བཀའ་རྒྱུད་བསྟན་པའི་རྒྱལ་མཚན་ཆེན་པོ་ཤེས་རབ་གླིང་གི་པ་བཾ་
སྐྱབས་རྗེ་སི་ཏི་རིན་པོ་ཆེ་མཆོག་གིས་རཏྣའི་ཚེ་སྒྲུབ་ཀྱི་སྒོ་ནས་
བྷིར་ཚེ་རིང་ལྗོངས་སུ་བསྒྲུབ་པ་ཆེན་མོ་ཉིན་བཅུའི་རིང་དུ་ཡོངས་སུ་འཚོགས་ཟིན་ཏེ་དེ་རིང་༢༠༡༢ལོ་ཟླ་༥་པའི་ཚེས་༣༡་སྡ་དྲོ་ཆུ་ཚོད་༡༡་ནས་ཕྱི་དྲོ་ཆུ་ཚོད་གསུམ་བར་དུ་བྷིར་མི་མང་
ཡོངས་ལ་ཚེ་སྒྲུབ་གསང་བ་འདུས་པའི་ལས་ཆོག་གི་སྒོ་ནས་ཚེ་དབང་དང་ཚེ་འགུག་བཅས་གནང་ཡོད་པ་དང་། དེར་འདུས་ཀྱི་མི་གྲངས་ནི་ལྔ་བརྒྱ་ནས་དྲུག་བརྒྱ་ལ་ཟིན་ཙམ་ཞིག་འཛོམ་ཐུབ་ཡོད་པ་རེད་འདུག ཚེ་རིང་ལྗོངས་ཚོགས་ཁང་ཆེན་མོ་མདུན་ནས་བཞུགས་ཁྲི་ཁམས་གསུམ་སྟེང་དུ་ཞབས་ཀྱི་པད་མོ་མངོན་པར་བཀོད་དེ་སྤོས་སྣེ་དང་རོལ་དབྱངས་སྣ་ཚོགས་བཅས་ཀྱིས་སྣེ་ལེན་གཟབ་རྒྱས་དང་འབྲེལ་དཔོན་སློབ་མཉམ་འཛོམས་ཀྱི་དགའ་སྐྱིད་ཡོང་ལང་ལ་ལོངས་སུ་སྤྱོད་ཡོད་པ་རེད་འདུག དེ་རྗེས་སུ་སི་ཏུ་སྐུ་གོང་མའི་དབུ་ཞ་མཐོང་གྲོལ་ཆེན་མོ་མི་མངས་ཡོངས་ལ་མཇལ་ཁ་གནང་ཡོད་ཅིང་། དེ་རྗེས་མི་མངས་ལ་ནང་ཆོས་དང་འབྲེལ་བའི་བཀའ་སློབ་ལམ་སྟོན་དང་། ལས་གང་བྱས་ཀྱང་བདེན་པ་དང་འཚེ་བ་མེད་པ་ལ་གཞི་བཅོལ་དགོས་པ་གལ་ཆེན་པོ་ཡིན་པ་དང་། ཕྱི་སོ་ཐར་ནས་བཤད་པའི་མི་དགེ་བཅུ་སྤོང་གི་ཚུལ་ཁྲིམས་ཟེར་བ་དེ་ཆོས་ཀྱི་རྩ་བ་ཡིན་པ་དང་། དེ་གཞི་ལ་བཞག་པའི་ཐོག་ནས་བྱང་སེམས་ཀྱི་བསླབ་པ་ཟེར་བ་དེ་ལ་སྦྱིན་པ་ལ་སོགས་པས་བློ་སྦྱོང་བ་མེད་ན་བྱང་ཆུབ་ཀྱི་སེམས་ཟེར་བ་དེ་ཁ་སྟོང་ལག་སྟོང་ཡོང་ཐབས་མེད་པ་དང་། དེ་ནས་དམ་ཚིག་ཟེར་བ་དེ་བླ་མའི་ཆོས་དང་འབྲེལ་བའི་གསུང་ཡོངས་རྫོགས་ལ་ཇི་གསུང་བཀའ་སྒྲུབ་བྱེད་དགོས་པ་ཞིག་ཡིན་ལ། བླ་མ་ཟེར་བ་དེ་ཡང་དབང་ལུང་ཁྲིད་མན་ངག་ཆ་ཚང་བ་ཡོད་ས་དགོས་ལ། དེ་ནི་བླ་མས་སངས་རྒྱས་ཀྱིས་ཚབ་བྱས་ནས་མན་ངག་དང་ཁྲིད་དང་ལུང་འབོག་པ་སོགས་བྱེད་དགོས་པ་རེད་བཀའ་སློབ་གཟབ་རྒྱས་གནང་རྗེས་ཚེ་དབང་ཚེ་འགུག་གནང་ཡོད་པ་རེད།
