ཁམས་བྲག་མགོ་རུ་ཛ་དྲག་གི་གནས་ཚུལ་མུ་མཐུད་ནས་ཐོན་བཞིན་པའི་སྐོར།
རྒྱ་གར་ལྷོ་ཕྱོགས་མོན་གྷོ་ས་གནས་སུ་རྟེན་གཞི་བྱས་ཡོད་པའི་གདན་ས་ཆེན་པོ་དཔལ་ལྡན་འབྲས་སྤུངས་བློ་གསར་གླིང་གྲྭ་ཚང་བྲགས་འགོ་མི་ཚན་ནང་སློབ་གཉེར་བྱེད་བཞིན་ཡོད་པའི་གྲྭ་ངག་དབང་མཁྱེན་རབ་ལགས་ཀྱིས་ཁོ་བོར་བོད་ནང་གི་ཁམས་བྲག་མགོ་ས་ཁུལ་གྱི་ཛ་དྲག་གནས་སྟངས་ཁུངས་ལྡན་གནས་ཚུལ་མཁོ་སྤྲོད་གནང་དོན་ལྟར།
ད་ལྟའི་ཆར་བོད་ནང་གིས་བོད་ས་སྟོད་སྨད་བར་གསུམ་ཁྱོན་ཡོངས་ཀྱིས་བོད་མི་ཚོས་རྒྱ་ནག་དམར་གཞུང་ལ་ཞི་རྒོལ་བྱེད་ཀྱི་ཡོད་པ་བཞིན། ཕྱི་ལོ་༢༠༡༢ / ༡ / ༢༣ ཉིན་ཁམས་བྲག་མགོ་མི་མང་གིས་ཀྱང་ཡར་ལངས་ཞི་རྒོལ་བྱས་པ་ནས་བཟུང་ད་ལྟའི་བར་རྒྱ་གཞུང་གིས་ས་གནས་བོད་ཀྱི་ཡུལ་མི་ཚོའི་ཐོག་དམ་དྲག་ཧ་ཅང་ཆེན་པོར་བྱེད་བཞིན་པ་དང་། ལྷག་པར་དུ་ཉེ་བའི་ཆར་དགོན་སྡེ་ཁག་གི་གྲྭ་པ་བཞི་རེ་ལ་རྒྱ་གཞུང་གིས་ལས་བྱེད་དམ་ཉེན་རྟོག་པ་གཅིག་རེ་བལྟ་སྲུང་བྱེད་མཁན་བཞག་སྟེ་གྲྭ་པ་རྣམས་ཡར་མར་འགྲོ་བསྐྱོད་དགོས་ཚེ་ཁོ་ལ་གང་དུ་འགྲོ་སའི་གནས་དང་ལས་དོན་ཅི་ཡིན་སོགས་གནས་ཚུལ་ཁ་གསལ་འགྲེལ་བརྗོད་བྱས་ནས་ཆོག་མཆན་ཞུ་དགོས་ཀྱིན་ཡོད་པ་མ་ཟད།
ཟླ་འདིའི་ཚེས་༤ ཉིན་ཁ་གསལ་གྱི་གནས་ཚུལ་རྙེད་དོན་ལྟར་ན་ཕྱི་ཟླ་ ༤ པའི་ཚེས་ ༢ ཉིན་བྲག་མགོ་དགོན་པའི་ཕྱག་མཛོད་རྒན་པ་དགེ་བཤེས་བསྟན་འཛིན་དཔལ་བཟང་ལགས་བྲག་མགོ་རྫོང་གི་ཉེན་རྟོག་པར་ཐེ་གཏོགས་གང་ཡང་མེད་པར་གོང་རིམ་ཞིང་ཆེན་དང་ཁུལ་ནས་ཆེད་མངགས་དམག་མི་དང་ཉེན་རྟོག་པ་བཏང་སྟེ། ད་ལོར་ཁམས་བྲག་མགོ་ས་ཁུལ་དུ་བྱུང་བའི་ཞི་རྒོལ་དོན་རྐྱེན་རྣམས་ཀྱི་གོ་སྒྲིག་བྱེད་མཁན་གཙོ་བོ་ཡིན་པའི་ཉེས་མིང་འོག་དགོན་པའི་ནང་ནས་འཛིན་བཟུང་བྱས་ཡོད་པ་རེད་ཅེས་དང་།
