གྲོང་གསེབ་ཀྱི་བདེ་སྡུག་ལ་ཕྱི་མིག་ཞིག་གིས་བལྟས་པ།
ངའི་མི་ཚེ་སྟོད་ལ་ཕ་མྱེས་མང་པོ་ཞིག་རྒྱ་ཀུང་ཁྲན་གྱི་མེ་མདའི་འོག་ནས་
འདས་གྲོང་དུ་འགྲོ་ཚར་ནས་དུས་ཚོད་གཉིས་པ་དེ་ང་ཚོའི་མགོ་ལ་ཇི་ཡོང་
རྒྱུ་ཡིན་པ་མ་ཤེས་ནས་བསྡད་ཡོད། སྐབས་དེ་དུས་ང་ཚོ་ལ་ང་ཚོའི་ཁྱིམ་ཚང་གི་མི་རབས་དག་གི་བརྒྱུད་རིམས་དེ་དག་སྐྱིད་པོ་དང་སྡུག་པོ་གང་གི་འོག་ནས་འགྲོ་བཞིན་ཡོད་པ་ང་བྱིས་པའི་སྐབས་ངས་ཧ་མི་གོ
ད་དུང་དགོད་བྲོ་བ་ཞིག་ལ། ང་ཚོ་སུ་ཡིན་དང་རྒྱལ་ཁབ་སུ་ཡིས་མི་ཡིན་པ་དེ་བས་ངས་ཧ་མི་གོ དེ་མ་ཟད་ང་རང་གི་སྦོ་བོ་དམ་པ་ཁོང་དང་། ཁོང་གི་སྤུན་གསུམ་བཅས་ཉིན་གཅིག་དུས་གཅིག་ལ་དམར་དམག་གི་མེ་མདའི་འོག་ཏུ་འདས་གྲོངས་སུང་སོང་བ་དེ་བས་ཀྱང་ག་ལ་གོ གལ་སྲིད་གོ་བའི་དབང་དུ་བཏང་རུང་། གང་ཞིག་གི་ཆེད་དུ་ཡིན་པ་ག་ལ་གོ
ང་སྙིང་མ་རྗེ། སྐབས་དེ་དུས་ང་ཆུང་དུས་བྱིས་པའི་སྐབས་རེད། དེ་ཡི་སྐབས་སུ་ང་ཚོའི་གྲོང་ཚོ་དེ་མཉམ་ལས་ཅན་ཡིན་པ་དེ་ངས་ད་དུང་དྲན་གི་འདུག དེ་དུས་ང་ནམ་རྒྱུན་ཨ་མས་ཉི་ར་ནང་དུ་སྐེ་རགས་ཤིག་གིས་སྐེད་པ་ནས་འཛེར་འགོ་ཞིག་ལ་བཏགས་ནས་སྦྲེལ་བཞགས་་པ་དེ་དྲན་གི
ངའི་ཨ་མ་མོ་རང་སྔ་ས་ནས་ལས་ཀར་མ་འགྲོ་ན་ལས་ཀའི་ཨང་གི་རགས་ཐབས་མེད་། དེང་སང་བཞིན་དུ་མོ་རྣམས་ཀྱིས་གཅེས་ཕྲུག་ཉར་ནས་འདུག་ལོང་ཅི་ལ་ཡོད། མཉམ་ལས་ཀྱི་དེ་ཡི་མིང་ལ་རྒྱའི合作社ཟེར། དེ་ཡི་སྐབས་སུ་ཞིང་ལས་དང་ཕྱུག་ལས་ཚང་མ་མཉམ་ལས་ཡིན་རབས་བཤད་རྒྱུ་ཡོད། ཉིན་ཞིག་ཨ་མས་ང་ལས་ཀའི་ས་རུ་ཁྲིད་ནས་སོང་། ཉིན་དེ་ནི་ང་ལ་མཚོན་ན། ང་འཇིག་རྟེན་འདིར་བསླེབས་ནས་ཁང་པའི་ཕྱི་ལོགས་སུ་ཐོན་ནས། ཁྱིམ་མཚེ་གྱི་མི་རྣམས་ཀྱི་མཉམ་ལས་བྱེད་པ་མཐོང་བ་དེ་ཐེངས་མ་དང་པོ་ཡིན། ཉིན་དེ་ཁང་འགེབ་ཅན་ཆེན་པོ་ཞིག་གི་འོག་ཏུ་ས་གཡོས་ནས་ས་ལ་འདམ་སྦྱར་བཞིན་པའི་ཉིན་མོ་ཞིག་དང་ཏག་ཏག་ཁེལ་ནས་འདུག དེ་ཡི་ཐོག་ཏུ་ནས་བརྡུང་དགོས་པ་རེད་ཟེར།
