དམར་སྨུག་གི་མདོག གྲྭ་སའི་ཟིན་ཐོ། ལེའུ་གཉིས་པ།
དམར་སྨུག་གི་མདོག གྲྭ་སའི་ཟིན་ཐོ། ལེའུ་གཉིས་པ།
༠
ཐར་བར་བགྲོད་བྱེད་ཀྱི་གཤོག་པ་ལྟ་བུའི
དཔེ་ཆ་མཐུག་པོ་འགའ་མདུན་ལ་སྤུངས་ཏེ
གཟུགས་ནས་རྣམ་མཁྱེན་གྱི་དབར་དང
རྣམ་མཁྱེན་ནས་གཟུགས་དབར་གྱི་དོན་དམ་པའི་སྟོང་ཉིད་རེ་རེ
མིག་འབྲས་ཀྱིས་འདེད་དུས
མདུན་དུ་བཀལ་བའི་ཆུ་ཚོད་ཆེན་པོ་དེས་ཀྱང
ང་ལ་རྟག་ཏུ་མི་རྟག་པ་མཚོན་བྱེད་ཀྱི་ཆོས་སྐད་རེ་རེ་སྨྲ་གིན་འདུག
༠༠
རྣམ་ཤེས་ཀྱི་རྒྱུན་དེ་རིག་པའི་རྩེ་མོར་བཞག་སྟེ
སྲིད་རྩེ་ལས་མཐོ་བའི་དག་ཞིང་དང
འདོད་ཁམས་ཀྱི་ཁོང་གསེང་ཀུན་ན་ཡང་ཡང་འདེད་སྐབས
རང་ཉིད་དང་རང་ཉིད་ཀྱིས་མཚོན་པའི་སྐྱེས་འགྲོ་དག་ནི
ཟོལ་ཆུའི་གཡོ་བ་ལྟར
ཟག་བཅས་ཀྱི་ཕུང་པོ་འདི་ལ་ཡང་ནས་ཡང་དུ་འཁོར་གྱིན
འདི་ནས་ཐུར་དུ་དཔྱངས་པའི་ལམ་བུ་དེ་དམྱལ་ལམ་ཡིན་ན
འདི་ནས་དགུང་ལ་ཟུག་པའི་འཇའ་རིས་དེ
འོད་གསལ་གྱི་བདེ་ལམ་ལོས་ཡིན
དཀར་ནག་གི་རང་ལམ་ཕྲ་མོ་དེ་ཡང་ཡང་བསམ་དུས
འཆི་བ་ལ་ཞེད་ནས་ལུས་པོ་ཡོངས་རྫོགས་འདར་གྱིན་འདུག
༠༠༠
ལྷིང་འཇགས་དབྱིངས་ལ་ནུབ་གྱིན་པའི་མཚན་མོ་དེར
འདབ་ཆགས་དང་རི་སྤྱང་གི་ཚོགས་རྣམས་གཉིད་ལ་ཡུར་ཞིང
དུག་སྦྲང་གཅིག་ཁོ་ནས་བདག་གི་ཏིང་འཛིན་གྱི་རྒྱ་སྒོ་རྡུང་འོང
དབེན་ཐིང་ཐིང་དེར་སྣང་དོགས་གང་ཡང་མེད་པར
དུག་སྦྲང་དེ་དམར་གསོད་བཏང་ནའང
ཡུན་ཙམ་ལས་མ་འགྱངས་པར
སེམས་བྱུང་རྣོ་དབལ་ཞིག་གིས
བདག་ལ་རྔམ་ཞེད་ཆེ་བའི་ཁྲག་དམར་ཁྱོར་བ་གང་སྦྱིན་བྱུང
དེ་ནི སུ་ཞིག་གི་གཅེས་ལུས་ལས་བཅུས་པའི་ཟུངས་ཁྲག་ཡིན་ནམ
༠༠༠༠
མེ་ལོང་ཆེན་པོ་དེའི་མདུན་ན་ལངས་ཏེ
རང་གི་བྱད་བཞིན་ལ་མཉམ་འཇོག་ཡང་ཡང་བྱེད་དུས
ཞེ་མུག་པའི་ངོ་གདོང་སྐྱ་བོ་ཞིག་རྟག་པར
རང་གི་རྒྱབ་ལོག་ན་འཆར་ཡོང་གིན་གདའ
