སྒོ་ཁྱིའི་ལས་དབང་།
གུ་ཡངས་ཀྱི་ཡུལ་ལུང་ཞིག་ལ།
སྒེར་གཅོད་ཀྱི་ཁྱད་གསོད་མེད་པའི།
རང་དབང་གི་འཚོ་བ་དྲན་དུས།
འགྲོ་འདོད་ཀྱིས་བཙན་བསྐུལ་བཏང་བྱུང་།
མི་རིགས་ཀྱི་ཁྱིམ་གཞི་འདི་ལ།
བརྩེ་དུང་གི་ལྕགས་ཐག་སྲ་མོའི།
དམ་ཚིག་གི་མདུད་ནག་ཡོད་དུས།
སྒོ་ཁྱི་ལ་འགྲོ་དབང་མི་འདུག
ཁྱིམ་གཞིར་ཡི་ཨ་མ་རྒན་མོའི།
སྐྱིད་སྡུག་གི་འབྲོག་པའི་འཚོ་བ།
དྲན་འཛིན་གྱི་ཡུལ་དུ་ཤར་དུས།
སྒོ་ཁྱི་ལ་བརྗེད་དབང་མི་འདུག
ཉེས་མེད་ཀྱི་གཡང་དཀར་ལུག་ཁྱུ།
སྤྱང་ཚོགས་ཀྱིས་མཐའ་ནས་སྐོར་བར།
དྲན་ཤེས་ཀྱི་ཡུལ་དུ་ཤར་དུས།
སྒོ་ཁྱི་ལ་སྐྱུར་དབང་མི་འདུག
ལྷས་མཐའ་གྱི་འབྲོག་འཕྲུག་སྐྱ་རིས་།
པགས་རྩག་ནང་ཤིག་གིས་སྡང་བར།
མཐོང་ཤེས་ཀྱི་མིག་ལམ་ཤར་དུས།
སྒོ་ཁྱི་ལ་སྐྱིད་དབང་མི་འདུག
སྦྲ་ནང་གི་འབྲོག་རྒན་ཁ་གཉག
གཡག་ཤ་ལ་རོལ་དབང་མེད་པར།
ཐོས་འཛིན་གྱི་རྣ་བས་གོ་དུས།
སྒོ་ཁྱི་ལ་འཁྱམ་དབང་མི་འདུག
བརྩེ་དུང་གི་ལྕགས་ཀྱི་ཐག་པ།
དུམ་བུ་རུ་ཆད་པའི་དུས་ཤིག
ཁྱིའི་ཚེ་ལ་ཡོང་ཡ་ཡོད་ན།
སྒོ་ཁྱི་ངས་སྐྱིད་ཤིག་རིག་བ།