རྨ་ཁ།
ཟླ་མེད་མཚན་མོ་ཡི་འགྲུལ་བསྐྱོད།།
ལུས་ལ་གནོད་པ་ཡང་མ་བྱུང་།།
འདས་དོན་བསམ་གཞིགས་ཀྱི་རི་མོས།།
སེམས་ལ་རྨ་ཁ་ཞིག་བཟོས་བྱུང་།།
མཚོན་ཆས་གཅོད་ལུས་ཀྱི་རྨ་ཁ།།
སྨན་པས་བཅོས་ཐབས་ཞིག་འདུག་ཀྱང་།།
གཟུགས་མེད་སེམས་གཏིང་གི་རྨ་ཁ།།
སྨན་གྱིས་གསོ་ཐབས་ཤིག་མི་འདུག།
མཛེས་སྡུག་ཡིད་འཕྲོག་གི་ལྷ་མོ།།
བརྩེ་འཛུམ་དུང་སེམས་ཀྱི་ཉི་འདོ།།
ཉིན་མཚན་ཁྱད་པ་ཞིག་མེད་ཀྱང་།།
ལས་ཀྱི་སྐལ་བ་དེ་དམན་སོང་།།
བྱང་རྒྱལ་བསིལ་ལྡན་གྱི་ཞིང་ནས།།
ངེས་མེད་ལྷོ་མཐར་རུ་འཁྱམས་པའི།།
བདག་མེད་སྦྲང་བུ་ངའི་རྣམ་ཤེས།།
ཁྱོད་ཀྱི་སྙིང་གཏིང་ལ་ཐིམ་སོང་།།
ཁུ་སིམ་ནམ་ཟླ་ཡི་འགོ་ནས།།
བདེ་སྡུག་ལབ་གླེང་གི་ཕྲེང་བ།།
ངུ་མ་དགོད་སྒྲ་ཡི་གླུ་འདི།།
རྒྱང་རིང་གཞན་གྲོང་ནས་ཕུལ་ཡོད།།
ཀྱག་ཀྱོག་རྒྱུས་མེད་ཀྱི་ཡུལ་ནས།།
རླུང་འཚུབ་ཕར་ཁ་ནས་ལྡང་ཐལ།།
དྲན་གདུང་གངས་ལྷ་ཡི་ཕྱོགས་ལ།།
སྨོན་ལམ་སེམས་དབུས་ནས་འདེབས་ཡོད།།