ཆགས་སྡང་མུག་གསུམ་གྱི་རྣམ་པ་གང་འདྲ་ཡོང་གིན་ཡོད་ནའང
དེས་ཀྱང ཞྭ་མོ་གནམ་ལ་ཀེར་ནས་ལད་ཟློས་སྣ་ཚོགས་བྱེད་ཀྱིན་འདུག་པས
ད་ནི མེ་ལོང་དང་དེའི་རིགས་སུ་གཏོགས་པའི་པར་ཆས་སོགས་ལ
ཡིད་སུན་ནས་རང་གིས་རང་ལ་ཞེ་སྡང་སྐྱེ་བའི་མགོ་བརྩམས་སོ
༠༠༠༠༠
ཆོས་རའི་ནང་དུ་སུས་ཀྱང་དང་ལེན་མི་བྱེད་པའི
དམ་བཅའ་སྲ་མོ་རེ་བཅངས་ཏེ
ལུང་རིགས་ཀྱིས་རྫི་བ་མི་འདོད་ཅིང
ཐ་སྙད་ཀྱི་གཅོད་མཚམས་མི་འཛིན་པར
སྐད་ཆ་དང་དེའི་ཁོག་ནས་ཕྱུང་བའི་དོན་དག་རེ་ཟུང
ཅི་ཙམ་གྱིས་དམ་དུ་གཏོང་བ་དེ་ནི
ཉོན་མོངས་དང་སྤང་བྱའི་རིགས་ཀྱི་སྒོ་བསྡམས་པ་ཞིག་ལ་བརྩི་དགོས་པ་ཨེ་ཡིན
༠༠༠༠༠༠
སངས་རྒྱས་ཀྱིས་གནང་བའི་ཆོས་གོས་སེར་པོ་དེ་བསྣམས་ཏེ
ཁྱེད་ཀྱིས་ཡོ་རོབ་གླིང་ནས་སྡིགས་འཛུམ་འདི་ཕྱོགས་སུ་འཕང་དུས
བདག་གིས་ཁྱེད་ཀྱི་དྲུང་ནས་མགོ་བོ་སྒུར་སྒུར་གྱིས
སྐྱབས་སུ་འཆི་ཞེས་པའི་ཕོར་བ་དེ་གཟེད་དགོས་པ་ཨེ་ཡིན
ཡང་ན ལྕང་ལོ་དམར་སེར་ཡིན་པའི་ཞབས་ཞུ་མ་དེའང
རྗེ་བཙུན་སྒྲོལ་མའི་ཡང་སྤྲུལ་གྱི་མཁའ་འགྲོ་མ་ཞིག་ལ་བརྩི་དགོས་པ་ཡིན་ནམ
ང་ཚོ་ནི་ཆོས་ར་ནི་སློང་མོ་བ་ཡིན་ལ
སློང་ཟས་དེས་སངས་རྒྱས་ལ་མཆོད་པ་འབུལ་གྱིན་ཡོད
༠༠༠༠༠༠༠
གྲྭ་རྐྱང་ཞིག་བུད་སོང
རྐང་སྣམ་ལྷུག་ལྷུག་ཅིག་གོན་ནས
སོར་གང་ལས་མ་འདས་པའི་སྐྲ་ལོ་བྱིལ་བྱིལ་གཏོང་ཁུལ་གྱིས
ཐ་མག་གཅིག་གི་སྣེ་ནས་རྔམ་བྱུང
མིག་ཆུ་ཐུར་རུ་རུ་བཞུར་བ་དེ་ནི་ཐ་མག་རྔམ་སྟངས་ཀྱི་ཡིན་པ་བཤད་ནའང
མིག་ཆུའི་ཁ་མདོག་ནས་སྐྱོ་སྣང་གི་རི་མོ་ཞིག་གསལ་ལེར་མངོན་བྱུང
༠༠༠༠༠༠༠༠
ཕྱོགས་གཞན་ཞིག་ནས
ངེད་གཉིས་ནི་འཇིགས་ཡེར་བ་ཞིག་རེད
བདག་གིས་ཁྲོ་ཆུ་འཁོལ་མ་ལྷོག་ལྷོག་གདུ་བ་དེ་འཐུང་གིན་ཡོད་ལ
ཁྱེད་ཀྱིས་མེ་སྟག་ཆེམ་ཆེམ་གྱི་ལྕགས་རིལ་དམར་པོ་དེ་མིད་ཀྱིན་འདུག
