ལྡི་ལི་རུ་བོད་དོན་ལས་འགུལ་བ་བཀག་ཉར།

རྒྱ་ནག་གི་བདེ་སྲུང་བློན་ཆེན་ལྡི་ལིར་ཡོང་བར་བོད་མི་ཚོས་ངོ་རྒོལ་བྱས་ཡོད་པ་དང་། ཟླ་འདིའི་ཚེས་༥ ཉིན་རྒྱ་གར་བོད་རང་བཙན་སློབ་ཕྲུག་ཚོགས་པའི་འགན་འཛིན་དང་ཚོགས་མི་སོགས་རྒྱ་གར་ཉེན་རྟོག་པས་བཀག་ཉར་བྱས་འདུག

རྒྱ་ནག་གི་བདེ་སྲུང་བློན་ཆེན་རྒྱ་གར་དུ་ཡོང་དོན་གཙོ་བོ་རྒྱལ་ཁབ་གཉིས་བར་གྱི་དམག་སྦྱོང་སྤྲོད་རེས་དེ་༢༠༡༠ ལོར་མཚམས་ཆད་ཡོད་ནའང་། ད་ཐེངས་དེ་བསྐྱར་གསོ་བྱེད་ཀྱི་དང་། རྒྱལ་ཁབ་གཉིས་བར་གྱི་བདེ་འཇགས་སྐོར་ལ་གྲོས་བསྡུར་བྱེད་ཀྱི་ཡོད་པ་རེད།
དེ་ཡང་ཟླ་འདིའི་ཚེས་༥ ཉིན་ལྡི་ལི་ནས་བོད་རང་བཙན་སློབ་ཕྲུག་ཚོགས་པས་གནས་ཚུལ་བཏང་བ་ལྟར་ན། ལས་འགུལ་བ་ཚོའི་ལག་ཏུ་བཟུང་བའི་འཕྲེད་དར་དང་ཤོག་བྱང་།  ད་དུང་གཟུགས་པོའི་ཐོག་ཏུ་བོད་རང་བཙན་ནི་རྒྱ་གར་གྱི་བདེ་འཇགས་ཡིན།  གསར་བརྗེ་རྒྱལ་ལོ་ལ་སོགས་འབོད་ཚིག་བཀདོ་འདུག་ལ། ད་ལྟའི་བོད་ནང་གི་ཛ་དྲག་གི་གནས་བབ་ཐད་ལ་རྒྱ་གར་གཞུང་གི་རྒྱབ་སྐྱོར་དང་འཛམ་གླིང་ཧྲིལ་པོའི་ཐེ་བྱུས་དགོས་སྐོར་གྱི་སྐད་འབོད་བྱས་ཡོད་པ་རེད།

“རྒྱ་གར་ནི་འཛམ་གླིང་ཐོག་མང་གཙོའི་རྒྱལ་ཁབ་ཆེ་ཤོས་ཤིག་དང་ལོ་རྒྱུས་ཐོག་སེམས་དཔའ་ཆེན་པོ་གྷན་ངྷའི་འཚེ་མེད་ཞི་བའི་ལས་འགུལ་བརྒྱུད་ནས་ཐོབ་པའི་ད་ལྟའི་རང་བཙན་གྱི་རྒྱལ་ཁབ་ཅིག་ཡིན་པས།  རྒྱ་གར་རྒྱལ་ཁབ་ལ་བོད་པའི་འཚེ་མེད་ཞི་བའི་འཐབ་རྩོད་ཀྱི་ལས་འགུལ་ལ་རྒྱབ་སྐྱོར་བྱེད་པའི་དམིགས་བསལ་ཀུན་སྤྱོད་རང་བཞིན་གྱི་འགན་འཁྲི་ཡོད་ཅེས་” ཅེས་རྒྱ་གར་བོད་རང་བཙན་སློབ་ཕྲུག་ཚོགས་པའི་འགན་འཛིན་རྡོ་རྗེ་ཚེ་བརྟན་ལགས་ཀྱིས་བརྗོད་སོང་།  ཁོང་གིས་ད་དུང་མུ་མཐུད་ནས་“ལྷག་པར་དུ་ད་ལྟའི་བོད་ནང་གི་ཛ་དྲག་གི་དུས་སྐབས་འདིར་རྒྱ་གར་གཞུང་ཡང་འཛམ་གླིང་གི་སྲིད་གཞུང་ཚང་མ་དང་ལྷན་དུ་ལངས་ནས་ཁྱབ་རྒྱ་ཆེ་ལ།  ནུས་ཤུགས་ལྡན་པའི་རྒྱལ་སྤྱིའི་རང་བཞིན་གྱི་དཔུང་སྡེ་ཆེན་པོ་ཞིག་བསྐྲུན་ཏེ་རྒྱ་ནག་གཞུང་ལ་གནོན་ཤུགས་འཕར་མ་སྤྲད་པའི་ཐོག་ད་ལྟའི་བོད་ནང་གི་རྒྱ་གཞུང་གི་ཆེས་སྡུག་རྩུབ་ཀྱི་སྲིད་ཇུས་དེ་མཇུག་བསྒྲིལ་ཡོང་བར་ཤུགས་སྣོན་རྒྱག་པའི་དུས་ལ་བབ་ཡོད།   བོད་ཀྱི་གནད་དོན་ཐག་གཅོད་གཙང་མ་བྱེད་ཐུབ་ན།  ད་གཟོད་རྒྱ་དཀར་ནག་གཉིས་དབར་གྱི་རྩོད་རྙོག་ལའང་རང་བཞིན་གྱི་ལམ་ཁ་གསར་པ་ཞིག་རྙེད་ཐུབ།“ཅེས་བརྗོད་སོང་།

