ལུས་སྲོག་གི་སྡོང་ཤིང་།
རྭ་རྩེ་རྣོ་ངར་ཅན་གྱི་ཁྱད་ནོར་བ།།
བྲེ་སེར་འབྲོང་ལས་སེམས་ཅན་གཞན་ཡོད་མིན།།
འཚར་དུ་དངར་བའི་གངས་རྒན་ཁྲ་མོའི་རྩེར།།
གཟི་རྔམ་གཏུམ་པོའི་གང་ཟག་རྒྱུ་ཞེ་ན།།
གཡུ་ཡི་རལ་ཅན་འགྱིང་སྟབས་རྔམ་སྟོན་པ།།
ཕོ་ཐོང་སེང་གེ་ལས་གཞན་སུ་ཡང་མེད།།
བསིལ་གྲིབ་ཅན་གྱི་ཙན་དན་ནགས་ཁྲོད་ན།།
བང་རྩལ་འགྲན་མེད་གང་ཟག་ཡོད་ཅེ་ན།།
འཛུམ་དྲུག་ཐིག་ལེ་བརྒྱ་ལྡན་གདུགས་པ་ཅན།།
དམར་ཡག་སྟག་མོ་མིན་པ་སུ་ཞིག་ཡོད།།
རབ་ཡངས་མཁའ་དབྱིངས་མུ་མཐའ་མེད་པ་ན།།
གཤོག་དྲུག་རྩལ་གྱི་བགྲོད་མཁས་ལྡིང་སོང་ན།།
འཕུར་ལྡིང་རྩལ་ཀུན་རྫོགས་པའི་གཤོག་སྒྲོ་ཅན།།
མཁའ་ལྡིང་དབང་པོ་བྱ་རྒྱལ་ཁྱུང་ཆེན་ནོ།།
གངས་རིས་ཡོངས་སུ་བསྐོར་བའི་ཞིང་ཁམས་ན།།
རྒྱལ་གཅེས་དཔའ་བོ་ཕོ་རབ་བརྩི་རུང་ན།།
གཅེས་པའི་ལུས་སྲོག་སྡོང་ཤིང་ལ་བསྒྱུར་ནས།།
མེ་ལྷའི་ཞལ་ཐིམ་ཚེ་དབང་ནོར་བུ་འོ།།
དཔའ་བོས་ལྡོང་རིགས་མཆེད་པའི་དཔའ་རྟགས་བསྟན།།
མི་རིགས་ལ་རྒྱ་དུ་སྤྲིན་དགུང་ལ་འཕྱུར།།
སྲོག་དང་བསྡོས་ཏེ་རྒྱལ་དམངས་དོན་ཆེན་བསྒྲུབས།།
བྱ་དཀའ་སྤྱོད་པ་ལྷུར་ལེན་རྒྱལ་བའི་སྲས།།
རང་དོན་བློ་ངན་ཆུ་རི་ཇི་བཞིན་འདོར།།
གཞན་དོན་བློ་བཟང་རྡོ་བརྐོས་རི་མོ་བཞིན།།
སེམས་དཔའ་ཆེན་པོའི་བྱ་དཀའི་སྤྱོད་པ་ཞེས།།
ཁོ་བོའི་བློ་ལ་བརྗོད་འདོད་ཇི་བཞིན་བྲིས།
ཕལ་པའི་བློ་ལ་དྲན་ཙམ་མི་སྲིད་ལ།།
དྲན་ཡང་བློས་བཏང་འདི་འདྲ་ག་ལ་ཕོད།།
གཞན་གྱིས་མི་ནུས་རླབས་ཆེན་བྱ་བ་འདིར།།
ཡི་རངས་བསྟོད་པའི་མེ་ཏོག་ཀུན་ཏུ་འཐོར།།
ཚེ༵་རབས་དུ་མར་དལ་རྟེན་རིམ་བརྒྱུད་ཅིང་།།
དབ༵ང་པོ་ཀུན་ཚང་གཟུགས་མཛེས་ལང་ཚོ་ལྡན།།
ནོར༵་མང་ལྷ་ཡི་ལོངས་སྤྱོད་ཆར་དུ་སྙིལ།།
བུ༵་རབ་ཁྱེད་ཀྱི་བསམ་དོན་འགྲུབ་པར་ཤོག།
ཅེས་པ་འདི་ཡང་སྙན་དངགས་པ་ཡོན་ཏན་མཆོད་སྤྲིན་རྒྱ་མཚོ་པས་རྒྱལ་གཅེས་དཔའ་བོ་ཚེ་དབང་ནོར་བུའི་བདུན་ཚིགས་ཐ་མར་གདུང་སེམས་མཉམ་བསྐྱེད་ཀྱི་ཚུལ་དུ་ཕུལ།༢༠༡༡ཟླ་༡༠ཚེས་༠༣ཉིན་བྲིས།