ངས་ཡང་སྐབས་དེ་དུས་ས་འདམ་ཅུང་ཞིག་རྩེ་སྤྱད་དུ་རགས་ཤིང་། ས་དེ་ངས་ཕྱིར་ཁྱིམ་དུ་ཁྱེར་སོང་ནས། སྐས་དམ་ཀྱི་ཐོག་ཏུ་ས་འབི་འབི་བཟོས་ནས་རྩེད་མོ་རྩེས་མ་དེ་དྲན་གི དེ་ནས་ང་ལོ་ཅུང་ཙམ་ནར་སོན་པ་ན། ཨ་མས་ང་གང་སར་མཉམ་དུ་ཁྲིད་ནས་འགྲོ་བཞིན་ཡོད། སྐབས་རེ་ང་ཧ་ཅུང་སྒོད་བག་ཆེ་བ་དང་། ཨ་མས་ཁ་ལ་མ་ཉན་པའི་སྐབས་སུ། ཨ་མས་ང་ལ་འདི་ལྟར་བརྗོད་མྱོང་ཡོད། རྒྱ་ཧོ་ཙི་ཧོ་ལས་ཡོང་གིན་འདུག་ཟེར་། ཡིན་ན་ཡང་། སྐབས་དེ་དུས་ངས་དེ་ནི་ཞེད་སྣང་ཚ་པོ་ཞིག་ཡིན་པ་ཙམ་ཧ་གོ་བ་ལས་དེ་གང་ཞིག་ཡིན་པ་ཅི་ལ་ཧ་གོ འོན་ཀྱང་ངས་རྒྱ་ཟེར་བ་དེ་ཐོག་མར་ཧ་གོ་བའི་དུས་ཞེ་སྣང་དང་དངངས་འཚབ་ཅན་དུ་ཧ་གོ
དེ་ཡི་རྗེས་རྗེས་ཀྱི་ཉི་མ་ཞིག་ལ། ཨ་མས་ང་དགོན་པ་རུ་མཆོད་མཇལ་དུ་ཁྲིད་ནས་སོང་བ་རེད་། དགོན་པ་དེ་ནི་ཧ་ཅུང་ཐག་རིང་ཞིག་ཏུ་ཡོད་པ་དང་། ཨ་མ་ངེད་གཉིས་ནི་དེ་རིང་ཧ་ཅུང་ཐག་རིང་ཞིག་ཏུ་འགྲོ་བཞིན་ཡོད་པ་ཚོར། ཡིན་ན་ལེ་བར་བདུན་ཙམ་ཀྱི་ས་ཐག་རེད།
དེ་དུས་ཡར་མར་འགྲོ་སྐབས་ལ་མི་སྒེར་ལ་རླངས་འཁོར་དཀོན་པོ་ཡིན་པར་མ་ཟད། ངེད་ཚོ་བའི་མཉམ་ལས་ཚོང་ལ་ཡང་འདྲུད་འཐེན་འཁོར་ལོ་རྙིང་པ་ཞིག་ལས་མེད། དེ་ལ་བལྟས་ན་མཉམ་ལས་དེ་བཙུགས་ནས་ཏག་ཏག་ལོ་མང་པོ་ཞིག་ཕྱིན་ཡོད་པ་འདྲ། ངེད་གཉིས་མཇལ་འགྲོ་སའི་དགོན་པ་དེ་ནི་གཞུང་ལམ་ནས་སྤྱི་ལེ་བདུན་ཙམ་ཞིག་འགྲོ་དགོས་པར་མ་ཟད། ས་མདོ་ཞིག་ཏུ་སླེབས་རྗེས་ད་དུང་རི་ལ་ཡར་འབྱར་ནས་འགྲོ་དགོས།
དེའི་ཉིན་དང་པོར་ཨ་མ་ངེད་གཉིས་ཁྱིམ་ནས་འགྲོ་སྐབས་ང་རང་ཏོག་ཙམ་ཞིག་འགྲོ་ཐུབ་གི་འདུག དེ་ནས་ཅུང་ཙམ་མར་སོང་བ་དང་ང་རང་འགྲོ་མ་ནུས་ནས་ཨ་མས་རྒྱབ་ཏུ་ཁུར་ནས་སོང་། ངེད་གཉིས་དགོན་པར་སླེབས་པ་དང་མཉམ་དུ་། ངས་ཐོག་མར་ཁང་པ་དམར་པོ་ཆེན་པོ་ཞིག་བཤིགས་ནས་ནང་གི་ལྷ་སྐུ་དང་ཀྱང་གི་རི་མོ་ཡག་པོ་དེ་འདྲ་བ་མང་པོ་ཞིག་མིག་ལ་མཐོང་བྱུང་།