གདོང་ལ་སེར་ག་གས་པ་ཙམ་གྱིས
དེ་ནི་འཆི་བའི་སྔ་བལྟས་ལ་འཁྲུལ་ནས་སྔངས་ཀྱིན་ཡོད་ནའང
སྐྱི་གཡའ་བའི་རྟགས་མཚན་གང་ཡང་མེད་དུས
མུ་མཐུད་དེ ཤིང་གྲུ་ལ་བརྟེན་ནས
རྒྱ་མཚོའི་ཕ་རོལ་དུ་བརྒལ་འདོད་ཀྱི་ཧམ་སེམས་སྐྱེས
༠༠༠༠༠༠༠༠༠༠
གདོང་ལ་ཁབ་སྣ་ཚོགས་ཤིག་བཙུགས་ཏེ
དེའི་སྣེ་མོར་གློག་བཀལ་བའི་སྣང་ཚུལ་དེ་ནི
མིའི་རྙིང་གོག་ཏུ་གྱུར་ཟིན་པའི་འཕྲུལ་ཆས་ཤིག
སླར་གསོ་བྱེད་པ་དང་གཅིག་མཚུངས་སུ་སྣང་འོང
དེ་རིང བདག་གི་འཚོ་བའི་ཁུག་སོ་ནས་གློ་བུར་དུ
སྔངས་ཞེད་ཀྱི་གཟའ་གྲིབ་འདི་གློག་ལྟར་འཁྱུག་དུས
མོ་གྲ་གོག་པོ་ཞིག་དང་འདྲ་བ
དུ་བ་གཏོང་ཙམ་གཏོང་ཙམ་ལས
མདུན་ན་གཏན་ནས་འགྲོ་ཐུབ་ཀྱིན་མི་འདུག
༠༠༠༠༠༠༠༠༠
ས་བཅུར་བགྲོད་པའི་ལྕགས་ཤོག་གི་འབབ་ཚུགས་དེར
ཉེན་སྲུང་བས་ཁྱེད་ཀྱི་ཨམ་ཕྲག་སྔོག་དུས
ཁྱེད་ཀྱི་སྡང་ཟུག་གིས་མིག་ལོག་བལྟས་ཚུལ་ཙམ་གྱིས
ཁྱེད་ལ་བར་སྣང་འཕུར་བྱེད་ཀྱི་སྤ་སེ་དངོས་མ་ཞིག་མེད་པ་ཤེས་འདུག
ཁྱེད་ཀྱི་ཟོལ་རྫུན་གྱི་གུས་ལུགས་དེའང
གཞན་ལ་ཡིད་བརྟན་འཕེལ་བ་ཞིག་ལར་ནས་མ་རེད
༠༠༠༠༠༠༠༠
སྨྲེང་སྐྱོ་འདྲེས་མ་ལོ་ངོ་ག་ཚོད་ཕྱིན་སོང་བ་དེར
ཕྱིར་འདང་རེ་བརྒྱབ་ན
ཡ་ང་ཞིང་ཡིད་སྐྱོ་བའི་ས་མཐའི་ཁེར་རྐྱང་གི་གདུང་བ་དེ་ནི
འཁྲབ་ཚན་ཞིག་དང་མཚུངས་པར་གཏམ་རྒྱུད་སྐྱུར་མོ་ཞིག་ཡིན་ལ
དེའི་ཚུར་རོལ་དང་ཕ་རོལ་ན
ལག་པའི་མཐིང་ནས་ངོམ་རུང་གི་འབྲས་བུ་གཡུར་ཟ་བ་ཞིག་མེད་སོང
དུས་ཡུན་ཅི་ཙམ་སོང་བ་དེ་ནི
འཆི་བ་ལ་ཉེ་རུ་འགྲོ་བ་ལས
ང་ལ་ཆ་མཚོན་ན དེ་ནི
གོ་རིམ་ལྡན་པའི་མ་འོངས་པ་བསུ་སྟངས་ཞིག་ཡེ་ནས་མ་རེད
༠༠༠༠༠༠༠༠
འདི་ནི མཐའ་ཡས་པའི་གནམ་གྱི་ཞེང་ཁ་ཡིན
འདི་ནི མཐའ་ཡས་པའི་ཁྱེད་ཀྱི་བྲང་གཞུང་ཡིན
ལོ་རྒྱུས་ཀྱི་གཡུ་རལ་གཟེངས་ཤིང