ཡང་ཁོང་གིས་དོན་རྐྱེན་དེ་དག་གིས་སྐོར་མུ་མཐུད་ནས་གསུང་དོན། དགེ་བཤེས་བསྟན་འཛིན་དཔལ་བཟང་ལགས་ད་ལྟའི་ཆར་གར་སོང་ཆ་མེད་དུ་གྱུར་འདུག་མ་ཟད་ཉིན་དེ་ནས་བཟུང་བྲག་འགོ་རུ་སྔར་ཡོད་ལས་དམག་མི་དང་ཉེན་རྟོག་རུ་ཁག་ཁ་སྣོན་གྱིས་དམ་དྲག་ཧ་ཅང་ཆེ་རུ་བཏང་ཡོད་པ་དང་སྲང་ལམ་གཡས་གཡོན་ཚང་མར་དམག་གིས་ཁེངས་ཡོད་འདུག ཉེ་སྔོན་ཞི་རྒོལ་བྱས་པ་ནས་བཟུང་རོང་འབྲོག་དབྱེར་མེད་ཀྱིས་ཡུལ་ཚོ་སོ་སོར་“学习班”སློབ་གསོ་རུ་ཁག་ཅེས་པ་བཙུགས་ནས་ཡུལ་ཚོ་རེ་རེ་ལ་ཡང་ཉུང་མཐར་མི་མང་བརྒྱ་ཕྲག་མང་པོ་དོན་མེད་འཇུ་བཟུང་གིས་གང་བྱུང་ཉེས་རྡུང་གཏོང་བ་དང་། དོན་མེད་ལས་ཀ་སྤྲད་དེ་བཀག་ཉར་བྱས་དང་བྱེད་མུས་ཡིན་པ་དང་། དེའི་ནང་ནས་འགའ་རེར་ཉེས་རྡུང་བཏང་སྟེ་ཉིན་ཤས་ཀྱི་རྗེས་ལ་གློད་གྲོལ་བཏང་ནའང་ཉེས་ཆད་རྒྱ་སྒོར་གཅིག་སྟོང་ལྔ་བརྒྱ་ནས་སུམ་སྟོང་བར་གཅོད་བཞིན་ཡོད་འདུག
ས་གནས་ཡུལ་མི་རྣམས་རྫོང་དང་ཡུལ་ཚོའི་ཐོག་ཏུ་རང་གར་སོང་ན་ཡང་ཉེན་རྟོག་པས་འཛིན་བཟུང་བཀག་ཉར་དང་། རྡུང་རྡེག་གཏོང་གིན་ཡོད་སྟབས་བོད་མི་ཚོས་དུས་རྒྱུན་སྤྱོད་བཞིན་པའི་ཇ་ཚྭ་ཡང་ཉོ་སར་འགྲོ་མི་ཕོད་པར་ཞག་པོ་ཉི་ཤུ་ལྷག་ལ་ཆུ་ཁོལ་རྐྱང་པ་འཐུང་ནས་སྡོད་དགོས་བྱུང་བ་དང་རྩམ་པ་སོགས་ཟ་བྱའི་རིགས་ཀྱང་ཆད་དེ་ད་ལྟ་ཁམས་བྲག་མགོ་ས་ཁུལ་གྱི་བོད་མི་ཚོར་དཀའ་ངལ་ཧ་ཅང་ཆེན་པོ་འཕྲད་བཞིན་ཡོད་འདུག
ཡང་ཁོང་རྒྱ་གཞུང་གིས་འཇུ་བཟུང་བྱས་ཟིན་པའི་བྲག་འགོ་དགོན་པའི་ཕྱག་མཛོད་དགེ་བཤེས་བསྟན་འཛིན་དཔལ་བཟང་ལགས་ངོ་སྤྲོད་གནང་དོན།