ཚང་མས་བཤད་ན། དེ་ནི་གནའ་ང་ཚོའི་འདུ་ཁང་ཆེན་མོ་དེ་། དམར་དམག་གིས་གཏོར་བཤིགས་བཏང་བ་དེ་རེད་ཟེར་གི དེ་ཡི་འགྲམ་དུ་ཀུར་ཆེན་པོ་ཞིག་ཕུབ་ནས་ཡོད་ཅིང་། དེ་ཡི་ནང་དུ་རྔ་དུང་རོལ་མོ་མང་པོ་ཚོར་རྒྱུ་འདུག གུར་གྱི་ནང་དུ་མི་གོས་དམར་པོ་གྱོན་པ་མང་པོ་ཞིག་གི་རོལ་མོ་སོགས་དཀྲོལ་ནས་འདུག་པ་མཐོང་དུས། ཨ་དངོས་ནས་མི་འདི་ཚོས་ནམ་རྒྱུན་རོལ་མོ་འདི་དག་གིས་རྩེ་ནས་འདུག་རྒྱུ་ཡོད་པ་འདྲ་བས་ཅི་འདྲ་སྐྱིད་པ་ལ་སྙམ་དུ་བསམ་ནས་ཡིད་སྨོན་ཤོར།
འདི་ནི་ངའི་མི་ཚེ་ནང་དགེ་འདུན་པའི་སྡེ་ཟེར་བ་དེ་ཐོག་མར་མཐོང་བ་དང་། རྒྱ་མའིས་གཏོར་བརླགས་བྱས་པའི་འདུ་ཁང་ཆེན་མོའི་ཞིག་རལ་ཅན་དེ་མཐོང་བ་ཐོག་དང་པོ་ལོས་ཀྱང་ཡིན། ཡིན་ན་ཡང་འདུ་ཁང་ཆེན་མོ་དེ་ཅིས་ཕྱིར་གཏོར་བརླག་བྱས་པ་ཡིན་པར་དོ་སྣང་ཙམ་ཡང་བྱུང་མེད། རྒྱུ་མཚན་ནི། བྱིས་པའི་གནས་སྐབས་ཟེར་བ་དེ་ནི་ཕལ་ཆེར་གང་ཞིག་མཐོང་རུང་ཐོས་རུང་དེ་ཡི་རྒྱབ་ལྗོངས་མི་འཚོལ་མཁན་རྐྱང་རྐྱང་ཡིན་པ་ལས། ཤེས་མེད་ཀྱི་གནས་སྐབས་ན། རྒྱུ་མཚན་འཚོལ་མཁན་ཕལ་ཆེར་ཧ་ལམ་མེད་ལབ་ན་ཡང་མི་ཆོག་པ་མེད།
དེ་དག་གཏོར་བརླགས་བྱས་པ་དང་མཉམ་དུ་མི་རྣམས་ལ་ཡང་དེ་ཡི་སྐབས་སུ་ཤི་རྨས་ཐེབ་པ་དེ་དག་ལ་མཚོན་ན་དྲན་པའི་ཡུལ་ཙམ་ལས་ཅི་ལ་མཐོང་། ཡིན་ན་ཡང་ངག་རྒྱུན་དུ་ནམ་རྒྱུན་ཐོས་རྒྱུ་ཡོད་པ་དང་། ད་དུང་རྐང་ལག་ཞ་བོར་བྱས་ནས་ཡོད་པ་དང་ལག་པ་རྒྱབ་ལོགས་སུ་ཁ་བསྐོར་བཞག་པ་དེ་འདྲ་བ་མང་པོ་མཐོང་རྒྱུ་ཡོད། ང་ལ་ཀློག་བསླབ་པའི་རྒན་དེ་ཡང་དཔེ་མཚོན་མང་པོའི་ནང་ནས་ཞིག་རེད། ཁོང་གི་སྐེ་ཡི་རྒྱབ་ལོགས་སུ་རྨ་ཆེན་པོ་ཞིག་གི་ཤུལ་དོད་ནས་ཡོད་པ་དང་། ལག་པ་གཡས་གཡོན་གཉིས་ཆ་མི་སྙོམས་ཤིང་ཚིགས་མཚམས་རྣམས་སུ་མེ་བཙའི་ཤུལ་མང་པོ་ཡོད་ལ།
