མི་འདི་ཚོ།
མི་ལུས་ལྷ་ཡི་གསོབ་དུ་ཞུགས་ཀྱང་།།
ལྷ་ཡི་སེམས་པས་མི་ཁོག་སྟོང་པ།།
ལྷ་མཆོག་མི་ཡི་གར་དུ་ཕེབས་པས།།
མི་ཡི་ཆགས་སྡང་རྒྱུད་དང་འདྲེས་པ།།
བདག་འཛིན་མགོ་བོར་ཞེན་མེད་མར་གྱིས་བྱུགས།།
བརྩེ་བའི་ཤུན་པ་ཆགས་པའི་ངད་ཀྱིས་གཟེར།།
བྱམས་པའི་སེམས་ལ་ཞེ་སྡང་རྒྱ་ཡིས་བཏབས།།
གདུལ་བྱའི་འགྲོ་ལ་གཏུམ་དྲག་སྤྱོད་པ་ངོམ།།
མི་འཕྲོད་སྲིད་ཀྱི་སོ་ཁ་ན།།
ལྷ་ཆོས་སྙིང་པོ་སྐེམ་ལ་རིད།།
ཤུན་པགས་བརྕེ་བས་བཏུམ་པའི་སྲིད།།
ཞ་ཞིང་གོག་པས་རང་ལུས་ཕུང་།།
ཁ་སྙན་གཏམ་ལ་བདག་པོ་མེད་པས་ཡུག་གསུམ་གོ་ལར་ཧབ་ཀྱིས་བཀང་།།
ཉམས་ལེན་བུ་ཆུང་ནུར་འགྲོས་ཞན་པས་ང་བདག་སྒྱིད་པུའི་བར་དུ་ལུས།།
གོ་སའི་ཁྲི་ལ་སྙིང་ནས་འཁྲེང་པས་བཟང་སྤྱོད་མི་གཞི་གཏའ་མར་བཞག།
གཡོལ་མེད་ཁྲི་ལ་གསོང་པོར་བཞུགས་ཀྱང་དོན་དང་དམ་བཅས་རབ་ཏུ་སྟོང་།།
གནའ་བོའི་ཞེན་རིས་དམར་འོད་ཅན།།
སྦས་པའི་ཚོན་གྱིས་ཡང་ཡང་བཀྱེས།།
བསད་རྟགས་དོན་སྙིང་སྤྱན་གཟིགས་ཚེ།།
མི་མངོན་དགྱེས་པའི་བཞད་སྒྲ་ཆེམས།།
མི་མཛའི་མགོ་ལ་དབུ་རྨོག་བཙན་པོ་བགོས།།
མི་རན་ལུས་ལ་དར་གྱི་ཤམ་བུ་ཀླུབ།།
ཕྱག་མཚན་བགྲང་ཕྲེང་སྦ་བའི་མཚོན་རྣོན་ཅན།།
བསྟན་བསྲུང་ཡིན་པས་རང་བསྟན་བསྲུང་ལ་མཁས།།
ཞུམ་མེད་སྙིང་སྟོབས་གཞན་དོན་ལས་ལ་གཡེལ།།
ཡོད་རྒུའི་སྟོབས་ཀྱིས་རང་འདོད་ཁྲི་ཆེན་བརྩེགས།།
བཟང་པོའི་ཟོལ་གྱིས་ཞི་འཇམ་ཁ་བརྡ་ལྷོད།།
བྱས་བྱས་རེ་ལ་ཁ་ཁོག་རྒྱབ་མདུན་རེ།།