ཕར་རྒོལ་གྱི་རྡོག་པ་གནམ་ལ་བརྡབ་པའི་གྲྭ་སའི་ཆོས་ར་མཐོང་ན
མི་ཚེའི་དགོད་སྒྲ་ཅི་ཙམ་སྒྲོག་པ་དེ་ནི
དྭངས་གཙང་གི་སྤྲིན་པར་བཟུང་ནས
གཡའ་དག་པའི་གནམ་གྱི་མཐིང་ལ་རི་མོ་འབྲི་བ་དང་སྤྲོ་བ་མཉམ་མོ
༠༠༠༠༠༠༠
མཚམས་རེར་དགའ་སྐྱོ་ཟུང་འབྲེལ་གྱི་ཚོར་བ་ཞིག་གིས
འཇིག་རྟེན་གྱི་རླུང་ཡོར་ལྟ་བུའི་འཚོ་བ་འདི་ལ་ཡིད་སུན་དུ་འཇུག་གིན
སྙིང་པོ་ལེན་ཐབས་བྲལ་བའི་ཚོར་བ་འདིས་ནི
གཡོ་ལ་ཚུད་པའི་ཁྲམ་པ་ཞིག་དང་འདྲ་བར
མིག་གི་ལྟད་མོར་གྱུར་བའི་ཡུལ་ལུང་གི་མཛེས་ལྗོངས
རྣ་བའི་སིལ་སྙན་དུ་གྱུར་བའི་ཚིག་འཇམ་གྱི་སྐད་ཆ
སྣ་ཡི་གདུག་སྤོས་སུ་གྱུར་བའི་དྲི་བཟང་གི་བྱུགས་པ
ལྕེ་ཡི་བདུད་རྩིར་གྱུར་བའི་ཞིམ་མངར་གྱི་རོ་བཅུད
ལུས་ཀྱི་བདེ་ཟུག་ལ་འབྱར་བའི་དྲོད་འཇམ་གྱི་དར་གོས
མདོར་ན འདོད་ཡོན་གྱི་མཆོད་པ་ཡོད་དོ་ཅོག་ལ
ཞེ་མུག་གིས་སྐྱོ་ཉམས་ངོམ་གྱིན་འདུག
༠༠༠༠༠༠
དཀའ་སྡུག་གི་དྲ་གཟེབ་ཏུ་དབང་མེད་ངང་ཚུད་སྐབས
ངེས་འབྱུང་ཡིན་ངེས་པའི་སྐྱོ་སྣང་བཅོས་མིན་ཞིག་ཡོང་ནས
ཅི་འདོད་གང་འདོད་ཀྱིས་རང་གི་ཡན་ལག་རྣམས་ཕྱོགས་བཞིར་བགྲད་སྐབས
འོག་གི་སོར་ཚད་ཀྱི་ཐལ་བ་སྤར་མོ་གང་ལའང
བརྩེ་དུང་གི་འདུ་ཤེས་ཞིག་ཡོང་ནས
ད་ནི བདེན་ལུགས་སྒྲུབ་བྱེད་ཀྱི་ཕྲེང་བ་རི་མོ་དེ་ཕར་ལ་བསྐྱུར་ཏེ
ལག་ཟུང་གིས་སྙིང་ཆུང་གནོན་ནས
ཞིབ་ཚགས་ཀྱིས་བསམ་བློའི་རོ་སྒམ་སྔོག་དུས
གནམ་སྔོན་པོའི་མཐིལ་གྱི་འཇིག་རྟེན་གྱི་ལྷ
ཁྱེད་ཀྱིས་ང་ལ་ཀུ་རེ་ཡིས་ཐལ་མོ་མ་བརྡབ་དང
༠༠༠༠༠
དུས་ཚོད་ཀྱི་གོམ་ཁ་ཡུན་གྱིས་ཡུན་གྱིས
རྨི་ལམ་དང་ལྷན་དུ་མུ་མཐུད་དེ་བཞུད་སོང
ཅི་ཞིག་ལ་རེ་སྒུག་གི་མིག་ཟུང་ལྷེབ་ལྷེབ་གཡོ་བའི་ང་ནི
ཁྱེད་ཀྱི་གཞུང་ལུགས་ནས་རྙེད་པའི
མི་ཁོམ་པའི་འཇིག་རྟེན་གནས་ཀྱི་བདག་པོ་ཡིན་ལ