ད་དུང་ཁོང་གིས་ང་ཚོ་ལ་འགྲེལ་བཤད་འདི་ལྟར་བྱེད་མྱོང་། ཨོ་བུ་ཆུང་ཆུང་ཚོད། ཁྱེད་ཚོའི་སྐབས་འདི་ལ་སྐྱིད་པོ་རེད། སྐྱིད་དུས་སྐྱིད་ཤེས་དགོས། སྡུག་དུས་སྡུག་ཤེས་དགོས ཕ་བཟང་གི་བུ། རིན་ཆེན་གྱི་གསེར་ཟེར། ང་ཚོའི་སྐབས་དེ་འདི་འདྲའི་སྡུག་པོ་མྱོང་བ་རེད་ཟེར་ཞིང་མིག་ནས་མཆི་མ་འདྲིལ་ཞོར་དུ། གོང་གི་རྨ་ཤུལ་དག་ང་ཚོ་ལ་བསྟན་ནས་དེ་དག་གི་བྱུང་རབས་དག་ང་ཚོ་ལ་བཤད་མྱོང་། ད་དུང་ཁྱེད་ཅག་གི་མགོ་ལ་ཅི་ཞིག་འབབ་ཡོང་ཅི་ཤེས་ཟེར་ནས། ཁ་ནས་ཧུ་ཤུད་འདོན་།
ད་ནི་ང་ཚོ་དེ་དག་གི་མི་རབས་གཉིས་པ་དེ་ཆགས་ཡོད་པ་དེ་དྲན་གསོ་བྱེད་དགོས་པའི་འགན་ཞིག་རང་ཤུགས་ཀྱིས་ཐོག་ཏུ་བབ་ནས་ཡོད་ལ། མི་རབས་གཉིས་པ་ཚོས་མགོ་ཐོག་དུ་གནས་ཚུལ་ཅི་འདྲ་ཞིག་ཡོང་གིན་ཡོད་པ་དང་། གང་ཞིག་ཛ་དྲག་ཏུ་འགྲོ་བཞིན་ཡོད་པ་ཀུན་ལ་གསལ་ཆ་ཐིང་ཐིང་རེད། ༢༠༠༨ནས་བཟུང་ང་རང་ལ་ཡང་གུང་ཁྲན་གྱིས་བོད་ལ་ཁྲག་གི་འཁོར་ལོ་བསྐོར་བ་དེ་དངོས་སུ་མིག་ལ་ཤར་ནས་ཡོང་སྐབས། ཁྱེད་ཅག་གི་ཚོར་སྣང་དངོས་མ་དེ་ངས་ཀྱང་མྱོང་དགོས་བྱུང་ཡོད། ཚོར་སྣང་དེ་བྱུང་དགོས་པའི་རྒྱུ་མཚན་དེ་ནི། ང་ཚོ་བོད་ལ་སྐྱེས་པའི་ཉིན་མོ་དེ་ནས་འདས་པོ་དག་གི་ཤ་འཁོན་རྩོད་མཁན་ཞིག་ཏུ་གྱུར་པ་དེ་རེད།
ཡིན་ན་ཡང་། ལུས་པོ་ཤ་འཁོན་རྩོད་མཁན་ཞིག་ཏུ་སྐྱེས་ཀྱང་། སེམས་པ་ནས་དེ་བསམ་མི་ཤེས་པར་ནང་ཁུལ་ལ་དྲ་ཐོག་ནས་རྩོད་པ་རེ་བྱས་ནས་སྡོད་མཁན་ཞིག་གིས་སྐྱེ་བ་བླང་བ་དེ་ཤིན་དུ་མ་བཟང་། དེ་ལ་ནི་མི་རྣམས་ཀྱིས་བཤད་ན། མཆིལ་ཞགས་ཀྱིས་འཐབ་རྩོད་ཟེར་། ད་དུང་དེ་ལས་ཡིད་སྐྱོ་བ་ཞིག་ལ། ལོ་དང་ཟླ་བ་ཅི་ཙམ་སོང་ཡང་། ཉི་མ་གཅིག་དང་། དུས་ཚོད་གཅིག་ལ་ཡང་འདིར་ཡོང་བའི་དགོས་དོན་ཅུང་ཙམ་ཡང་སྒྲུབ་ཀྱིན་མེད་པ་དེ་ལ་བསམ་ན། ང་བཙན་བྱོལ་དུ་འདི་ལྟར་ཡོང་བ་དོན་རེ་ཆུང་བསམ་པ་དང་། འདས་པོ་དག་གི་ང་ཚོའི་ཆེད་དུ་དཀའ་བའི་ལས་བྱས་པ་གང་དག་ང་ཚོའི་འཕྲོ་བརླགས་ཏུ་བཏང་ན་ཅི་ལ་རུང་། དེས་ནས་ཀློག་མཁན་ལགས། ཉི་མ་སང་ཉིན་ནས། ངེད་གཉིས་བོད་དོན་དུ་གང་ཞིག་བྱེད་རྒྱུ་ཡིན། ད་སྔོན་ཁྱེད་ངེད་གཉིས་གང་ཞིག་བྱས་ཡོད།