བྲག་འགོ་དགོན་པའི་ཕྱག་མཛོད་དགེ་བཤེས་བསྟན་འཛིན་དཔལ་བཟང་ངམ་(བསྟན་དགའ་)ལགས་ནི་ཕྱི་ལོ་༡༩༦༥ལོར་བྲག་མགོ་ནོར་བ་རུ་ཕ་དོན་འགྲུབ་བཀྲ་ཤིས་དང་མ་བདེ་དབང་གཉིས་སུ་འཁྲུངས་ཤིང་། ཆུང་དུས་ས་གནས་སློབ་ཆུང་འགྲིམས་ཏེ་རྒྱ་བོད་ཀྱི་ཡིག་རིགས་ལ་སྦྱང་པ་གནང་། དེ་རྗེས་བྲག་མགོ་དགོན་པའི་ཆོས་སྒོར་ཞུགས་ཏེ་དགོན་དེའི་སྒྲིག་འོག་ནས་འདོན་ཆོས་སོགས་ལ་ལེགས་པར་བསླབ།
ཕྱི་ལོ་༡༩༨༦ ལོར་རྒྱ་གར་ལ་བཙན་བྱོལ་དུ་ཕེབས་ཏེ་འབྲས་སྤུངས་བློ་གླིང་གྲྭ་ཚང་གི་ཆོས་སྒོར་ཞུགས། སྔ་ཕྱིར་གཞུང་ཆེན་ཁག་ལ་སློབ་གཉེར་གནང་ཞིང་ཕྱི་ལོ་༢༠༠༩ ལོར་དགེ་བཤེས་ཀྱི་མཚན་རྟགས་བཞེས། ལོ་དེར་ཕྱིར་རང་ཡུལ་ལ་ཕེབས་ཏེ་བྲག་མགོ་དགོན་པའི་ཕྱི་ནང་གི་ལས་དོན་རྒྱ་ཆེར་གནང་ཞིང་ད་ལྟ་བྲག་མགོ་དགོན་པའི་ཕྱག་མཛོད་རྒན་པའི་ཐུགས་འགན་བཞེས་བཞིན་ཡོད།
ཉེ་ཆར་བྲག་མགོའི་མང་ཚོགས་ཀྱིས་རྒྱ་གཞུང་ལ་ཞི་རྒོལ་བྱས་རྗེས་ད་བར་བྲག་མགོའི་སེར་སྐྱ་གང་མང་འཇུ་བཟུང་བཀག་ཉར་དང་ཁྲིམས་གཅོད་ནན་མོར་གཏོང་བཞིན་ཡོད་པ་ལྟར། ཕྱི་ཟླ་ ༤ པའི་ཚེས་ ༢ ཉིན་བྲག་མགོ་རྫོང་གི་ས་གནས་ཉེན་རྟོག་པར་ཐེ་གཏོགས་གང་ཡང་མེད་པའི་ཐོག་ནས་གོང་རིམ་ཞིང་ཆེན་དང་ཁུལ་ནས་དམག་མི་དང་ཉེན་རྟོག་པ་ཆེད་མངག་བྱས་ཏེ། ད་ལོར་བྲག་མགོར་བྱུང་བའི་ཞི་རྒོལ་བ་རྣམས་ལ་གོ་སྒྲིག་བྱེད་མཁན་གཙོ་བོར་ཡིན་པའི་ཉེས་མིང་འོག་འཇུ་བཟུང་བྱས་ཏེ་ད་ལྟའི་ཆར་ས་གནས་གང་དུ་ཁྲིད་མིན་དང་བཙོན་ཁང་གང་དུ་བཀག་ཉར་བྱས་ཡོད་མེད་སོགས་སུ་གང་གིས་ཤེས་རྟོགས་ཐུབ་མི་འདུག་ཅེས་འགྲེལ་བརྗོད་གནང་སོང་།
