་གི་སྒོ་བྱང་མེད་པའི་རི་ཁྲོད་དེར།།

གླེགས་བམ་གཅེན་བུ་དེ་ཡང་འཁྱག་ལ་འབྱར།།

མཆོད་ཀོང་མུག་ཤི་ཐེབས་པའི་གྲ་བཤམ་ན།།

སྒོམ་ཆེན་དབུ་སེར་ཅན་དེ་བྲོས་ན་ཐང་།

མ་གི་སྒར་ལ་བསླང་བའི་དར་བོ་ཆེན།།

དཔུང་པའི་ཤ་རྩི་བསྲེགས་ཏེ་བསྒྲེང་ནས་འདུག།

མིག་ལ་འཚེ་བའི་ཚོན་གྱི་དྭངས་ཀ་དེས།།

ཕ་གཞིས་སྣུམ་པོ་དེ་ཡང་ཆམ་ལ་ཕབ།།

གླིང་བུ་རྩེད་སྟངས་ཤིག་གིས་བྱ་ལས་ཀྱིས།།

རྐང་པའི་གྲལ་ཁ་འཆུག་པའི་བྲོ་ར་གྱེས།།

ཁོག་པ་གདངས་ལ་གྱེར་པའི་གནས་ལུགས་འོག།

འཇིག་རྟེན་ལྟག་སྒོར་འགྲིམ་པའི་གླུ་བ་མང་།

སྒོ་ར་རྙིང་པའི་གྱང་གི་ལྡེབས་རིས་ངོས།།

གཏམ་རྒྱུད་ནག་པོའི་མཆན་ཞིག་བཏབ་ནས་འདུག།

ལྐུགས་ལ་འབྱར་བའི་ཨ་མའི་མཛུབ་མོ་དེས།།

མ་གི་འབྱོར་ལྡན་ཚང་ལ་འཁོན་ཞིག་འདུག།

ཨ་ཕའི་ཁ་ཆེམས་གླེང་དུས་པྲ་འཚག་གིས།།

ཨ་མ་བཤུམ་སྟེ་སྐད་ཆའི་གདངས་ཀྱང་འཁྱོག།

མི་རབས་ཤིག་གི་མི་ཚང་གསང་བ་དེས།།

པུར་སྒམ་ཐེམ་པོ་རྒྱག་པའི་ཚད་དུ་སླེབས།།

2011/93 ཉིན་བྲིས།།