ཚུགས་ཐབས་མེད་པའི་འདུ་ཤེས་འདི་དག
བརྟན་བརླིང་བྲལ་བའི་དབྱར་གྱི་ཆར་སྤྲིན་ལ་འཁྲིགས་ཤིང
ངེས་བརྟན་མིན་པའི་མི་ཚེའི་གོམ་ཁ་ཡང
ལས་དབང་དང་སྟེས་དབང་ཁོ་ན་ལ་བསྟིམས་ནས་ཡོད
༠༠༠༠
མཛའ་འབྲེལ་གྱིས་མཐུད་པའི་ཉེར་འཁོར་བ་དག
ཁྱེད་ཀྱི་སྤྲིན་དཀར་ལ་བསྙེས་བའི་བརྩེ་སེམས་ཀྱི་ཁ་དོག་ལྗང་སེར
མེ་ཏོག་གི་ཟེའུ་འབྲུ་ལ་སྤྲུལ་ནས
བདག་གི་ཡིད་སེམས་འགུག་གིན་ཡོད་ནའང
གྲྭ་སའི་དམར་སྨུག་གི་ཁ་དོག་གླན་གྱིན་གླན་གྱིན
སེམས་ཀྱི་ཟབ་སར་འཁྱིལ་བ་དག་ནི
མེ་ཏོག་མིན་པར་མེ་ཏོག་གི་མཛེས་སྡུག་ཆགས་པའི་གཞུང་རྟ་དེའོ
༠༠༠
ངའི་མཐོང་ཚུལ་ཞིག་ལ
རི་རབ་འགུལ་གྱིན་ཡོད་ཅིང
དེའི་རྩེ་མོར་ཆགས་པའི་གྲོང་ཁྱེར་དག་ཀྱང
འུར་འུར་ཆོམ་ཆོམ་གྱིས་འདར་གྱིན་ཡོད
ཐ་ན་ང་རང་ཡང་དབང་མེད་དུ་འགུལ་ནས་ཡོད
གཡོ་འཕྲུལ་གྱི་རྩེད་ར་འདི་དང་བཤིབས་ཀྱིན་བཤིབས་ཀྱིན
བྱིས་དུས་ཀྱི་གཡོ་ཟོལ་མེད་པའི་འཚོ་བ་ལྷག་པ་དྲན་ཞིང
ཆགས་སྡང་མུག་གསུམ་གྱིས་མདུན་དུ་བསྐྱོད་ཀྱིན་བསྐྱོད་ཀྱིན
ཡིད་འོང་གི་བསམ་བློའི་དྭངས་གཙང་དེ་བསམ་ནས་འོང
༠༠
བདག་གི་ཚོར་བ་ལ
ཚིགས་བཅད་བཞིན་དུ་བཅད་མཚམས་དང
ཚིག་ལྷུག་ལྟར་གྱི་གོ་རིམ་གང་ཡང་མེད་པས
རྒྱ་ཡན་གྱི་འཆར་སྒོ་དག་ནི
ཕྱོགས་ཕྱོགས་ནས་འཁྱེར་ཡོང་བའི་ཡི་གེ་རེ་རེ་དང་བསྲེས་ནས་གྲུབ་ཡོད
གལ་ཏེ ཁྱེད་ཀྱིས་སྐྱེས་བུ་དམ་པའི་བཀའ་བམ་ལ་འཁྲུལ་ནས
ང་ལ་དངོས་གྲུབ་འཇོ་བའི་སྟོང་བསམ་འདྲ་བཅངས་ཡོད་ན
བདག་གིས་གསལ་བཤད་ཞུ་རྒྱུར
ང་ནི རང་སེམས་གནོན་བྱེད་ཀྱི
ཡིག་འབྲུ་འགའ་ལ་འཐམ་པའི་འཆར་ཡན་པ་ཞིག་ཡིན
༠
ངས་རང་གི་བརྩེ་སེམས་ཀྱི་ལྟོ་ཁྲག་འཐོར་བའི་ཕ་ཡུལ་དྲན་ཐེངས་རེར
ངས་རང་གི་རེ་འདང་གི་ཚོར་སྣང་ལས་བཞེངས་པའི་ཕ་ཡུལ་འབོད་ཐེངས་རེར