དེ་ཡང་བོད་རང་བཙན་སློབ་ཕྲུག་ཚོགས་པའི་རྒྱ་གར་གྱི་ཚོགས་མི་ཁག་ཅིག་གིས་རྒྱ་གར་གྱི་ཕྱི་སྲིད་བློན་ཆེན་ཨེསི་ཨམ་་་ཁིར་ཞི་ནཱ་ངོས་ནས་བོད་ནང་གི་ད་ལྟའི་ཛ་དྲག་གི་གནས་བབ་ཐོག་ལ་ཁ་ཞེ་གཉིས་མེད་ཀྱི་རྒྱབ་སྐྱོར་ཡོང་བར་རྒྱ་གར་རང་བཙན་ཉིན་མོ་ནས་བཟུང་རྒྱ་གར་གྱི་མི་སེར་ཁོ་ནར་དམིགས་པའི་མཚན་རྟགས་བསྡུ་རུབ་ཀྱི་ལས་འགུལ་ཞིག་དྲ་ཐོག་དང་ཡིག་ཐོག་གཉིས་ཀའི་ལམ་ནས་འགོ་འཛུགས་བྱས་ཡོད་ལ།  བསྡུ་རུབ་བྱས་པའི་མཚན་རྟགས་དེ་དག་རྒྱ་གར་གྱི་སེམས་དཔའ་ཆེན་པོ་གྷན་ངྷའི་མཆོག་གི་འཁྲུངས་སྐར་ཉིན་ཏེ་ཕྱི་ཟླ་༡༠ པའི་ཚེས་༢ ཉིན་རྒྱ་གར་གྱི་ཕྱི་སྲིད་བློན་ཆེན་ལ་འབུལ་འཆར་ཡོད་འདུག(ཉིན་མོ་དེ་ནི་རྒྱ་གར་རྒྱལ་ཁབ་ལ་མི་སེར་སྤེལ་བའི་རིང་ལུགས་ཀྱི་དབང་སྒྱུར་ལ་རྒོལ་ལན་དང་ཕྱིར་འབུད་བྱེད་ཐུབ་པའི་ནུས་པ་ཡོད་པ་མཚོན་གྱི་ཡོད།)

དེ་རིང་གི་ལས་འགུལ་ཁྲོད་དུ་བོད་རང་བཙན་སློབ་ཕྲུག་ཚོགས་པའི་རྒྱ་གར་རྒྱལ་ཡོངས་འགན་འཛིན་རྡོ་རྗེ་ཚེ་བརྟན་དང་། ལས་འགུལ་འགན་འཛིན་བསྟན་འཛིན་འཇིགས་བྲལ་གཉིས་ཀྱང་མཉམ་ཞུགས་བྱས་པར་བརྟེན། རྒྱ་གར་ཉེན་རྟོག་པས་བཀག་འགོག་བྱས་ཡོད་པ་རེད།

ཟླ་འདིའི་ཚེས་༣ ཉིན་བོད་མི་ལས་འགུལ་བ་གསུམ་རྒྱ་གར་ཉེན་རྟོག་པས་བཀག་ཉར་བྱས་པ་དང་། ཟླ་འདིའི་ཚེས་༥ ཉིན་ལས་འགུལ་བ་༣ བཅས་ད་ལྟ་བོད་མི་དྲུག་བཀག་ཉར་བྱས་འདུག

བོད་རང་བཙན་སློབ་བཙན་སློབ་ཕྲུག་ཚོགས་པའི་དྲ་ཐོག་གི་མཚན་རྟགས་བསྡུ་རུབ་ཀྱི་ལས་འགུལ་གྱི་དྲ་ཐག་འདིའི་ཐོག་ལ་བསྣུན།
https://secure3.convio.net/sft/site/Advocacy?cmd=display&page=User