༄༅།། ལྐོག་ཟ་རུལ་སོང་བྱེད་མཁན་གྱི་སྒྲོལ་དཀར་ལྷ་མོའི་གནད་དོན་གླེང་བ།
བོད་ཀྱི་བང་ཆེན་ཚང་ལ་བློ་ཕམ་ཡོད།
བུད་མེད་ཚོགས་པའི་ཚོགས་གཙོ་སྒྲོལ་དཀར་ལྷ་མོས་ལྐོག་ཟ་རུལ་སོང་བྱས་པའི་དངོས་ཡོདཀྱི་བདེན་གཏམ་ལ་འགྲེལ་བཤད་རྫུན་མ་ཞིག་དང་འཁྱོགས་བཤད་ལྷག་པོ་ཞིག་རྒྱག་དགོས་དོན་མ་མཆིས་ལ།ཁྲེལ་མེད་ཀྱི་ལས་གཞི་འདིའི་རིགས་ཤི་གསང་རོ་གསང་བྱེད་པ་ནི་དེ་བས་ཀྱང་འོས་པོ་ཞིག་གཏན་ནས་མ་ཡིན་སྙམ།ཁྱད་པར་དུ་གཞུང་ཞིབ་ཀྱི་མི་སྣ་ཞིག་གིས་འདི་ལྟ་བུའི་བྱ་ངན་གྱི་ལས་གཞི་བརྩམས་པ་འདི་མཐོང་ཚེ།བོད་སྤྱི་བའི་བདེ་སྡུག་ལ་བསམ་བློ་ཅི་ཙམ་གཏོང་གི་ཡོད་མེད་ར་སྤྲོད་གསལ་བོ་བྱེད་འདུག་པ་མ་ཟད། དགྲ་དགའ་གཉེན་སྡུག་གི་བྱ་ངན་སྐྱུག་བྲོ་བ་ཞིག་གིས་བོད་སྤྱི་བའི་རྩ་དོན་སྣང་མེད་དུ་རླུང་ལ་བསྐུར་བ་དང་། རྡོ་ལ་གཞུས་པ་ཞིག་ཡིན་པར་སེམས།
ད་དུང་ནག་ཉེས་ལ་ངོས་ལེན་དང་ཉེས་སྐྱོན་ལ་འགྱོད་བཤགས་མེད་པར་གསར་ཁང་དང་རྒྱུད་ལམ་ཁག་ལ་རང་སྐྱོན་འགེབས་བསུམ་བྱེད་པའི་ཐབས་ཤེས་ཡོད་དགུ་རྩ་དཀྲུགས་བྱས་པ་ སོགས་ངོ་ཚ་ཁྲེལ་མེད་ཀྱི་ལས་འགུལ་སྤེལ་བ་དེ་དང་།དེ་མཚུངས་གསར་ཁང་ཁག་གིས་ཀྱང་ སྒྲོལ་དཀར་གྱི་ནག་ཐིག་རྣམས་གཡོལ་ཐབས་ཀྱི་ལས་ལ་བརྩོན་པ་འདིའི་རིགས་ནི་དངོས་ གནས་བོད་སྤྱིའི་གནད་དོན་ལ་བསམ་གཞིགས་དང་། སྤྱི་ཚོགས་ཀྱི་འགན་འཁྲི་མ་ཁུར་པའི་ བརྡ་རྟགས་མ་ནོར་བ་ཞིག་ཡིན་པའི་ར་སྤྲོད་གསལ་བོ་བྱས།
སྤྱིར་གསར་ཁང་འགས་དགོས་མེད་ཉོག་གཏམ་མང་པོ་ཞིག་དོན་དངོས་ཡིན་མིན་ལ་མ་ལྟོས་པར་གང་སར་ཁྱབ་བསྒྲགས་དང་།ལོ་མང་དྲ་ཐོག་ཏུ་བཞག་ལུགས་ལ་ལྟ་དུས་འདིའི་འདྲའི་གནད ་དོན་ཚབ་ཆེན་རིགས་དྲ་ཐོག་དང་ཚགས་ཤོག་ཁག་ཏུ་འགོད་དགོས་པ་ལས། ཅི་ཡང་མ་ཚོར་ མདོག་མདོག་གིས་སྦས་གསང་བྱེད་རོགས་བྱེད་པ་ནི་ཧང་སང་ཧོན་འཐོར་གྱི་གནས་སུ་གྱུར་བ་ཞིག་རེད། ལྷག་དོན་ཁར་སང་བང་ཆེན་ གསར་ཁང་གིས་འདིའི་སྐོར་གྱི་གནས་ཚུལ་ཞིག་དྲ་ཐོག་ཏུ་བཏང་འདུག་མོད། འོན་ཀྱང་སྐར་ཆ་འགའི་རྗེས་ནས་ནག་བསུབ་བཏང་བ་སོགས་ལ་བསམ་ཚེ། སྒྲོལ་དཀར་ལྷ་མོ་ནི་ཇི་འདྲའི་ནུས་ཤུགས་ཅན་གྱི་དཔའ་མོ་ཞིག་ཡིན་པ་སེམས་སོ།
འཛམ་གླིང་རྒྱ་ཁབ་ཁག་གིས་ལྐོག་ཟ་རུལ་བྱེད་མཁན་ལ་ངོ་རྒོལ་དང་སྐྱོན་མཚང་ཐེར་འདོན་གྱི་འདྲེན་བརྡ་བཏང་དང་གཏོང་བཞིན་པའི་སྐབས་འདིར། འུ་ཚོ་དེ་ལས་ལྡོག་སྟེ་གཅིག་མཚང་ གཅིག་གིས་འགེབས་བཞིན་རང་མགོ་རང་གིས་གཡོག་ལུགས་ལ་ལྟ་དུས། ད་གཟོད་འུ་ཚོ་རྗེས་ལུས་ནང་གི་ཡང་ལུས་ཡིན་པའི་ངེས་ཤེས་སྐྱེས་སོང་ལ་ད་དུང་མུ་མཐུད་དུ་འདི་ལྟ་བུའི་ ཁྲེལ་མེད་ཀྱི་སྟེགས་བུ་ལས་བརྒལ་མ་ཐུབ་ཚེ་ཡར་རྒྱས་དང་མདུན་སྐྱོད་ཀྱི་ལས་འགུལ་ཞིག་གང་ནས་བཙལ་དགོས།
སྤྱིར་འུ་ཚོ་བོད་ལ་མཚོན་ན་དཔལ་འབྱོར་གྱི་ཡོང་འབབ་ཤིན་ཏུ་ཞན་པ་དང་། དེའི་ཐོག་རྒྱ་དམར་གྱིས་ནང་ནས་ཟོས་ཏེ་ཤ་ཟད་རུས་པ་ལ་གཏུགས་པ་དང་། ཕྱི་སྡོད་བཙན་བྱོལ་བ་ནང་ཁུལ་རང་མིས་ཟོས་ཏེ་སྤྲང་པོ་དབྱུགས་ཐོགས་པ་ལ་བསྒྱུར་བའི་ངང་ཚུལ་འདི་དག་མཐོང་ཚེ། ཕྱི་དགྲ་རྒྱ་དམར་ལས་ནང་སྒྲ་ལྐོག་ཟ་ཅན་ཚོར་ཁོང་ཁྲོ་གཏིང་ནས་ལངས་པ་དང་། སེམས་པ་རྨང་ནས་འཁྲུགས་པའི་གནས་སུ་གྱུར་དོ།།