ངས་རང་གི་འབྱུང་འགྱུར་གྱི་མཛེས་པ་ཡོད་ཚད་བཅོལ་བའི་ཕ་ཡུལ་སྒོམ་ཐེངས་རེར
མིག་ཆུས་བྲིས་བའི་སྐྱོ་བའི་འབྲུ་ལ་གཟིགས་ནས
ཁྱེད་ཀྱིས་ང་ལ་འཕྱ་དམོད་མ་མཛོད་དང
ང་ནི་བས་མཐའ་ཞིག་གི་ཡུལ་གྱར་བ་ཡིན་ལ
ཆ་མེད་རྒྱུས་མེད་ཀྱི་ཡུལ་ཁམས་ཤིག་གི་ལྡོམ་པོ་ཞིག་ཀྱང་ཡིན
༠༠
གྲྭ་སའི་དཔེ་ཆའི་ཁྲོད་ཀྱི་འཁོར་བ་དེ་ཡང་ཡང་བསམ་དུས
ཟུར་གསུམ་ཅན་གྱི་གདུག་རྩུབ་དེ་དག
ཆར་རླུང་གིས་དེད་དེ་རང་གི་སྤྱི་གཙུག་ནས་བཞུར་ཡོང
སྐབས་དེར གདུག་རྩུབ་འགོག་བྱེད་ཀྱི་ལྕགས་ཁྲབ་ལྟ་བུའི་གོ་ལག་ནི
རྒྱུན་དུ་གསོག་འཇོག་བྱེད་ཀྱིན་པའི
དཔེ་ཆའི་ནང་གི་དམར་ཐིག་དེ་དག་ཡིན་ནའང
གློ་བུར་དུ རྙིང་ཧྲུལ་དུ་གྱུར་པའི་དཔེ་ཆ་དེ་དག་ཀློག་དུས
ཅི་ཡང་ལྷག་མི་འདུག ཐ་ན་ཡིག་འབྲུ་ཐར་ཐོར་རེ་ཡང
༠༠༠
ཐེམ་སྐས་འདྲ་བའི་ལ་ཆེན་དེར
གོམ་པ་ཡུན་གྱིས་ཡུན་གྱིས་སྤོ་དུས
གནས་བབ་མི་གཅིག་པའི་སྐྱེས་བུ་དུ་མའི་དཀར་ནག་གི་ཁྱིམ་གཞིས་མཐོང་ཡོང
བདེ་བ་དང་ལོངས་སྤྱོད་མི་སྙོམས་པའི་གོམ་པ་བརྒྱུད་དེ་འགྲོ་སྐབས
ལས་དབང་དང་དེའི་རྒྱབ་ངོགས་ཀྱི་གསང་བ་ཞིག་ལ
འཁོན་སེམས་ཀྱིས་ངོ་གདོང་འགྱུར་སོང
ཡིན་ན་ཡང གྲྭ་སའི་སྙན་འཇེབས་ཀྱི་ཆོས་སྐད་རེ་རེ་གོ་དུས
ངེས་འབྱུང་ཞིག་གིས་ལས་དབང་ལ་ཡིད་བརྟན་འཕེལ་སོང
༠༠༠༠
འདམ་མྱག་གིས་ནུབ་ཀྱིན་པའི་རྐང་ལམ་ཀྱ་ཀྱོག་དེ་ན
ཁོ་ཕོ་ཆེ་བའི་གཞོན་ནུ་འགའི་རྐང་པ་ཟུག་འདུག
རི་བོ་ཞིག་གི་རྐེད་པར་བཟུང་སྟེ
ཀེང་རུས་ཀྱི་ལྷུ་ཚིགས་བར་ན་མེ་སྟག་ཆེམ་ཆེམ་གྱིས
རྔུལ་ཆུ་གསོག་བཞིན་ཡོད་ན་ཡང
རྐང་པ་ཚུགས་སའི་འདམ་མྱག་དེ་ནི་གཏིང་ཅི་ཟབ་ཏུ་འགྲོ་གིན་གདའ
༠༠༠༠༠
ང་ནི་ངུར་སྨིག་གིས་དཀྲིས་པའི་གྲྭ་རྐྱང་ཞིག་ཡིན
གྲྭ་རྐྱང་གི་འཚོ་བ་ལ་རྒྱབ་མདུན་མེད་པའི་རྐྱེན་གྱིས
ངའི་དུང་ལྟར་དཀར་བའི་སྙན་ངག་ལའང་ཕྱི་ནང་གཏན་ནས་མེད
ང་ནི གཏད་སོ་བྲལ་བའི་འཁྱམ་ཉུལ་བ་ཞིག་ཡིན
ངའི་ཁབ་རྩེ་ལས་རྣོ་བའི་མིག་དབང་གིས
ལྗོངས་དང་ལྗོངས མི་དང་མི
སྐད་ཆ་དང་སྐད་ཆ་སྣོལ་གྱིན་ཡོད་པའི་རྐྱེན་གྱིས
ངའི་བསམ་བློའི་བཞུར་རྒྱུན་གྱི་ཡི་གེ་ལའང
ཁྱེད་དང་ང་ལྟ་བུའི་ཕ་རོལ་དང་ཚུར་རོལ་ཡེ་ནས་མེད
༠༠༠༠༠༠
གཉའ་རེངས་ཀྱི་མི་ངན་ཞིག་གིས
རང་ཉིད་ཀྱིས་མ་བཟོད་པའི་གྲྭ་སའི་བཅའ་ཡིག་དེ་ནི
ཚད་ཐིག་ལས་བརྒལ་སོང་བ་ཀུ་ཅོ་ཡིས་ཁྲུན་ཐག་བཅད
ད་དུང དེ་ནི་གནས་ལུགས་ཤིག་ཡིན་པའི་འགྱིང་ཉམས་ཀྱིས་འུར་རྒྱག་གིན
མི་དང་དེའི་རིགས་ཀྱིས
རང་གི་སྲོག་དང་བསྡོས་པའི་དམ་ཚིག་རྟ་རྔ་ལས་ཕྲ་བ་དེ་ཡང
ཁྲག་དྲི་བྲོ་བའི་མཚོན་ལ་དྲངས་ནས་མགོ་བོ་འགྱོག་གིན
དེ་ནི གྲྭ་བ་ཞིག་གིས་དམར་སྨུག་གི་རས་གཟན་འཇམ་པོ
ལྕེབས་ཐགས་ལ་འཁྲུལ་ནས་རང་སྲོག་གཅོད་པ་རང་ངོ
༠༠༠༠༠༠༠
བྱུ་རུའི་རྒྱ་མཚོ་ལྟ་བུའི་གྲྭ་ས་ན
མདོ་དབུས་ཁམས་ཀྱི་གཞུང་ལམ་ལས་རིང་བའི
འོད་ཟེར་གྱི་ལམ་ཆེན་ཞིག་མཐུད་ནས་ཡོད
ཤར་གྱི་ཕྱོགས་སུ་འཇིག་རྟེན་ཡི་གེ་ལ་འབེབས་ཀྱིན་པ་དེ་ནི
ཨ་མདོ་བའི་འོད་ཟེར་གྱི་ཨ་ཁུ་ཡིན་ཞིང
བྱང་གི་ཕྱོགས་ནས་ཆོས་ཕུག་བྲག་ཐེམས་ལ་བཅོལ་ནས་ཡོད་པ་དེ་ནི
དབུས་གཙང་བའི་འོད་ཟེར་གྱི་སྐུ་ཞབས་ཡིན
ཤར་བྱང་གི་བར་མཚམས་ནས
འཇིག་རྟེན་ལ་ཉེན་བརྡའི་སྡིགས་མཛུབ་འཆང་བ་དེ་ནི
ཨ་རོགས་ཁམས་པའི་འོད་ཟེར་གྱི་བླ་མ་ཡིན
དེ་ཡང གྲྭ་ས་ནི་མདོ་དབུས་ཁམས་ཀྱི་སྐད་ཡིག་དག་མའི་མ་ཡུམ་ཡང་ཡིན
༠༠༠༠༠༠༠༠
བདག་གིས་འདུ་འཛིལ་གྱི་མཁའ་དབུགས་དེའི་བརྒྱུད་ནས
མི་ཚེའི་ཁ་མདོག་ལ་བཙོ་སྦྱང་ཡང་ཡང་བྱས་རྗེས
སྙིང་པོ་ཡོད་མེད་ཀྱི་ས་ཚིགས་དེའི་གསེང་ནས
ལམ་ཁ་འདི་ལ་རང་དབང་གིས་གདམ་ཀ་བྱེད་པ་ཡིན
ད་ལྟར ང་ལ་སྙིང་གཏམ་ལྡུད་ཡུལ་གྱི་མཛའ་མོ་དང
སྐྱོ་བ་འཁྱེར་རོགས་ཀྱི་ཆུང་འདྲིས་གང་ཡང་མེད་ནའང
མེ་ལོང་འདྲ་བར་ཕར་ངོས་ནས
རང་ཉིད་ལ་ཚུར་ཡང་ཡང་ལྟ་དུས
ད་དུང འཚོ་སྙེག་འདི་ལ་ཞེ་འགྲས་སྐྱེ་མེད་པར་འདྲའོ
༠༠༠༠༠༠༠༠༠
ཆོས་རྣམས་ཀྱི་ངོ་བོ་ལ
གདོད་ལུགས་ཀྱི་རྗེན་པ་གྲུབ་པའི་རང་དབང་དེ་མེད་དེ
དེ་དག་ནི ཐ་སྙད་ལྟོས་གྲུབ་ཀྱི་བཅད་རྒྱ་ལས་མ་འདའ་བའོ
ཚུལ་དེ་ལས་སླ་བ་ཙམ་དུ་བྱས་ན
ཁྱེད་དང་ངེད་གཉིས་སམ་དེའི་ཆ་ཤས་ལ་གཏོགས་པའི
ཐ་སྙད་གཡེར་པོ་དེ་དག་ཡེ་ནས་མེད་ཚེ
ངེད་གཉིས་ཀྱང་འཇིག་རྟེན་འདིར་འཚོ་སྟངས་ཀྱི་ས་མིག་ཅིག་གཏན་ནས་མེད་པ་རེད
ད་ལྟར བདག་གིས་མིང་བརྡའི་འཇོག་ལུགས་ཀྱི་མཚན་ཉིད་རིག་པའི་ལྟ་གྲུབ་ཅིག་གིས
རང་ཉིད་ཀྱི་གནས་བབ་ལ་འགྱུར་བ་ཨེ་ཡོང་གི་རེ་བ་བཅངས་ནས་ཡོད
༠༠༠༠༠༠༠༠༠༠༠
ང་ནི་མི་ཞིག་ཡིན
ང་ནི་ཚོར་རྟོག་ཟབ་པའི་གྲྭ་བ་ཞིག་ཡིན
ང་ནི་སློང་མོ་བ་ཞིག་ཡིན
ང་ནི་རྣམ་རྟོག་ཆེ་བའི་འགྲུལ་བཞུད་པ་ཞིག་ཡིན
གལ་ཏེ མི་ལ་ཚེ་སྲོག་གི་སྒུལ་ཤུགས་མངའ་བའི་རིན་ཐང་དང
གལ་ཏེ ཚོར་རྟོག་ལ་གཅུན་སྡོམ་མེད་པའི་གྲྭ་བ་ཞིག་མེད་ན
ང་ནི་མི་མིན ང་ནི་གྲྭ་བ་མིན
གལ་ཏེ སློང་མོ་བའི་ལག་གི་དབྱུག་ཏོ་དང
གལ་ཏེ འགྲུལ་བཞུད་པའི་གཉའ་ཡི་རྒྱབ་ཁུག་དེ
སུས་ཀྱང་རེག་འདོད་མེད་པའི་སྲང་ལམ་གྱི་གད་སྙིགས་ཤིག་ཡིན་ན
ང་ནི་སློང་མོ་བ་མིན ང་ནི་འགྲུལ་བྱེད་པ་མིན
༠༠༠༠༠༠༠༠༠
བདག་གིས་ལམ་བུ་ཞིག་འདེད་ཀྱིན
བདག་གིས་རི་མོ་ཞིག་འབྲི་གིན་ཡོད
ལམ་བུ་དེ་ནི་མེས་པོའི་ཤུལ་བཞག་ཡིན་ཡང་རུང་སྟེ་མིན་ནའང་ཆོག
རི་མོ་དེ་ནི་སྒྱུ་རྩལ་ཁྱབ་ཁོངས་སུ་གཏོགས་ཀྱང་ཆོག་སྟེ་མ་གཏོགས་ཀྱང་རུང
བདག་གིས་སྙིང་པོ་ཡོད་མེད་ཀྱི་མཐའ་མཚམས་འདི་ནས
སླར་ཡང ལམ་བུ་ཞིག་འདེད་ཀྱིན་ཡོད རི་མོ་ཞིག་འབྲི་ཀྱིན་ཡོད
༢༠༡༢ ༨ ༡༢